¹ Tangsa viɓə, lei muang və Yeso wu səu, wu ɓiu ah, " wakə yivangah tangsa vah ɗuiye? ² Yeso ɗubu yimua hang aka wu ɗjeu tangsa lei. ³ Nəngɓə nalei ah, dəmin naɓa biagang la, yivənə ha nə myem ku kənwa lei muang a han leu, uh ba uh ta vah ɗuiye wau. ⁴ Manəngɓəng, yivənəha myem ku nwa lei mua hang yang, uh kə yivangah vah ɗuiye. ⁵ Yivənəha mua yimua hang manəngni tangsa ing yang, uh muang mi. ⁶ Yivənəha chue lei muang nə ɗji nyi-nyi lei səm nə chue nəng-aɓai yang, hyihyiu ai au tai namnəng juiu ai wau tang teku. ⁷ Hyai kə fangwam nəla bi zamrə, ɲdole lei vinə wukərə, hyai kə yivənəla ka səu vinə wukərənə. ⁸ Nən nahma kon kabuma chue nəman zamrən tsum ah wakəta chuila, hyihyiu ah chi hunrə ɓai kanama yaung kon kabuma, nə ain lei kə tangsa ɗua ɓai kanama ɓai kabuma na'iu. ⁹ Nəng nɨngma chue nəman zamrən ɗu ah wakəta chuila, hyihyiu ah chi hunrə ɓai nɨn tsing nə ain lei kə ɗua ɓai nɨng na'iu hakpəm. ¹⁰ Ɓaɓa, biɓa ɓankə tsing tangsa lei mua hannki ka. Bisi, ɨng naɓala ɗuiye lei malaiku vai vinəha də ɓa tang nɨnglei sə dam ah ɗuiye. ¹¹ Yi yivə wu bibə də hunrə kə leivə nəng-aɓai. ¹² Ɓa kem, nə yivaka ha ɓai nəngbungam kə hyun-hyui, nəngɓe ah tsing la tangsa lei, uh ba uh yi niu ah hyun-nya irəu hyuanhyua tau ɓabə ah tsing ɓə wai? ¹³ Dəmin naɓala nənəu chi ah tsing nə nyi-nyiu la pai sə niu leivanə hyun-nya irəu hyua nə uh yila nə. ¹⁴ Tangsa nəngah ɓiha, lan tangsa nyi-nyi daɓa ah ɗuiye leu, yimuaka tangsa lei mua hang nə ɓankə. ¹⁵ Nə hyuima chue nəngnə hyiwau yang, ta ta nau nəng-aɓai veu la kuɓa na'iu. Nə uh leeh yang, ah mua kuh hyuima ɓəng. ¹⁶ Nə uh leeh leun, ɗə yivaka tsing ko na'iu ɓa ta chuahaiyang, kənwa leivə na'iu kon nadta ɨng na nwama bi dəɓa narə nə. ¹⁷ Nə uh la bə leeh lein, ɗə biɓə ah takə kom gu Fih, nə uh la bə leeh kom gu Fih laɓəng, ah myem mu kə lei yuavah kon lei mua nwaɓi hyua. ¹⁸ Biagang dəmin naɓala, nəngnəha ɓa tsa fangwam mɨng, tsang ɗuiye laɓə, nəngnə ha biu fangwam yang ai biung yang ɗuiye. ¹⁹ Ɨng naɓa akala nə, leivə na'iu gwaha nwala bisi kon lei nəng ain gun, ain chue lei lan chue sə dam a ɗuiye. ²⁰ Manəngɓəng, bə leivə na'iu kon nadta nə gəmla tangsa imyang, mila tsngsa lei. ²¹ Nəngɓə Bitur wusə Yeso wu naula ah, "yichuevah bu na'uh hyuim chue kə nəngaɓai min mua min au la kəta? Sai bu hyui'iu? " ²² Yeso naula, ɨng naɓa la leu nakə bu hyui'iu ɓwasəu, bu hyui'iu buni hyui'iu, fi tsing. ²³ Manəngɓəng, vah ɗuiye la man yivah nə də yiɗi bə fa lei mongsem veu buchuem vei. ²⁴ Uh baniu bə farə, nəngɓə ai wukə mongsem akala dəu ɓiu nəng nwaɓi ho hyua. ²⁵ Bisi uh yaung ɓai nəngah nə uhn fakərə nə, yichuevah veu nah ah ai lya ɓaiu kə ɓa lei heiu, ɓa lei yiu ɓai nəngnə uhla ɓaiukə nə ai farə kə. ²⁶ Mongsem ɓə oh hyua ɓai ɗuang hyua chiu nah ah, yichuevah ɗə munyal ɓaim kə min falei nəngman faha. ²⁷ Yiochuevah və mongsem ɓə ɓa yiɓai veu nəngɓə nah ah, yeunah ai yafau hyem veu lan. ²⁸ Nəngɓə mongsem ɓə ta tə chi hyium mongsem aka dəu ɓiu yem denari hyuanhyua, nəngɓə uh gəm mu uh mua, ka nijui dəu nau ah fam nəngnə dəmin ɓiakərənə. ²⁹ Hyuin mongsem ɓə oh hyua langɓə də gurə wai uh də munyal rən faunfa langɓə. ³⁰ Mongsem ah nachi ɓə la nəngɓə uh taukə təu le bursəna ah sai nəu farə nəngnə dərə ɓiukərənə. ³¹ Nəngɓə lei hyui mongsem ai ɓa nəngnə də tarə nə, yua lei ɓankə, nəngɓə ai ta tai nakə yichuevah vaila nəngnə də tarə nə. ³² Nəngɓə yichuevah vai mongsem ɓəɗubu nau nah, " mongsem aɓai ɨng yafa yem mala bisi ah gum yang. ³³ Yang a ba a yafa kə yuimala mongsem la laɓə kon bi nə ɓakə yiɓai manə wai? ³⁴ Yichuevah veu ɓankə hyua, nəngɓə uh ɗjau nalei də yiɓai ah ai deu yiɓai laɓə sai nəu fanəngnə dəri ɓiukənə. ³⁵ Manəngɓə dam ɗuiye ɨng chue ɓakərə, nəɓa yafa kə lei hyuiɓala tangsa nyi-nyi ɓai langɓə leun.