¹ Nang mo gbo ankpaa ya, "We tenei yen kulli ya?" Itipanush ya, ² "Mamolonno kan me an fowi, ma yaarono: Yamma mon kpang shukna shikni ti Ibirayim koddi ye shii ti Mesopotamiya,in tang waru Haran; ³ tekan ti shii ya, 'Wessho kubukko kan po peengo, ken war kubuk yeno ta shukko.' ⁴ "Nang in wesshuru kubuk Kaliyawa in wa deni ti Haran; ti po teerei, bara ye fowii muroni, nang Yamman warin ka shii kubuk te, pirinnee ma diin wendei. ⁵ Shii a minin koo we dok ka we po kuunim koo po tau sho. Pene in yuun kumen - koddii a kan la ta shiim - ya shii ta minin buki kan po peenni ye tawaru ka biinii. ⁶ Yamma ti ku yuun paaro ti shii ka tei, longku po peeni in la diino ti bino buk, ya me ti po teerei in yuun shinui shookju in minin shilibi po sheno shik peereu. ⁷ 'Pene ne ta ya shiire ti ku gog mina ye yikka shinui,' kaa ye Yamma teka, 'ka bi we te shinui ta waraa wawno ti po te.' ⁸ Nang Yamman min dewan ku paaaro kar kuwo, nang Ibirayim in yooni fonno Ishaaku in kar kuwoni ti ku darang an pididou; Ishaakun yooni fonno Yaakubu, Yakubun yooni fonma me shin kpumu gei palau ye. ⁹ "Digi mamolonii in ti mussho Yusubu, in pilin ka biini ti me ti Mashar; ¹⁰ nang Yamma ti biini in forin shii ta shilibi ding. In li Yusubu, Iriidush in kumi kan shii longku shenni ye Yamma minan, in li shii in yooni gobna Mashar kan ta minani ding. ¹¹ "Nang kpiyam in yiu kubuk Mashar kan Kenan, kan taa shilib, nang ma fowonmu kama a ti we wesshinam. ¹² Pene bara ye Yakubu yaara ya ka wesshina ti Mashar, in shur ma fowonmu kama mereju an dok. ¹³ Ti ku mereju an palawi Yusubun shuklon kuuni ti mamolonni, nang ta minano Yusubu in penero ti piree kan Pirauna. ¹⁴ Yusubun shur mamolonni mo wa tewo ti Yakubu ta fonni me shaarini Mashar, kan po peenni ding,shin naa-parlau kan fuwat ding ding. ¹⁵ Nang Yakubun shaarini Mashar, nang in muroni, shii kan ma fowonmu kama. ¹⁶ In sharu shinui we war Shekem in wa li ti ta duwo ye Ibirayim pilaa ka kine ti kira shibono Haamor niyo Sekem. ¹⁷ "Ka ye koddi kumeni foonna, kumen ya Yamma yuwaa ti Ibirayim, memmen fiina ti Mashar, ¹⁸ we war koddi ye manni gubi illa yei peno Yusubum. ¹⁹ In dokko memme mu kama in li ma fowonmu kama wessho nyitti shiboju longku in muttoju. ²⁰ "Ti ta koddi teere in patton Muja; Shii illo kpang ti toomno Yamma in ti kang shii ta minano onni. ²¹ Bara ye wa vingna shii laano Pirauna in sharu shii ta tei in shiwon laaro. ²² Muja in ya maarini ti Mashar, shii in ya shen kpingkan bang ti ta shuranni. ²³ "Pene ka ye foora sheno naa-peereu, in nyimmo waraa kaa ma molonni, shibo Ishreeila. ²⁴ Ma ti we la Ishreila ti ku mini shilibi,Mujan mol biinii in tuk niyo Mashari: ²⁵ Shii nyimma ya ma molonni ta penani Yamma ta shau shinui ti ta kirani pene a peno ta shinuim. ²⁶ Ka pirbang in we niyo palau ti ku ya nee in leu ri taajui in tewon ti shinui ya, 'Shwiji, mai molon shaai; ma ta li pira ti shaayi longku wen?' ²⁷ "Pene mo yollaa molli in shen biinii won ya, 'Liyaakei nong ti kumui ken yooko an gub kan an shiirei? ²⁸ ke leka tukno kaa ye ke tukan niyo Mashari da?' ²⁹ Mujan shemo ka tuuloni bara ye yaara we te; in yooni bino ti kubuk Miyan, pirinnee ye pattaan shibo shwiji palau. ³⁰ "Bara ye sheno naa-peereu kooka, Malaika in we shii ti ta shwee ye ti sheela Sinaai, ti ta dak deet ye ti shik shojilak. ³¹ Bara ye Muja weyaa shik deeri, in ya maam kping ka weyan shigi; ka ye shii giika nimmi ka we geyani ele in peru ti shikno Fo-mina ya, ³² 'Nei Yamma ma fowongo, Yammano Ibirayim, kan Ishaaku, kan Yaakubu.' Gbob-gbob in yiu Muja a dum ya geem. ³³ "Nang Fo-minan tewon ti shi ya, 'For taa ta shoogo, longku piree ke sherini buk yen shaana. ³⁴ Kulli ne weyaa shik peen shilib ye memmeno ta shaani ti Mashar; Ne yaaraa binajui, Ne shaanai shau shinui; wende waru Ne ta shurko ti Mashar.' ³⁵ "Tenei Muja ye kurojui, ye teka ta shinui ya, 'Liya kei nong an gub kan an shiireti kuumui?' - Nang Yamma shunna shii ka in yooni gub kan an marku. Yamma shunna shii ti ta kira Malaika mo shukna dooni ti Muja ti ta shwee. ³⁶ Mujan peron ka shinui ti Mashar, ka bi ye yuwaa we maam kan shuklo kan ti shiiruk shwee sha-po-gurung, kan ti ta shwee posheno naa-peereu. ³⁷ "Wo Mujai ye teka ti memme Ishreeila ya, 'Yamma ta shokro ma manni an-pigroi ti shakki ma molonma an-pigro kaa ne.' ³⁸ Tenei niyo ye ti ta shwee kan Malaika ye yuwaan paaro ti sheela Sinaai, ye ka shaayi kan ma fowonmu kama, ye yinna paaro ye kan dooro in min mu kama. ³⁹ "Pene ma fowonmu kama in kuroju murku ti Yamma; in kai biinii ti piree kan shinui, ti po shaariju in meeju Mashar. ⁴⁰ Koddino teere in tewi ta Aruuna, 'Yumu yamma ye ta koo toommu. Maa kaa sheno Muja ye pennanmu ti ta buk Mashar, minaa peno wee ye weyaa shiim.' ⁴¹ Nang in limmo la bulum tanga ta koddi in wa minin ding ta kiraju, in ti ya beere longku shuran kiraju. ⁴² Pene Yamman wessho shinui in ti waw arshal kudang, kaa ye balilii ti ku alak me an pigro, 'Ma ta minnoi kuma we kan min ding ta kira po sheno naa-peereu ti ta shwee ta mina Ishreeila? ⁴³ Ma yikka minano Molek kan arshal yamma me ti Reepan, kan jirim ye ma ti wawi: nang ne ta shar ma we wal Babiila.' ⁴⁴ "Ma fowonmu kama kan mina we nyimmani ti ta shwee, kaa ye Yamma tekai koddi ye yuwaa paaro ti Muja, ya mo limmo ye shii weena shigii. ⁴⁵ Ka bi, ma fowonmu kama, ti ta gunno Jesshuwa, in yiu mina wawo in warin ti shinui koddi ye yikkan buki. Yamma yikka buki ti kira me diin ti kwi in kai shinui ti toom ma fowonmu kama. Mina wawo in diino we war koddino Dauda, ⁴⁶ mo weyaa lewanno Yamma, nang in teli koo shii ta we po diyo ti Yammano Yaakubu. ⁴⁷ Nangi Sholomon ye digo mina Yammai. ⁴⁸ "Pene, mo ti kudang ding a ti diino ti ta mina ye niyo digom, kaa ye me an-pigro teka, ⁴⁹ 'Kudangi po diyo gubno, kubuki po gal shoono. Ma ta dignoi peen mina ye kaa shire? kaa ye Fo-mina tekai, koo po nesshonei ti tong? ⁵⁰ We te ding yuwaai kirano maa?' ⁵¹ "Ma me an bang ku, mei looba ti po shaarima kan kumoma, ma ti kura shoomno Yamma; ma ti yai kaa ye ma fowonma yuwaai. ⁵² Wo an-pigro shire ye ma fowonmai minin shilibum mi? Tukyaa an-pigro me penna ti toom mon kpang ye ta waruii; wende man shiwoma an ke ta biinii kan me an tuk shii, ⁵³ ma ye ma yikka shoro ye Malaika minaa, pene mai yiu bim." ⁵⁴ Nang bara yeme an galoi yaaraa we te, in ri poshaariju kping, in ar okju ti shikno Itipanush. ⁵⁵ Pene shii, kemi kan shoomno Yamma, in muuro kudang in we shik kpangno Yamma; in we Yeesho sheri ti ku kira temmeno Yamma. ⁵⁶ Itipanush in tewi ya, "Ma gee, ne weyaa shik kudang akaro, la niyon ding sheri ti ku kira temmeno Yamma." ⁵⁷ Ti kuuno te me an galoi in gballo ta kumoju, in ti yallina ka elen bang, shinui in gal biinii ka po shaari dok. ⁵⁸ In tollo shii in peron ta bi mina in yiu kpailo shii. Me an jimro foki in gal lannaju ti kira manni la kparini shommoi Shawulu. ⁵⁹ Kaa ye ti ku kpailo Itipanush, shiin ti ye Fo-mina ya, "Fo-mina Yeesho, yiu shoomno." ⁶⁰ In tumoni in ye ka elen bang ya, "Fo-mina mo ko liin we te ti kuujuim." Bara ye teka kaa te in muroni.