¹ Shawulu ti po teere in ti dewo gun muronii. Nang darangno teere kennen illina kping ti shik an balla ti Urshalima; nang me an ballai in wakyo taaju ti kubuk Yawuudiya kan Samariya kanani me an kaawi. ² Shwiji me an shewo yamma in wa nannu Itipanush in bau kennini kping. ³ Pene Shawulu liya kunni ta daklo an balla. In ti riyyo ta mina- ta mina in ti tolluru shereb kama shwiji in ti liyyina ta mina muruk. ⁴ Me wakyaa taajui in shuun toom ka kaawo paaroi. ⁵ Pilibush in warni Samariya in wa kaawon paarono Kiriti. ⁶ Jimo memme in ti li shikju ta yaaro wee ye Pilibush ti po sheerani; ka poshaari dok in ti yaaro shii, in we shik we shuklo ye shii yuwaa. ⁷ Shoom yen piire in ti pepittu ti shik me kan te, in ti yallilla ka elen bang, me shoi kulani in tassho shinui. ⁸ Nang ka beere yen gbo ti tarang minai. ⁹ Pene ka manni niyoi ti tarang minai shommonii Shimon, shii an gunul; ti shuk we maam ti me ti Samariya ya shii manni wei. ¹⁰ Me ti Samariya ding, la kan mungbo, in ti yaaro shii; shinui ya, "La moo tei bang no Yamma ye ti ye ka yen gboi." ¹¹ Ti yaaro shii longku shii ti yuun we maam ka bi won ti shinui ka gunulni. ¹² Pene bara ye kunnga kan Pilibush longku kaawo paaro shinnyin tomon ti ku minano Yamma kan shommono Yeesho Kiriti, in yuun yulma, shereb kama shwiji. ¹³ Koo Shimon po kuuni in kumi, ka bi ye yuwaan yulma in deeni ti jeleno Pilibush koo dimin. Bara ye shii weyaa shik we shuklo kama we gbidino ti yooro shii in ya maam kping. ¹⁴ Bara ye me an kaawi ti Urshalima yaara ya me ti Samariya yikka Paaro Yamma, in shuran gunno Biiturush shinan Yuwaana. ¹⁵ Bara ye shinui shaana, in furfok ti kuujui ya mo shinui yiu shoomno Yamma. ¹⁶ We war koddi teere, shoomno Yamma tidangi shaarin ti kuujuim; yuwan yulmai ti ta shommono Fo-mina Yeesho. ¹⁷ Nang ma Biiturush kan Yuwaana in liin kira tikuujui, shinui nang in yiu shoomno Yamma. ¹⁸ Nang bara ye Shimon weyaa ya ti we shoomno Yammai ka li kira me an kaawi ti ta ku, in min kine ta shii. ¹⁹ Shii ya, "Ma minno kumen te sheeno, longku manaa liya kirano ta kuuno koo nong in yooni kan shoomno Yamma." ²⁰ Nang Biiturush in liginon ti shii ya, "Kineko ding kan kei ma mutto won, longku ke nyimmaa pil kunnguno Yamma ka kine. ²¹ Ke kan aa ti ta shuran tem, longku poshaarikoi dok kan Yammam. ²² Longkuno te for fokko ka shek te ken furafokko ti Fo-mina, kulang shii in fuddoko ka peen nyimmo ye ti po shaariko te. ²³ Longku ne weyaa ke kemi kan mwisshi birang ke kpakki kan shasshalau." ²⁴ Shimon in liginno ya, "Furfokko ti Yamma longkuuno, longku we ke teka ye ding a ta weenom." ²⁵ Bara ye shinui jimraa in ya paarono Fo-mina, Biiturush kan Yuwaana in meeju Urshalima, in ti kaawo paaro ti meno-mina me ti Samariya. ²⁶ Wende Malaikano Fo-mina in ya paaro ti Pilibush ya, "Illo ken deeroko ka koko ye waraaro ka Urshalima we war Gaaza."(koko tei isshii.) ²⁷ In illina ta shii in koona. Ti po teerei in we niyo Etopiya, mon gbo ti ta gubno Kantish, tei gub Etopiya. Shii an geren ku birma. Shii wanna Urshalimai ya wawo. ²⁸ Ti ku meerini mina ti ta keke gurung, in ti maaro alak ballano an-pigro Isheya. ²⁹ Shoom in tewi ti Pilibush, "Neemoko nimmi kan kekei." ³⁰ Nang Pilibush in toollo, in yaanna ti ku maaro Isheya an-pigro, in teli ya, "Ke ti peen wee ke ti maarai ya?" ³¹ Nang in liginon ya, "Ne ta penani ka yaa in mundok me teunom mi?" Shii nang in ye Pilibush mo riru jeleni ti ta kekei. ³² Shwiji moo ti ku maarani piree ya, "Tollaa shii kaa dinnyi ye ta warin po karani, ka galma ti kira mo an kul shok shigi yittiti, a au ku foknim. ³³ Ti ta taa shilibni in forin shiirei ti kuunii. Ta dum sheero pi po peenni nong? longku sharan kerangni ti kubuk." ³⁴ Nang mon gbo moo in tel Pilibush ya, "Ne bengako , teuno an-pigro ye ta yaani paarono nong, kuuni ya, koo manni niyoi?" ³⁵ Pilibush in yiu ya paaro, in li guni ka maari tei in yuun paaro shinnyin tomon ti kuuno Yeesho ti shii. ³⁶ Kaa ye shinui ti ku mere ti koko, in waru manni po dooi nang mon gbo mo ya, "Gee, ka doo wono. Ta beelo po yuuno yulmai wen?" ³⁷ Pilibush in tewi ya, makaa kunnga ka po shaari dok, nen yuuko yulma nang in tewi ta shii ya ne kuunga kan Yeesho laano Yamma. ³⁸ Nang niyo Etopiyai in tewon ti me kan gurungi mo shero. In sha ta dooi ta shinui, Pilibush shinan mon gboi, Pilibush in yuun yulmai. ³⁹ Bara ye pennan ta doo ta shinui, shoomno Yamma in shokro Pilibush, nang mon gbo mo a wa shikknii birangum, pene in wanni mina in ti ya beere. ⁴⁰ Pene Pilibush in wa peri ti Ajotush in kpomlo po teere, in kpaalo paaro shinnyi tomoni ti gog minai ding we war Kaishaariya.