¹ Bə baniu bi Yeso kristi, yiFih. ² Ɲving tangsa ɗarenwal və Ishaya mongsem Fih. " Ah-ɓah,minchum, mongɓui chiɓai. Yivənə ma nɨng-agang nə. ³ Wai na dei ɗubə tangsa bivohnə ɓahman nɨngahvə Fih. ⁴ Yahaya yivə huemɨng, dəu nabi və Fih kəzayivəla, dəu nalei, a tubi, ai yila sə nɨng aɓei. ⁵ Leivə hyua, Yahudiya ɓalei hyua Urshalima, ai fuɗi bə wusəu, dei nanɨng aɓei vai, dəu hueleimɨng nɨngvei Urdu. ⁶ Yahaya u ya jua- jirauba səu, nɨngɓə u tsakə juasəu, nɨngtang vou sajuing, ɓei mɨngtuang. ⁷ U nabi Fih, a yivaka də wurə chuam, u paimyan ko ɓeihuvou mah ribari biung. ⁸ Mi dəmin huemɨng ɓei mɨngtsi, amma u a vou dəu huemɨng ɓei kwang. ⁹ Fihla vəɓi, Yeso wu hyua Nazarreth tangsa Galili, Yahaya huemɨng nɨngvai Urdu. ¹⁰ Ɓei irə vou tangsa mɨng, nɨngɓə ɗuiye ɓai, kwan wu də chuerəku mang go, wu ku nwagyaun. ¹¹ Nɨngɓə ai li wui ɗuiye, də nana, "yivən yimnə dimin yiɗiu nə, dimin lilarə vou nə. ¹² Chuelou dangla kwangɓə ɗəu takə ɓəngvu. ¹³ U ɓəngvuh bu hun'iu, mungkulum də ɓaunrə, u chuahai ɓəlei hyam ɓəngvuh, lei malaika də deu garə. ¹⁴ Da ai mua Yahaya,nənɓə Yeso wu Galili dəu chue nwatsum vəFih. ¹⁵ Dəu narə na vivəFih chueng, ɓa yila sə nəngaɓei ɓa wu ɓa mua bi agang. ¹⁶ Dəu pairə nwa teku, nɨngɓə u ɓalei Siman, ɓei Andrawos, hyui Siman də aikah teku, bisi lein leivə muahin. ¹⁷ Yeso nalena ɓa muachuam min myem ɓakə lei mua zayivə. ¹⁸ Dangla tang hyua ai aikah vai kəta, nɨngɓə ai muatua. ¹⁹ Nɨngɓə Yeso i də horə, u'tah chuaulalou, nɨngɓə, Yakubu yi Zabadi ɓei hyui Yahaya lei tangsa ƒah dei makah vai. ²⁰ Dangla u ɗubəlei nɨngɓə ai-iyi davai Zabadi tangsa ƒah ɓaleivə chuenwatsum, ai muachua Yeso. ²¹ Da ai - i aita Kafanahum fisati,nɨngɓə ai ta tankom guFih dəu ninasə nɨng kə zayivə. ²² Ai chue səɓi ɓei ɓə ninasə nɨngvou, bisa dəu ninasə nɨng man yivə laɓei iko kunə, ɓaman yivənə vinəngḅənə ko leivə ninasənə attaura. ²³ Dangla tanghyua, nɨngɓə, yivaka u lah ɓei yua-aɓi tankom gu Fih, dəu bwabu. ²⁴ Dəu narə na, ɓacing ɓɨng yiɗiɓi chue maka Yeso Banazarreth? A wu bə hyaɓi? Ɓi ibə wakəman, makə yivah gang və Fih. ²⁵ Yeso ikə yuaɓə, unanah" A kei, i tangsa səuni. ²⁶ Nɨngɓə dangla yuaɓiɓə gɓau u oh hua, nɨngɓə yuaɓi ɓe isəu ɓei buabə. ²⁷ Leivə kpəm chuesəɓi, dei ɓihabi, dei nanah, "Ɓa manɨngɓə ? Bə ninasənɨng afu, har u de nwa kə yuaɓi ma də liurə. ²⁸ Dangla bivou ɗəbə ko ɓaiha tangsa Galili. ²⁹ Chua ai i bə guFih, nɨngɓə ai tah vahvə Bitur ɓei Andarawas, chuahaiɓei Yakubu ɓei Yahaya. ³⁰ ɗjang Bitur lilarəlou, nɨngɓə zazzaɓi də ziurə, nɨngɓə ai nakə Yeso bivoula. ³¹ Nɨngɓə uh tachi tau mua kanau u iukə, nɨngzhi laɓə iunah, nɨngɓə u i yuilei nɨngtangla. ³² Nəngɓə ɗuinvi chue, ai wukə leivə nɨngzhi ɓaleivə yua. ³³ zayivə vahngahɓəha ai wu wei gəm nwanɨng-gavaiɓi. ³⁴ U ikə nɨngzhi ɓei yuakə səleivə, u gualalou yua nabi, leima ai iuyang. ³⁵ Ɗəchibə, u i utabənə yivəyaungnə nɨngɓə u guFih. ³⁶ Bitur ɓaleivə nə chuahai ɓəkanə dai nyam chua. ³⁷ Ti ciu nɨngɓə ainauna leivə də ɓabəu. ³⁸ Nɨngɓə u naleina, ɓita leivahnə ka chinə nchuebiFih bibi bisəu ikə. ³⁹ U təngkə hyua Galili ɓai biFih-ha, dəu ikə lei hyuasə zayivə. ⁴⁰ Yivə blaika wusəu, də gunrə, u baɓai nwaɗuang kə chiu, u nana nəna guan, a lom hinla. ⁴¹ Yeso ɓayiɓeivou, nɨngɓə ɗjinaku, nauna ngwan, a mem hinla. ⁴² Tang hyua ɓi yivən blaiɓə yisəu nɨngɓə lo u ,mem hinla. ⁴³ Yeso ɓai tsakə vəcuicui, nɨngɓə nau tavou. ⁴⁴ Yeso na utah, biunakə yivakalanka, u tasə kunlau, u nabiɓə lo-nə, u na bə leinwa Musa nakənə ɓai nɨngnə Fih chueulanə. ⁴⁵ U pai, nɨngɓəu nabi ɓə fam-fam dəu hokərə, bibi Yeso fatabəɓakalou, u kuɓainchiun bənə yaungnə, leivə i koɓaiha də wusəu.