¹ Wende ka manni niyoi shommoi Ananiya, kan mannani ta Shabratu, in pili ka bi we kiraju, ² nang in latto peddi kinei(pomunni penaa guni), in warin ka digi in wa liin ti toom me an kaawii. ³ Nang mo Biiturush ya, "Ananiya, duma weyaa shuro riyaa po shaariko ka te ken ya shaba ti shoomno Yamma ken yiu peddi kine ye ke pilaan buki ti bi ya? ⁴ Tidang kei pilinum a weko ma, ken pilin ka bi a ti ta kirako ma? Penei longku wen ke yuwaa peen nyimmo te ti posheerigoi? Ke yuwaa shabai ti niyom, ke yuwaai ti Yamma." ⁵ Ananiya ma ti yaanna kaa te in shukno in muroni, nang shewo kping in yiu me yaara gun we te ding. ⁶ Nang shibo kparin in wa shar shii in wa nani. ⁷ Ka bi ye la nessha, pomunnii in riru, a peno gun wee ye yuwaarom. ⁸ Biiturush in tel tei ya, "Tewno ma pilaan ka buk mai ti ku kine ka leiyaa." Tei ya, "Oo,kaa tei." ⁹ Nang Biiturush in tewon ti tei ya, "Duma ma kuunga kaa tei ka yaa ma ta nau shoomno Yammai? Gee, sho me nanna mannaji ti podangi, shinui ta sharji we per pewe." ¹⁰ Nang kpantidi in shukno ta tei ti toomnii kumai. Bara ye shibo kparini rina, in wa we tei kumai, in shokro tei in wa nani nimmi kan mannaro. ¹¹ Shewon kulli in yiu me an balla kan ding me yaara guni. ¹² We maam gbe in ti yooro ti ta kira me an kaawi. Galii shin ding ti piree ye ti ye ka koko ri ta minano Sholomon. ¹³ Pene digi memme a doo bang vurum war jelejuim; pene memme minaan gbe ti shinui kping. ¹⁴ Me an yiu biino Fo-mina in ti tokko shaariju, shereb kama shwiji, ¹⁵ in ti shar mei bangum in liyyon to kogoi ti gburam kama irau, longku Biiturush ma ta kowani, luknini in war ku peddiju. ¹⁶ Memme gbe wakinna ti gog mina ye kpomlii kan Urshalima, in ti wakuntu ka mai bangum kama me sheebuk yikka in ti tassho shinui. ¹⁷ Nang mon gbo an kaawii in illo shikni, kan me ka shaai kan shii (yei shinui Sadukiyawa); in yooju mwishi kping ¹⁸ in li kiraju ti ku me an kaawi, in li shinui ti ta mina muruk. ¹⁹ Nang ka yippo Malaikano Yamma in appo po dang mina muruki ding in perin ka shinui pewe in tewon ya, ²⁰ "Ma koo, man wa sheri ti mina Yamma man ya paaro kerang te ti memme." ²¹ Bara yeshinui yaara ka te, in ri ta mina Yamma ka shaat in shubet. Nang mongbo an kpaai in waru kama me an biini, in ye galo me gbidino Isheereila ding, in shuri ti ku me an kaawi ti ta mina muruki mo warin ka shinui. ²² Pene me an toom ye waraai an waan shinui ti ta mina murukim, in meeruju in wa teu guni ya, ²³ "Min wa weyaa po dangi nummani me an gereni shengrin ti podangi, pene bara ye aka podangi, minaa waan niyo ti taaim." ²⁴ Bara ye an toom mina Yammai kan an toom me ankpaa yaara paaro te, nyimmojui in shokroro ya we tenei ta yooroi ka yaa. ²⁵ Nang manni niyoi in wa tewon ti shinui ya, "Ma niyeme ya ma liyaa ta mina muruki shengri ti ta mina Yamma in ti ya shubet." ²⁶ Nang an toom mina Yammai in wanna ka me an bee deet, in meerin ka shinui a ka bangum longku shinui ta shiyani ya yo kpalyoju ka sheela. ²⁷ Bara ye wannan ka shinui toomju. Mongbo an kpaa in tenglo shinui ya, ²⁸ "Min beela ma kping min ya ma wejo shubet ka shoom tei, pene wende ma kennga Urshalima ka shubet ma man ti yeeru domno la moo ti kuumu." ²⁹ Pene Biiturush kan me an kaawi in liginno ya, "Yikka ti gbare do min ya shuranno Yamma ti ku she niyon ding. ³⁰ Yamma ma fowonmu shokra Yeesho, ye ma tuka ka loo shii ti ku gbong biro. ³¹ Yamman shokro shii ti ku kira temmeni in yooni la angub kan an marku, in min kelmo ti Isheereila kan fuddo shasshalau. ³² Minui an jimro we te gale kan shoom,ye Yamma mina ti me ti yiu bi eleni." ³³ Bara ye me an galoi yaara we te, in yooju den kping in leu tukyo me an kaawii. ³⁴ Pene manni niyo Parishawai shommoi Galiyel, shii an shubet shoro ye memme ti mina gbe, in shokro shikni in li ya mo peron ka me an kaawi pewe tidang. ³⁵ Nang in tewon ti shinui ya, "Memme Isheereil, ma diro kpang wee ma leka yaani kan ma niyo me. ³⁶ Ka manni koddi, Taddewush illina ya shii manni wei, memme gbe in yiu biinii ye foora shik peereu in yiu biinii. Bara ye tuka shii, me an yiu biinii in legreju waani. ³⁷ Ka biino shurmei, Yawuda niyo Galili in illina ti ta koddi maari in tol memme ti bini. Shi maa in muroni, me an yiu biinii ding in legreju. ³⁸ Pene wende ne tekama, ma wessho ma niyo me waani, we tene maa shuran niyon ding, ta wiiloroi waani. ³⁹ Pene ma shuranno Yamma ma ta dum kai shinuim; ma ta dangwe kuuma ta gei kan Yamma." Nang in kumi ta shinui. ⁴⁰ Nang in ye me an pigroi ti ta mina in yuun biro-biro in tewon ya mo wessho ya paaro ka shommono Yeesho birangi, in foran kira kashinui. ⁴¹ In wejo po galoi ta shinui in ti ya beere ya shin foora potaa shilibi ti ku shommo te. ⁴² Ka bi kpaaliyo ding ti ta mina Yamma kama ta mina- ta mina in ti ya shubet shinnyi tomon no Yeesho Kiriti.