¹ Ẹ̀pen ẹnanẹ urunba Ijesu diya fọ yi iwu nyen ye egbenurunmẹka abẹ ìtiberiasi oòkun. Akọ e siye fọ yi iwu nyẹn nẹ. ² Isimoni Ipita ma bile Ẹtọmọsi nẹnẹ bè e ye Ididimosi na, Ẹnatanieli nẹnẹ wo Ẹkana ṣa Ẹ̀galili na, Isebede eègben abẹ, aka Ijesu eègbenurunmẹka ẹbọrẹ ebẹn. ³ Isimoni Ipita ga nẹ ba ka, "Mà a yọ sẹ ayarẹ." Bi pila yẹ ka, "ka ato àka yẹrẹ ọ yọ. " Bẹ yọ bei mẹ fọn oko ebi eka ibe , àmá bi ma gba kẹnakide se ujo fẹnyan. ⁴ Akana, ogbọna nẹnẹ apẹn kpan ke ùrorun ojujujo na, Ijesu jomo wo okun owo, ama egbenurunmeka abẹ e me kpeli ka ayẹ ya. ⁵ Ijesu mi ga nẹ ba ka, "Ẹgbeniforo, i ni su ẹkẹna nẹnẹ oro diye je na?" Bi guna yo owo ka, "Hẹnhẹn." ⁶ E mi ga nẹ ba ka, "Nẹ nẹ nẹ ẹfẹfẹ wo ọkọ yu uba ojijen, nà àka gba ebẹn." Ẹgan bi siye nẹ bẹ ẹfẹfẹ bi mẹ di pile wura ẹ vẹ ṣa ubaka ayẹrẹ ọyọyọ nẹnẹ bẹ sẹ na. ⁷ ọ̀nẹbẹ uùba ogbenurunmeka nẹnẹ Ijesu ni yẹ ẹga na mi ga nọ Ipita ka, "Idu ya nẹ." Ogbona nẹnẹ Isimoni Ipita wọ ka Idu ya na, e do ya alẹgbẹ ọnyẹn ẹka ẹ iwu nẹ (ubaka e wo ẹbolẹbolẹ), a nẹ wo ọkun ibe. ⁸ Egbenurunmẹka abẹ mi yẹrẹ ọkẹbi ayẹ ṣa (ubaka bi mẹ fọn ni ijẹ, e ki è e wẹ akọ ikubiti ẹparẹ fura ọkun owọ nẹ), bi mi ẹ uvan ẹfẹfẹ nẹnẹ fẹ nọ ayẹrẹ ọnẹbẹ na. ⁹ Ọgbọna nẹnẹ bi ve ije na, bẹ gba ẹnyanma èfẹnẹbẹ akà ayẹrẹ nẹnẹ biya yẹrẹ ya na, bile ẹkara. ¹⁰ Ijesu ga nẹ ba ka, "Ni tiyẹ ẹbẹn àyẹrẹ nẹnẹ nẹ sẹsẹ sẹ na iìwu ṣa," ¹¹ Isimon Ipita mi kpọ yo e vuna ẹfẹfẹ ayẹ ṣa ije, ọnẹ nẹnẹ fẹ nọ ayẹrẹ ẹkẹka, bẹ wa ipikiborẹkakọrọfọkatita na, àmá ka akọ bi siyẹ yọ ta na, ẹfẹfẹ ayẹ a ma fẹnẹ. ¹² Ijesu ga nẹ ba ka, "Nẹ ni mi jẹ urorun iìjẹn." E mẹ su ọnẹ ègbenurunmẹka abẹ iìwu nẹnẹ gbadọ ṣin ya ka, "Ẹra ọ wa a?" Bi din ka Idu ya nẹ ¹³ Ijesu mi ṣa, e tiyẹ ẹkara, e mi à á nẹ ba, akà ayẹrẹ ayẹ bilẹ amọ. ¹⁴ Ọnẹ a wa isi ọtẹtaro nẹnẹ Ijesu fi iwu nyẹn egbenurunmẹka abẹ ògba nẹnẹ a sọma fura ekeọro na urunba. ¹⁵ Ọgbọna nẹnė bi je urorun iìjen ke na, Ijesu ga ni Isimoni Ipita ka, "Isimoni Ejọọnu oògben, ù ni mẹ ẹga fọre ẹnạnẹ hon?" Ipita ga nẹ ya ka, "Hẹn Idu, u din ka i ni wẹ ẹga." Ijesu ga nẹ ya ka, "Fiye mu ududo eègben. ¹⁶ E diya nẹ ya isi ọọboro ka, "Isimoni Ejọọnu oògben, u ni mẹ ẹga họn." Ipita ga nẹ ya ka, "Hẹn Idu, u din ka i ni wẹ ẹga." Ijesu ga nẹ ya ka, "Sẹlẹ mu udodo abẹ." ¹⁷ A ga nẹ ya isi ọtẹtaro ka, "Isimoni Ejọọnu oògben u ni mẹ ẹga họn?" Ipita bẹ ibẹ fuwa ubaka Ijesu ṣin ya isi ọtẹtaro ka, "U ni mẹ ẹga họn?" A ga nẹ ya ka, "Idu, u din epẹn fẹnyan, u din ka i ni wẹ ẹga." Ijesu ga nẹ ya ka, "Fiye mu ududo abẹ." ¹⁸ Ègaba, ègaba, e ga nẹ ọ, ọgbọna nẹnẹ u wo ogbenikeke na ù de guru awọ ẹbẹba iìwu u de mi yọ ẹfẹnẹfẹna u na, àmá akọ u mi siye dọn na, u wà a yọrẹ wu ẹba, oro ọbẹn èke mi guru wi iwu, a fọ ọ kẹ yọ ẹfẹna we èke ni ka ọ ya na." ²⁰ Ipita bilanyen gegere e mi gba ogbenurunmẹka ọnẹ nẹnẹ Ijesu ni yẹ ẹga na ka à á yẹrẹ ba, ọnẹ nẹnẹ fi iwu gbeli Ijesu ẹfẹ ùjoguwe iìjen ọgba na nẹnẹ diya ga ka, "Idu, ẹra a wa ẹfẹna nẹnẹ àka fọ ọ nyẹn na?" ²¹ Ipita gba ẹ e mi ga ni Ijesu ka, "Idu, ẹna oro ọnẹ èke siye a?" ²² Ipita ga nẹ ya ka, "Mè e ki ni ka a ma jen e re ọgbona nẹnẹ mà àka a ṣa na, ọọna ọnẹbẹ wa nẹ ọ kẹ yẹrẹ mọ. " ²³ Egan ẹga aye siye san ẹda abẹ eètin, ka ogbenorunmẹka aye eèke fo nẹ, àma, Ijesu a ma ga ka ogbenurunmẹka ayẹ èke fọ, amá, "Mè e ki ni ka a ma jen e re ọgbọna nẹnẹ mà àka a ṣa na, ọọna ọnẹbẹ wa nẹ ọ a?" ²⁴ Ogbenurunmẹka ayẹ a na ẹkẹna ẹnanẹ uùbedin, ayẹ a wọra epẹn enanẹ, ti diye din ka yu ubedin wa ikuwa. ²⁵ Ẹpẹn ọyọyọ ẹbẹn diye wamọ nẹnẹ Ijesu siye na, e gbe ka bẹ wọra ba ọrọọrẹ wuje, è èbana ẹrọ ọnẹ ẹbẹba e di na emumu abẹ nẹnẹ bà àka wọra na.