1
Ẹpọọlu, Ikristi Ijesu ẹènwanro akà Itimoti ọòda, ni Ifilimoni, tọ ọrẹ okuku akà to obile siye utun,
2
akà na Afiya tọ ọdiyaro, akà na Akipọsi to obile wa ẹkọnro, akà nẹ ẹṣọsi nẹnẹ de gure ì nu ubo na.
3
Ese a da wẹ eka akà iwọbẹbẹrẹ Òsibina tẹ Ẹda akà Idu Ijesu Kristi.
4
I da fọ ọgba fẹnyan gan mo Osibina ogbọna nẹnẹ mè e ki ye wi iwuru ì ma adura na,
5
ubaka e wọ wọ ọnawọ nẹnẹ u su to Idu Ijesu akà unini nẹnẹ u su to ye ero ọnwọnwọn fẹnyan na.
6
I siye adura ka wọ ọnawọ oruruwa èke siye utun, u di su odidin ofife yẹrẹ epẹn iboro fẹnyan ẹpan nẹnẹ ti su Ikristi na.
7
Ti su ẹbẹbẹn ọyọyọ ke akà abẹriwu ubaka wu unini, ubaka Osibina eèro ọnwọnwọn eèyẹ nẹnẹ wè e fun na, mọ ọda.
8
Ọnẹbẹ uùba, e sisi gbe ka i su ulokogbigben fẹnyan Ikristi ka i buru u ka u siye onẹ bọ na,
9
kẹgankẹgan ubaka unini, mà a tẹyẹ we ekpin-amẹ, Ẹpọọlu, ẹdẹda okunmokun, akà nẹ wa ẹnwanro akana na ni Ikriti Ijesu.
10
Mè e ṣin nẹ mo ogben Onesimosi, nẹnẹ i ṣina wẹ ẹda ẹwẹrẹgẹ na.
11
Ubaka orokoro gbọgba a tayi wa nẹ ọ, àmá akana e mi su ekẹrẹ nẹ ọ akà nẹ ka amẹ.
12
I file ẹ pila nẹ ọ ayẹ nẹnẹ wa ame ebẹb uloko na
13
I ni ka ẹ fọ ẹ kẹ iwu e di siye okoto kẹ nẹ mọ ì wa awọma akọ i siye wo ẹwẹrẹgẹ ubaka ẹpẹpanoboro na.
14
Àmá i me ni ka i siye kẹnakide ọnẹ nẹnẹ ù ma fọ uba wo na. I me ni ka wo osisiye oboro e wo otagbanyin uùba ṣa àmá e wo wi ibe ṣa.
15
E diye gbe ka onẹ ùba ọrẹ ayẹ biya fọ ẹ fura wẹ ẹfa nọ ọgba, kadakada ka u di na ẹ pila òtutunmotutun.
16
E èke pila wa ọnwan, àmá ẹkena nẹnẹ fọrẹ ọnwan na, ki iwukpe akà ẹkena nẹnẹ fọrẹ ọnwan na, ki iwukpe akà Idu.
17
Wè e su mu akọ wo ọbawọ, bọra uba ọ na ẹ akạ amẹ na.
18
È é duduna siye to u sa à á bare na e je wu uba, gan ya wo mo o.
19
Amẹ, Ẹpọọlu, ạ fọ amẹ ẹbẹba uùba wora ikokori ọnẹ. Amẹ ẹbẹba èke duna ọ pila-i ma fọ owo yọ ẹ ka amẹ e bi àwọ́ ẹbẹba!
20
Hẹn, ọda, siye ma afa Idu; fọn mẹ ẹyẹ Ikristi.
21
I sụ ofanyẹnyẹrẹ ka wà àka wọ ọtọn nẹ mọ, ayẹ a kpere mọ à á wọra ikokori ọnẹ nẹ ọ i dinbka wè ẹ̀ke isisi siye fọra akọ i siye ṣin na.
22
Ọ̀gba ọrọọrẹ ayẹ, guru ẹfa ogumẹse wuje nẹ mọ ubaka ẹ fọ anyẹn yẹrẹ ka i wa adura uùba ọrẹ bè èke pila mọ nẹ ọ.
23
Ẹpafrasi, mo obile wa ẹnwanro Ikristi Ijesu, à á gan o.
24
Kẹgan Ẹmaki, Arista Kusi, Ẹdamasi, akà Iluku, mo obile siye utun abẹ.
25
Ti Idu Ijesu Ikristi eèse e jọmọ gbeli we ẹfunẹnfunwẹn. Aamin.