¹ Wende ti shaklo te, bara ye gbe me an balla in ti yooro toom, paaron illiru ti kira Yawuudawa meti Girka ti ku Elenawa, longku shereb koloju a ti we wee ye ti bwaannaim. ² Nang me shin kpumu gei palawi in ye digi an ballai in tewon ya, "A yu kpangum kaman wessho kaawo paaro Yamma shommo wesshinam. ³ Ma shakko mamolon shin parlau ti shakkima, me kan po shaarin kpang me kemi kan shoom pen we ye kama ta liyani ti kushuran te. ⁴ Kaa shemu , min ta shuun toomka furafok ka kaawo paaroi." ⁵ Paarojui yuwaa kpang ti memmei. Nang in shak Itipanush, niyo ye kemi kan kumen kan shoomno Yamma, kan Pilibush, Prokaarush, Nikano, Timon,Barminash, kan Nikolosh niyo Antakiya. ⁶ An ballan waru ka shinui toom me an kaawi, shinui in furanfok ti kuujui in lin kiraju ta kwi. ⁷ Nang paarono Yamma in yiu fu ta piri, nang gbe me an balla in ti yoorotoom kping, gbe me ankpaai in min kumenju. ⁸ Pene Itipanush, mo kemi kan kuungu kan bang, in ti ya we maam kan shuklo ti shakki memme. ⁹ Pene manni la woran memme me ti ye kuuju ka me ta mina wawono Firedman, niyo Siyarin kan Alejandiriya, kan peddi ti Kilikiya kan Asiya. Shinui in ti deppo paaro kan Itipanush. ¹⁰ Pene shinui a ti dum sherani ti po pen paaroma Itipanujum. ¹¹ Nang in min we ti memme ya mo tewo ya, "Min yaara Itipanush yuwaa daklan paaro ti kuuno Muja kan Yamma." ¹² Nang in shuulo memme , men gbidino, kan me an ya balla, shinui in kuuno Itipanush in yiu shii in warin toom galo. ¹³ In waru ka shaba ti kuuni ya , "La moo a wejo ya paaron daklan ti ku po wawo te kan shorom. ¹⁴ Longku min yaara shii ya Yeesho niyo Najeret ta vubro bi mina te in shiwo shik we waar ye Muja minamu kama." ¹⁵ Me deen ti po galoi ding in ti muuro shii in we adoi in yooro ka we Malaika.