¹ Ɗaŋnin zhipti a koni mbǝrghǝzǝŋ a ɓanngǝn ɗǝgn zarsǝ gya gon taa gaa caaghǝn raai tǝ vǝr raa wasǝŋ gya zhipti morghǝn tǝ giɗkǝn mǝnndǝŋsǝ ² a mbyerni tǝ ryaaghǝn. Giɓ raa wasǝŋ wo kuushi. ³ Taa wul tu waari kaɓkǝn gǝɗ tǝ tuur tǝ kaɓkǝn ngǝtnngǝ cighǝn ɗaŋ Cogn ndǝr nǝ durghǝ ɓǝǝlghǝn tǝ nyaarghǝn a dlei gya gyobɗaŋ tǝ caa raa tǝ gya gyo ɗaŋvtǝǝ yisǝŋ jom jomni. ⁴ Duryo tu ɗeɓaɗ ngǝtn yo ɗaŋ Cogn ndǝr yi ndara ngǝtn won ɗaŋ mya mbi tǝ nyaarghǝn ɗaŋ ta nyaŋngastǝ hŋ. ⁵ Nǝ duryo tu taa ndzǝkti tǝ vik Cogn tǝ karaghǝn Cogn. ⁶ Ǝŋ kyaa lǝǝr gin ɗi a ken yestǝ, kaa naa ni monngǝ mbuuni kǝ Yesu ɗaŋ nǝ Ɓorghǝnni. Nǝ duryo tu tǝǝ numki tǝ viighǝ caaghǝn raa tǝ giɗkǝn mbuuni ɗaŋ kǝ laaɓ. ⁷ Nyaŋngas vi muuri kǝ ɗǝgn ɗaŋ dwotsaŋsǝ guɗi caa suu. A bamvi gi, mata dlii raa a laaghǝ Cogn. ⁸ Nǝ duryo tu dluughǝn dlii yi tǝ laa njwatn, beɗ tǝ gi laaɓkǝn Cogn a moɓ laa a ɓuruk ngǝtn. Caa ngaɓ mbiighǝn a raa nǝ riighǝn gn ɗaŋngǝni tǝ riighǝn gyo ɗaŋ wo man. ⁹ Vii gin yi kǝrǝŋ kǝrǝŋ a kǝǝm kaɓkǝni vundul. Duryo tu nǝ durghǝ gin ghuŋ myaa vuu tǝ fighǝn laa mbun mbun. ¹⁰ Duryo tu mi tǝ raa fyeɗi a Cogn kǝ gwaam, gyo ɗaŋ cinǝ murghǝ vumngǝn zarsǝ ɗeɓaɗ, beɗ tǝ gi ɓanndǝŋ mǝn caaghǝn raa hŋ. ¹¹ Ken a ndǝr a giɗ ɓuruk ngǝrshi gya gin. ¹² Gaa gon tǝ kemas tlǝɓǝr waa hŋ. A bamvi gi, naa nǝ ngǝtn kuuɓkǝn nǝ durghǝ gya gyo ɗaŋ tǝ caa raa, a wulghǝn vi, giɓraa, suughǝn, caaghǝn vwa tǝ ndzǝkǝn. ¹³ Hal mǝ man, mbǝrghǝ a kwaanngǝn, tǝ fuughǝn vik wusni, tǝ giɗkǝn beɗ. ¹⁴ Lya Lyaa tǝ vǝrghǝn yo ɗaŋ kǝ yir hŋ, gyo ɗaŋ tǝǝ taa vǝrghǝ a te konngǝtn ngǝtn jaan, tǝ te nyomngǝn taas zarsǝ varaŋshi. ¹⁵ Yaalɗa nǝ ngǝrshi gya gin. Naan a dei wasǝŋ, duryo tu cighǝn ken waa tǝ naa kǝrǝŋ kǝrǝŋ a ɓuruk zarsǝ. ¹⁶ Ɗakɗa nǝ gama tǝ giɗkǝn waa. Ciken a ngǝrshi gya gin. Duryo tu tǝ fighǝn cik, ka vum gamai tǝ mǝn yo ɗaŋ ca sǝǝ kǝǝm ɓaskǝ.