¹ Yeso dǝ hurǝ tangkum gũFii, nǝng mongɓuivou aka wu ɓiubi a, ''Yivǝnyinasǝnǝng, aɓa le-teinǝ hyila, ɓai nǝngminǝngnǝ!'' ² U nau a, ''Aɓa gwa-nǝngminǝngnǝ? Tei yaung tsing nku-kutei akai nǝ ai ba ai deiunǝ.'' ³ U'ku kutei Zaitun bapi sǝ kumgũFii, Bitru, Yakubu, Yohana, ɓai Andrew ai ɓiu tãni, ⁴ ''A naɓila, nɗwa lenǝngnǝ ncuekǝrei? nɓa ntaɓinala nǝngnǝ bapin h?'' ⁵ Yeso fuɗi bǝ nale la a, ''Ɓa kang, bi yivaka fǝmnwaɓanka. ⁶ levǝ kpala nwu ɓai ing ain na'a, mikǝ u,' ain fǝmlevǝ kpalau. ⁷ Nǝɓa libi ɓui, ɓai le sǝmsǝm ɓuin, biɓa ɓiɓinka; le nǝngnǝn ncuesǝncue, langfǝ ntǝngrǝ fangwamlau. ⁸ Zaivǝ nyaha ɓai zaivǝ, Hua n nyaha ɓai Hua. hua nyiyiu le bǝ kpala, ɓai vom. Nǝngnǝ kǝ bǝ fuɗi bǝchi le-ɗzirǝ. ⁹ Ɓa jibǝgang, ai ɗziɓanɗzi tangsa fada, ain gbaɓangɓa tangkum gũFii. ɓan jiji chile le-gwamna ɓale yiVah bim, bibǝ nabim sǝlei. ¹⁰ BivǝFi nta sǝ zaivǝ ntaha. ¹¹ Nǝ ai moaɓa ai taɓakǝng, bi nyiɓa-ɗu sǝnǝngnǝ ɓan narǝnka. Tangsa viiɓi, nǝngnǝ ɓan narǝ nwu nwaɓan wu; nɓa ɓan nabilau, nKwang garangrang. ¹² Hyuima nɗzanɗza nwaɓua, langfǝ Da ɓai Yi. Leyi n'nyari ku le chirǝvai ha ain ɗzale nwa ɓua. ¹³ Zaivǝha nlaɓanla bivǝ-ing. Langfǝ yivǝha dǝ munnya takǝ tǝngrǝn yivǝɓa nchi hũrǝn chi. ¹⁴ Nǝ ɓa ɓa le nǝng-aɓai ɓai bǝ ɓankǝbǝ jibǝni hyiu ujilanǝngka (yivǝ zamnǝngɓǝ ibǝ), levǝnǝ tangsa Yahudani huita le-kutei. ¹⁵ Yivǝnǝ kukum yang biu chuahyuankǝ, bifǝu ɗanǝng-aka tangsauka, ¹⁶ langfǝ yivǝnǝha faa-yang, bifǝ ufauwu tangvavauka. ¹⁷ Nǝngcuesǝɓi sǝlevǝnǝ ɓǝlemongna ɓǝlevǝnǝ dǝ ɗayi, tangsa le vii-aɓini! ¹⁸ Ɓa gũ langfǝ binǝngnǝ cuesǝ tangsa nwayhakwangka. ¹⁹ Tangsa viini yiɓai-agãla, nǝɓama yaung tunbǝ fuɗi fangwam, viinǝ Fii ma fangwam wukǝ susuenǝ, bafǝcuesǝ akau. ²⁰ Lanfənə yicuevah cum nwa lei fih nə leun, ɗjuasə aka yaung hyuaku, bivei vənə u ɗubu, ñlei nəngɓə u cum nwa fih vei. ²¹ Langfǝ nǝ yivaka naɓa a, ''ɓa'ɓa Kristi nǝ, kon n'uɓa lei!' biɓa gwangka. ²² Lei kristi nwa'iu ɓale Nanwabi nwa'iu ain i'i, ain cuelei nǝngcue sǝɓi, yangkǝ ai lĩũkǝ, nǝngcuesǝncue, kon leinǝ ai ɗuboulenǝ. ²³ Ɓajitsa, n'naɓa lenǝngnǝlan hagbam yemla. ²⁴ langfǝ chua le yiɓai lei-vii-alei-hagbam, fih aboarǝ nbajinba, hyui'hyuim ba dǝ ɗuavouwa, ²⁵ lein ɗzang fan o'o ɗuiye, langfǝ lei samɓainǝ ɗuiyeni n'yiyiu. ²⁶ N ǝng ain ɓa Yi'Yivǝ dǝ wurǝ tangsa lein ɗzang ɓai gwang samɓai ɓai gãrǝ. ²⁷ Nǝngɓǝ u cum lei Malaikavou wu ghamnwa leivǝvou nǝ u ɗubonǝ nwahyua fangwam nanya, takǝ tǝngrǝ hua ɓai ɗuiye ²⁸ Ɓa i'nau sǝ ka vai. Nǝ u pemyaung akwi, dauba afũn, ɓa ibǝ yung bapi. ²⁹ manǝngɓǝ nǝɓa ɓa leinǝngnǝ dǝ fuɗirǝn ɓa ibǝ u bapin, bapisǝ nwakum. ³⁰ Bi-agang, dǝmin naɓala, fangwam-anǝ bapaiu ha lenǝngnǝ ncuesǝncue. ³¹ Ɗuiye ɓai hua ntǝngfam-tang, langfǝ Bim ba tangfamwau. ³² Langfǝ takǝ sǝbivǝ fihɓǝ, bai ɓiɓǝ, yivǝyaung ibǝ, kon lei malaika ɗuiye, kon Yiɓǝ, sen Dah. ³³ Ɓa kubǝgang, ɓa'ɓa, nǝɓan gũFi, don ɓa ibǝ viiɓǝ lau. ³⁴ La ɓaman yivǝnǝ ta ɗuawainǝ--u yi vavau u ɗzale mongsemvouku, legbam ɓai nwacumvai, u na yivǝ ɓanǝngvou a biu uku ɓainǝngtsǝ. ³⁵ Manǝngɓǝn ɓaku ɓainǝngtsǝ, don ɓa ibǝ nɗau yicuevahɓǝ nwurǝlau; nbancucue ɗungɗui, ningvii, nǝ ye'dǝtaarǝ, kon nwaɗuɗi. ³⁶ Nǝ uwu danglang, biɓa gula uchiɓa nǝngnǝngluenka. ³⁷ Nǝngnǝ n'naɓalanǝ, n'nakǝ levǝlanha, ɓa'ɓa.