¹ Kaa ye ma Biturus kan Yuwaana ti po ya paaro kan memmei, me ankpaa kan kaptin ye ti ta mina aboi kan Shadukiyawa in war kuujui. ² Ta aajui ɗakklani kping longkunee ma Biturus kan Yuwaana ti ku ya shubet ti memmei in ti tewi ya ilit ta duwoi ti taano Yeesho. ³ Nang in yippo shinui in li ti jeleju we war kpaaliyo, longku yippo yuwaaro. ⁴ Pene memme gbe ye yaaraa paaroi in min kumen; gbe me kunghai foora dubu fuuwat. ⁵ Pene ka kpaaliyo ta piri me an toomju, men gbiɗino, kan me an ya ɓalla in gali ti Urshalima. ⁶ Anas Mon gbo an kpaii ka shi, kan Kebas, kan Yuwaana, kan Elekjanda, kan ma molonno an kpai ɗing. ⁷ In li ma Biturus kan Yuwaana ti toomju, in tel shinui, "Wo ka ɓangno nong, ko ta shommono nong, ye ma yuwa we ti?" ⁸ Pene Biturus, ye kemii kan shoomin shaana, in tewon ti shinui, "Ma me antoom memmei, kan men gbiɗino, ⁹ mamaa ta gassho shoomui longku ween kpang ye min yuwaa ti mo an ɓaushik te, kan ti ku wee ye min tasshaan shii, ¹⁰ Ma peno ma kama Ishraila ɗing la moo ye sherii ti tooma kan ɓangnii ti ta shommono Yeesho Kiriti la Najeret, ye ma tukai, pene Yamman pigro shii ti ta duwo. ¹¹ Yeesho tenei,shii sheela ye me an diye kuraaye tei yuwaaro ku shuglo minai. ¹² A doo we marku ti kira manni niyoi dokrom,longku ti shakkishommo ti gun kudang teye minna ti shakki memme te a doo yetamar mu kuumu kamam. ¹³ Bara ye shinui weyaabang vurumno Biiturus kan Yuwaana kan in jemilla ya shinui a yiu shubet maarim, kan shinui in nyimmina ya shinui diyookanYeesho. ¹⁴ Pene kaa ye shinui ti we shik niyo ye tasshaa sherii tipo tere kan shinui,a doo weeshinui po tewanim. ¹⁵ Ka biinee ye kayaan shinui ti toom me an galoi, nang shinui deppina ti shakkiju. ¹⁶ Shinui in tewi ya "Kama ta yana wen ka ma niye mei? kama penaa yuyyaa gbidino we ta shinui ye memme ding penaa ta me dii ti Urshalima ding; ¹⁷ kamai ta jimranim. Pene longku wei a ta shooro toom ti shakki memmem, yikka ti gbare-do kaman pegro swiji me mo wessho sheero paaro ti niyo dok ti ta shommono Yeesho birangi. ¹⁸ Nang in ye shinui in pegirra mo wessho ya paaro ko shubet ti ta shommono Yeeshoi. ¹⁹ Pene ma Biiturus kan Yuwaana in liginno ya, "ma shiiro kuuma, mo min gbei ti Yamma ya? ko ti ma?. ²⁰ Minui ta dum tooro kuumu ka wene ye min weyaa shigi minin yaannam." ²¹ Ka bi ye tolaa kumoma Biiturus kan Yuwana, in foran kira ka shinui. A wa we ye ta liin kelmo ti shinuim, longku memmei din ti ku kum pinno Yamma longku wee ye yuwaaro. ²² La mo ye tassha ka we maami shenoni yeka bang naa-pereu. ²³ Bara ye foraan kira ka shinui, ma Biiturus kan Yuwaana in meeju in wa sheero wee ye mon gbo ankpaa teka ding ti memmeju. ²⁴ Bara ye shinui yaara we te, in shemo ka shokro eleju ti dik ka we forfok ti Yamma ya, "Fo-mina, ke yuwaa kudang kan kubuk kan paali, kan wee ye ti taajui ding. ²⁵ Ke yuwaa paaro ti ta shoomko ti ta fokno shookko, fomu ta Dauda, 'longku wen me ye yawuudawam yuwoju denii, po memmejui in ya nyimmo wenen waanii?' ²⁶ Ken tewi, 'Me an-gupp kubuk in gal kuuju, Shinuii in gali kuuju ka kenne ti kuuno Fo-mina, kan kuuno Kiritini.' ²⁷ Kulli, ma Irridus kan Bilaatus, kan mei yawuudawam kan memme Isherela, gala ti gog mina tei ti kuuno Yeesho, ye ko shiddo shignii. ²⁸ Galan kuujuii longku ya we ding ye kirako kan we ke nyimma yaani ti toom ye ta yooro. ²⁹ Wende, Fo-mina, gee leu belomu ye leka ta shinui ken min mu bang shik ya paaroko. ³⁰ Shoru kirako ken tasshomu ken shuglomu we maam ti ta shommono la an shaanako ta Yeesho." ³¹ Bara ye yuwaa foraa-duloi, pirinnee ye galan ta shinui in middo shikro, shin din in kemron shoom na Yamma ti taajui nang in yiu ya paarono Yamma ka bang shik. ³² An gbe me kuunga kan Yamma po sheeriju dok. A doo mo ti nyimmina ya wee shikan tei weeni shi doknii, penei weeju shin ding. ³³ Kan bang shik me an kaawi in sha tomm ka kpaalo po jimro ilitno Yeesho Fo-mina, nang kuunguno Yamma in sharin ti kuujui ding. ³⁴ A doo mo ti ya kenni we ti shakkijum, mo kan doong kan mina in pilin we in warin ka kinei ³⁵ in wa li ti toom me an kaawii, shinui in ti temyo piri ti ko nong ka ye muyei lekan. ³⁶ Yushubu, ye me an kaawi ti ye ka Barnaba (ye ya la an pee shik), la lawiyawa, niyo shipurush, ³⁷ in pili ka dongni in warin ka kinei toom me an kaawi.