¹ Wukə vi kə Yeso tənkə bə nabi kə lei mongsem vou, uh yilei bəbi təɓen tei nwa bivə Fih ɓai bə nyinasə nəng tangsa hua vai. ² Susuenə, Yohanna tangsa bursəna leeh lei nwatsum və kristi, tsum nwatsum kə lei mongsem vou la. ³ Uh nalei nah, ai ɓiu, " makə yivənə ai nah də man wurə nei ko ɓi mii yivakai?. ⁴ Yeso gwa lei nwa də narə nah, " ta təɓa nakə Yohanna la nəngnə ɓa leeh ɓai anə ɓa ɓanə. ⁵ Lei gɓamnɨng də ɓabə, leivə uwakabu də horə, lein blai chi larə, lei gɓamchui də leebə, leivənə ɓuinə ai chi hunnrən, leivənə nəng yaung naleh ni ai chi nəng yang. ⁶ Barkan avə yivənə chue nɨngaɓai leu nə. ⁷ Leivənə pai, nəngɓə Yeso də nalein jung ɓə bivə Yohanna, ɲɓatsin a ta ɓənvu taman ɓarə- lei nəngnə yua wa də yaurənə?. ⁸ Ɓatsin ɓa ta baifa təɓan ɓarə-yivənə yanɨng səu ɓuiola nei? manəngɓəng leivənə yang nɨng aɓuirə nə leivah və yivah. ⁹ Ɓa ɓa ta baifa təɓa ɓa- yivə ta nwatsum və Fih? mmmh, dimin naɓala uh pai yivə ta nwatsum və Fihn ma. ¹⁰ Yivənə chue nəng bivou nə nah, " ɓa, dimin tsum mongsem mi chi ɓai, yivə nə wun maɓa nəng-gah lanə. ¹¹ Dimin naɓa biagang la, tangsa leivə chirə və yihei nə, yivaka yaung pai Yoohanna huemɨng, yivahan ɗuiye paiu yang. ¹² Baniu vi və Yohanna wukə susuenə, vah Fih ɗuiye chue yiɓai ɓai yurrəh, leivə chuye yiurəh də deurə tangsa samɓai. ¹³ Leivə ɓanɨng ha ɓaleivə tei nwa, ai tei nwa səun kə Yohanna wu. ¹⁴ Nə ɓan muan-muang uh kə Iliya nən wurə nə. ¹⁵ Yivənə la ɓai ɓwachui leehrəu, leeh. ¹⁶ Ɓa min nyi kə fangwam ah susue nə? ɓaman leimuang də tsanəng lomu, nə kun də ɗubu hanə. ¹⁷ Də narə, " dəɓi iɓa kyi la ɓa ɓwadanleu, ɓi bazhi ɓa tata leu. ¹⁸ Yohanna wu tangnɨngtang leu uh nwa mɨng inabi leu, nəngɓə ai nanah uh la ɓai yua kə. ¹⁹ yi yiovə wu də tangnɨng də nwa mɨng nə ai nah ah, " ɓa, yivə tangnən kpala, ɓai lei nwamɨng kpala ɗji lei mua nwaɓi hua ɓalei chue nɨng aɓai, yiurə də chue kita kuh nəng chuenəng veu. ²⁰ Nəngɓə Yeso baniu bə nabi tsala kuh vahn gahnə, lei nɨng aɓai də chue la kpala nə, ai mua nɨng aɓai ɓa aikəta leu. ²¹ Tən ɓalang Chorazin, tən ɓa kən Bethsheda, nə lei nəngaɓai ahn gah chuesə tangsa Tyre ɓai Sibdon kuma lan tangsa ɓan, ai mhyem kulei sə nɨngaɓai tangsa nɨnga yasə ah hyanrə ɓai veuɗua. ²² Ɲchue kə hua Tyre ɓai Sidon kə hiun vi kita. ²³ Ma Kafarnahum, də man kem ɓaman ai dahkə nəng aka ɗuiye? Ah-ah eih wukə hua Hades. Tangsa Sidon wu chue lei nɨng agang nə chuesə tangsa mainə, uhn ku manɨngɓə uhn wukə lya nə. ²⁴ dimin naɓala, ɨng ta'nh kə Sodom lahyui ma kumai vi chue kita və Fih. ²⁵ Vəɓi Yieso na nah, " nkah Dah, yichue vah ɗuiye ɓai hua kə, bisi a ma lei nɨngnə ha tangsa bə ibə nɨng mai, ah pai kə leivə nə ai nyilei nah la leu nə, ɓaman leimuang a hang. ²⁶ nmmh, Dahm hihiung nɨng mai. ²⁷ Lei nəng ha wusəm lan sə Dahm, yivə yaung ieh yiɓi nən dah ɓileu, yiva ka yaung eih daɓi nəu i yi ɓəleung, yivənəha yi ɓə chi də yiɗi bə wula. ²⁸ Wusəm, ɓaleivə nəng aɓai, min dəɓa hunrə də. ²⁹ Də muirə ɓim kuɓah ɓa nyinənsəm, bisi min yivə nyi-nyi a ɓai leu, ɲ ah ta'nh ɓai hunrə. ³⁰ Muirə ɓin tətəng, yiɓai ɓin garangrang.