¹ Nəngɓə Yeso ɓa lei muang vou bappi Urshalima wukə Betafaji ka butai Zaitun, nəngɓə Yeso chum lei muang vou na'iu. ² Nalei na, " ɓata hyua han nə yang ɓan chi yi vamdein tsətsa bəbi ɓai alahoki kə səu, ɓa bilei ɓa wumkəla. ³ Nə yivaka naɓa nəng akalabi səu yang ɓa nauyla naɓa yichuevah də yiɗi lei, yang dangla yivəɓən chum lein chum ɓai ɓaka. " ⁴ Susuenə wu aka, nəngnə lei ta nwatsum Fih nanə myem bi agang myem. U na ah ⁵ Nakə yi a hyihei Zayonla, a ɓa yivah ma də wurə ku vamdei nən alahoki nə. ⁶ ̇Nəngɓə lei muang və Yeso tatə chue kənwanə Yeso nalei lanə. ⁷ Ai wukə vamdei ɓai aholaki ɓə ain yau lei nəng yasəla, nəngɓə Yeso chuin la. ⁸ Jun zayivə ɓə aka pyang nəng yasə vai ku nəngah, lei vaka ga yanka pyang ku nəngah ɓi. ⁹ Nəngɓə jun zayivə ɓə ochi Yeso ɓalei vanə hyauchuau nə də bwabə na, " Hosanna kə yi Dawuda la! barka kə yivə nə wu tangsa ĩng yichueva nə hosanna tangsa garə" ¹⁰ Nəngɓə Yeso wu tangsa Urshalima, leivə vahngah yibə də narə na, " wa manəng mai? " ¹¹ Lei jun zayivə ɓə gwa nwa ah, " ĩng Yeso nə, yi ta nwatsum və Fih tangsa Nazaret a Galili. ¹² Nəngɓə Yeso ta kom gu Fih a gah, u nyam leivə nəha də lya ɓai nəngkə tangkom ɓi, u mem kasə leivə ɗzinəng ɓaleivə pyem nwaɓi ɓalei lya ɓai go kə, u ai kəta. ¹³ U nalei na, " ai vi yang " Fihn ɗu vam kə vah gu Fih; ɓa wu ɓa myem kə vahvei nəng ienəng. ¹⁴ Nəngɓə lei gɓam nəng wusə tankom gu Fzih a gah ɓi wu də lei larə. ¹⁵ Nəngɓə lei kunlau angah ɓalei və samɓei ɓa lei nəng chue səɓi nə u chue nə, nəngɓə ai fa ai lii lei muang ahan tankom gu Fih ɓi də bwabə də narə ah, " Hosanna kə yi Dawuda ha, "Yualei ' ieh ɓankə gaala. ¹⁶ Ai naula ah, a lii nəngnə leivənə də narə nə yang? Yeso nalei ha a, " oh! ɓa zamleu tangsa nwa lei muang a han, ɓalei muanə də umi nə ɓan lii bə kãbə abəgang ha?" ¹⁷ Nəngɓə Yeso yilei bəbi pai yi hyua ɓə ta hyua Betaniya ta lue bəbi. ¹⁸ Nwaɗzuaɗə chue, u fa u wuka vah angah ɓə, dəu vom də hyaurə. ¹⁹ Bə ɓarə kavai ji nwa nəngah, u tasəu ta chi chirəu leu, yanka ɓwasəu, u nakə kaɓəla ah, " bi a chi akang ka ka'ing" Tanghyua kavai ɓə chi bəbi. ²⁰ Nəngɓə lei muang vou ɓanənɓə səɓi mualei dai narə ah, " ɓakə kavai nə chi dangla?" ²¹ Yeso gwa nwa də nalei ah, " biagang dəmin naɓala, nə ɓala ɓai bə ɗzi nyi-nyi tsala bə nyibi aka yaung tangsa ɓai yang, ɓan chue nəngnə ɓwasəung chue sə kavai ni leu, ɓan nakə tai nəla, naɓa ' u ɗu u oh wam, un chuchue. ²² Nəngnəha ɓa gu tangsa bə gu fih, ɓa ɗzi nyi-nyi la, ɓan mumua'. ²³ Yeso wu tangsa kom gu Fih angah ɓə, lei kunlau ɓalei vangah vai zayivə wusəu dəu nyilei nasənəng dai narə ah, samɓei aka dəman chue kəlei nəngnə, ɲwa da samɓei ɓəi? ²⁴ Yeso gwalei nwa la ah, " mima min biaɓa aka tsing, nəɓa namlang, kən naɓala kon wa dəm samɓeinə dəmin chuekə lei nəngnə. ²⁵ Bə hueməng və Yohanna wulang pai? Wu ɗuiye ko wulang səleivə? Ai naha bi tangsa lei a, nə ɓi nanakə wulang ɗuiyen, yang u nana ɓakə ɓi ɗzi nyi-nyi səu leu? ²⁶ Nə ɓi nanakə lang sə zayivə yang ɓi ɓiɓi jun leivən, bisi dai ɓa Yohanna kə yi ta nwantsum və Fih. ²⁷ Nəɓə ai gwa nwa kə Yzeso la ah, " ɓi ibə leu". U nalei laɓə ah, mima ĩnba naɓa ko ɓai samɓei aka dəmin chuie kə lei nəngnəu. ²⁸ Ɲɓatsing dəɓa kemrəi? Yiɓui aka la ɓalei yi a yiɓui kə na'iu, u tasə yivə nachi tau nau a, " Yim" tatta chuem nwatsum la lyani fanəng. ²⁹ Yiuɓə gwa nwa a ĩnban tau, chuasəu nyi-nyiu wu lau leu, u ieh u ta fanəng ɓə. ³⁰ Nəngɓə yiɓui ɓə tasə yiu a nəng na'iu, tau nau nəng atsig la. U gwa nwa a rən təta nəngɓə u ta leu. ³¹ "Tangsa lei muang ni na'iu ĩnyivaka chue nəngnə davei də yiɗi ne?" Ai nana yiva nachi, Yeso nalei la a dəmin naɓala, leivə mua nwaɓi hyua ɓaleivə chue yuan fam wun ta vavə ɗuiye dokə ɓa. ³² Bisi Yohanna wusə ɓa tangsa nəngah gang, nəngɓə ɗzi ny-nyi səu leu. Leivə mua nwaɓi hyua ɓaleivə chue yuan fam ɗzi nyi-nyi lei səu, nəngɓə ɓaha finəla ɓa ɓakə nəngnə, ɓalabə tubi ɓan ɗzi nyi-nyi səu. ³³ Ɓalii ɗzum aka, yiɓui akala unyichue fanəng, u bya nəng fanəng, u kwai nwau hinla, u mi ɓwa kom məng inabi tang fanəng ɓi, u mi kom ɓafanəng, nəngɓə u ɗzi kana lei nəng lanəng aka. U paiu ta hyua aka. ³⁴ Nəngɓə vibə iekənəng nwabəm bappi, u tsum lei mongsem aka səlei nəng lanəng ɓi ai ta ai wurə kə nəng nwabəm ɓəla. ³⁵ Nəngɓə leivə nənglanən ɓə deilei mongsem ɓə, gɓa yivaka, hya yivaka, aiwa yivakaa ɓai tai kə. ³⁶ Yichue fanəng ɓə fa tsum lei mongsem aka paisə leiva nachi, nəngɓə lei nənglanən ɓə ta chue kənwa nachi. ³⁷ Chuasəu, yichue fanəngɓə tsum yiu ɓai nau kə səlei nənglanən ɓi, dəu narə a lauka ain də garə kə yirə ɓəndə. ³⁸ Nəngɓə lei nənglanən ɓə ɓa yiu ɓə, ai nakə hala tangsa lei a, yivənə kə yivə muanəng davou nə. Wu taɓi hyau ɓi ɗzi ,kunəng və davou ɓi. ³⁹ Nəngɓə ai ɗəu ai wakəta baifa fanəng ɓi ai hyau. ⁴⁰ Susuenə, nə yichue fanəng nə wunɓa, ɓaun chuekə lei nənglanən nei?" ⁴¹ Ai naula na, " wun də yiɓai kəlei nənglanəngnə kangah, yang u ɗə fanəng ɓə u də kana yivə nənglanəng aka, leivənə ban deu nəng nwabəm ɓəndənə nə visəu wuyang". ⁴² Yeso nalei a, ɓa zam leu tangsa bivə Fih? " Tai nə lei nəngminəng lanə, wu myem məng kə tai a bəgang yang, nəngnə wusə Fih, nəng chue səɓi səɓii? ⁴³ Manəngɓən, dəmin naɓala, ain ɗəvah Fihn naɓai ain dəkə hyua nə iekə nəngsəun ienə. ⁴⁴ Yivənəha ohkutai ni un uwa tangsahai yangsangni, yivə taiɓə ohku, ĩn namunnam. ⁴⁵ Nəngɓə lei kunlau angah ɓalei vangah lii ɗzum veu, ai ibə dəu nabi ɓaleikə. ⁴⁶ Dai yiɗi bə muarə, nəngɓədei ɓiɓi jun zayivə, bisi dai ɗəukə yi ta nwatsum vəFih.