¹ Nə Yeso ɓa jung zayivə, uh ta kutei təu kuhua, nəngɓə uh nakə leivənə də muachuau ai wu bappi ɓaisəu ² Dai liurə, dəu nyileinasənəng dəu narə ah ³ Fih də lilarə vaivənə də narə dei yiɗiunə. Bisi uh gwalei nwa, uhn mualei nah tangsa ɗjuiye. ⁴ Fih də lilarə vaivənə də bazhi bisi fangwam nəng-aɓai, uhn tsasəleintsa. ⁵ Fih də lilarə vaivənə ɗəkuleiunə, bisi fangwam ah fuhn avai. ⁶ Fih də liularə veivənə də yiɗi bə ku tangsa nəng-abəgang, ɓaman nəngnə yivaka də yiɗi bə tangrə ɓai uhn nwarə, bisi uhn myem leikə leivə nəng-agang. ⁷ Fih də lilarə vaivənə də chue nəng-agang kə lei vakala, uhma uhn chuelei nəng-agangla. ⁸ Fih də lilarə vaivənə də chue nəngnə uhn lilarə səunə, vi akai ain kubəni Fihlanə ain ɓaurənə. ⁹ Fih də lilarə leivənə də vali lei vaka də ku lalah.Uhn ɗulei kə leiyiu. ¹⁰ Fih də lilarə vreivənə də kuh tangsa biagangni ain deu garə nə biagang vai ku chuahai ɓaleikən, nəngɓə kə bisi nəngnə leivə nəng-aɓai də dailei ɓai eyem ɓai bə ɓangleikərə. Fih də mualei nah tangsa vah ɗuiye. ¹¹ Fih də lilarə ɓai makə, nə leivaka də dai ɓai eyem, yang dəu gharə nə ai chue ɓa nəngaɓai yang, nə ai na nwa'iu kumai yang, dai narə ah mang yivə nəng-aɓai bisi bə ba-nyima səm. ¹² Nə chue manəngɓəng, a lilarə, bisi Fih ɲda nəng-agang kangah vah ɗuiye. Akem langɓə ai də yiɓai kə leivə tainwa vəFih vinə paikə chuilanə. ¹³ Ɓakən ɗjikwaing fangwam, nə ɗjikwang nə yi larə vou, uh myem kən ɗjikwaing yang ehen? UH hyi a kau, ain eukəta zayivən tam ɓai bu. ¹⁴ Ɓakə ɗua fangwam, vah ai miu kutaini uh ba uh huewau. ¹⁵ Zayivə ba ɗji ɗua fitila ɓə ɗɀeu hua ɓwani kalo wau, ain ɗji fitila ɓə kunəng ɗjirə vou, nən dəkə ɗua kə tangvah ɓənəha. ¹⁶ Ɗuaɓa gah chi zayivə nəngahni ain ɓakə nəng-agang ɓa kə ai də gharə kə dahɓa nə ɗuiye ni. ¹⁷ Biɓa kem ɓaman wu bə ɓankə bə də-nwa ko lei manəngka. Ɨng wun bibə ɓankərə leu, bi biɓə yila. ¹⁸ Dəmin naɓa biabgang laha, ɗuiye ɓai hua wun paikəla, nəng aka tsing tangsa nəngah akain paikərə tangsa bə də-nwani, sai nə leinəng nha yila ɗai. ¹⁹ Manəngɓəng, yivənəha ouwa nəng tsing tangsa bə də-nwa ni, nəu nyinal kə lei vaka chue manəngɓə leung ain ɗukə yiva chuani ɗuiye. ²⁰ Dəmin naɓala sai nə nəng-agang ɓa pai avai və samɓai Farisi leung, nəngah yang ɓang chi ɓan takə ɗuiye. ²¹ Ɓa leeh nah ai nalei la fangwam veiva vəɓi nah bi ai hyabən ka, yivənəha hyabə yang uhn ku tangsa buatai. ²² Bisi dəmin naɓala, yivənəha bwachi ɓai hyuin langɓə uhn ku tangsa kita. Yivənəha nah hyuin langɓə nah nəu uh yaung ɓai bwatai yang uh ma kita də miurə. Yivənəha nah ah mang wawa yang ɗuang avou. ²³ Manəngɓəng, yivənəha də tabə dənəng kə Fih, nənah kem nə hyuima la ɓai nəng aka ɓai ma nyi-nyiu yang. ²⁴ Ah yila sə nəng dənəngmai tatta ta ma tangsama ɓai hyuima yang ka fa wa dənəngɓə. ²⁵ A gwanwa nəng-aɓai ma yemla kə yivənə a chue nəng-aɓainə yadda ɓa ta bə chue kita leu, bisi yivənə a chue nəng-aɓai nə ɲchue ɗji na yivə chue kita, yivə chue kita nchue ɗjina yivangah vou, yang ai chue ai le bursina. ²⁶ Dəmin nala, a ba a ieh tangsa bursina nəu, nə sai afa nəngnə dai ɓiakənə. ²⁷ Ɓa leeh ai na ah, biɓa lue ɓai yiheinka. ²⁸ Bisi dəmin naɓala, yivənəha ɓa yihei bə ɓabə yiɗing, uh lue ɓaiukən tangsa nyi- nyiu. ²⁹ Nə nəngma a nahli nən chue mang chue nəng-aɓai yang, ɗu a wakəta. Hihiu bakai səmai tsing yaung da səma han takə ɗua. ³⁰ Nə nama nahli nən chue mang chue nəng-aɓai yang a tsum a wakəta. Hihiu baka səmai hyaung da səma han ta ɗua. ³¹ Ai mai na'nah, yivənəha ɲyam heiu yang uh deu ɗərenwol bə ienah. ³² Dəmin naɓala yivənəha einah kə heiu nəng bi yua a chuerə leung uh myem mukə yivə chue yua yang. Yivənəha ɗjau chua bə einah yang, uh ma chue yua yang ɓaiukə. ³³ Ɓa leeh ai naka yang nah, leiva ila la, bi a yui nəng famka, ɗə nəng yui nəng ma takə səFih. ³⁴ Dəmin naɓala biɓayui nəngka ko ɓai ɗuiye, bisi nəngɓə kə vah Faih. ³⁵ KO ɓai hua bisi nəngɓə kə bə tabu vəFih, ko ɓai Urshalima bisi nəngɓə kə hua və yiva angah. ³⁶ Bi a yui nəng ɓai jamkumang ka bisa a ba a mah jamku aɓi ɓai avou. ³⁷ Bə nabi ɓa ɗji kə mn'mn ko mmmh'mmh nəngnəha pai manəngɓən də wulang sə nəng-aɓai. ³⁸ Ɓa leeh nah, nɨng ɓai nɨng, ie ɓai ie. ³⁹ Dəmin naɓala bi a la yivənədə chue nəng-aɓain ka, bisi yivənəha gɓa jingma tsing yang, a myem a tsing a ɗjeu la. ⁴⁰ Yivənəha də yiɗi bə ta bə chue kita ɓai makə bisi nəng yasə mang, a deu nəng tsa nahma. ⁴¹ YIvənə nanah nəɓa nho mile tsing yang a ho mile na'iu ɓaiu kə. ⁴² Dənəng kə yivənəha ɓibə namai bi a myem chua ma a takə yivənə də yiɗi bə mua hyem namai. ⁴³ Ɓa leeh ai na nah, a yiɗi yivən gyanghima yang ah la yivənə yiɗimau nə. ⁴⁴ Dəmin naɓala, yiɗi yivənə yiɗi maunə a gu Fih kə leivənəla də ɗjanɨng la. ⁴⁵ Yang kəɓa myem kə lei yi dah ɓa ɗuiye. Uh chue Fih ikə leivə chue nəng-aɓai ɓa leivə chue biagang, uh dəmɨng kə leivah na biagang ɓaleivah nə naunə. ⁴⁶ Nə dəman yiɗing leivənə də yiɗi mang ɓakən buatai ma? Yang nəngnə lei mua nwaɓi hua də chuerə leu? ⁴⁷ Nə a ɗjam ɓuasəung hyuimang, ɲɓa a chue a paikə niu lei vahnə? Yang nəngnə langɓə lei zhi də chuerə leu? ⁴⁸ Manəngɓəng, a chue hila yadda dahɓa ɗuiye də chue hila nə.