¹ Ti Kaishariya ka manni shwiji shommoni Karniliyush, shii mongbo an bee deet ye ti ye ka gbumon ku Italiya. ² Shii kan ta minani jwal me an shi Yamma, in ti min kine gbe ti me an kenni, in ti furafok koo dimin. ³ Darang nan dok kaa pelle kettan darang, shii in we shik jirim Malaika Yamma in ti waru jeleni. Malaikai in tewon ti shii ya "Karniliyush!" ⁴ Karniliyush in ukko ado ti Malaikai shewon yiwi ya, "Wo wen, an shubet?" Malaikai in tewon ti shii ya, "Furafokko kan kuungu ye ke ti ya ti me an kenni amma shikno Yamma. ⁵ Wende shur memme we war Joppa in waru ka manni niyoi shommoi Shimon me ti ye ka Biiturush. ⁶ Deeni ti minano an lakat mo ye ka Shimon, ye minai ti po shiiruk." ⁷ Bara ye Malaika ye yuwaan paaroi kogoni, Karniliyush in ye shookni shin palau, kan shakki sooja dok me ti biini. ⁸ Karniliyush in tewon ti shinui ding wee ye yuwaaro in shur shinui we war Joppa. ⁹ Pirbang kaa pelle sheri darang, shinui ti ku mereju in nemru gokminai, Biiturush in ammo ku minai furafok. ¹⁰ Nang kpiyamin yiu shii in leu sha we, pene tidang ti ku ya wesshinai, in we shik jirim, ¹¹ shii in we kudang akaro manni gurangi in ti shaaru, manni wei kaa awan ta lanna in ti shaaru kubuk, yippinan ti gungkuli ding peereuwi. ¹² Ti tai peen lo peni-peni ye shoi pereu-pereu kan wee ti tolli ka gonghoi ti buk, kan adewe kudang. ¹³ Nang ele inyuun paaro ti shii ya, "Illo, ta Biiturush, yiu ke karu ken addina." ¹⁴ Nang Biiturush in liginno ya, "A kaa tem, Fo-mina; longku nei nau addo wee yen doonum kan yei ti ya shaanam." ¹⁵ Nang elei in yuuru paaro an palawi ya: "Wee Yamma fuddaa, mo ko yo doonum." ¹⁶ Yuwaa we te sho tat; nang in kuman tol gurangi we ammo kudang. ¹⁷ Kaa ye tida Biiturush turmoni kping ti ku wee shunai shuklaa, nang gee shwiji me shunna ta Karniliyush shengrin ti po dangi, ka bi ye shinui fuwa po tel gun minai. ¹⁸ In ya gbaaroo ya tenei minano Shimon, mo ti ye ka Biiturush duraa ti po te ya. ¹⁹ Kaa ye Biiturush ti ku ya nyimmo ka paaro shuna te, nang shoom in tewon ti shii ya, "Gee shwiji shin tat ta gassho biigo. ²⁰ Illo ke sha buk ken koon ti biijui. Wessho tuk koddii koon ti bi, longku ne shunna shinui." ²¹ Nang Biiturush in illina in shaaru in tewon ti shinui, "Nei shii ye ma ta gassho bii. Ma wannai yeen?" ²² Shwiji shurmen liginon ya, "Mongbo an bee deet shommoi Karniliyush, niyo ye ti shi Yamma, Yawuudawa ding in ti kum pinnii, tekan ta Malaikano Yamma mo shuru in wa yeeko ken war minani,longku in yaaro paaro ti fokno peemo." ²³ Nang Biiturush in ye shinui ta mina in shiwoju binoni. Pirbang ka shaat in illina in koona ka shaai, peddi an balla ye ti Joppa in koon ti biinii. ²⁴ Ka pirbang birang shii in fooro Kaisariya. Karniliyush ti po dang kuujui; yeyyina po peenni kama me an jere mereni. ²⁵ Kaa ye Biiturush riina, Karniliyush in kpom foki in shuwon ti toomi ka we waw shii. ²⁶ Pene Biiturush in shokro shikni ya, "Illo shikko! ne maa nei niyon ding kaa ke." ²⁷ Kaa ye Biiturush ti ku yuun paaro ti shii, in ri ta minai in wa we galan memme. ²⁸ In tewon ti shinui ya, "Ma po kuuma ma penaa shoromu a kumu Yawuudawan ri shakki mei Yawuudawam koo in war mina manni niyoi ti manni gokminai. Pene Yamma shukano ya no wejo ye niyo ka dooni koo moi fuddanim. ²⁹ Tenei longku yene wanna a doo jiramum mi, ye ma yeenanoi. Wende ne ta tel ma duma ma yeenanoi ka wen." ³⁰ Nang Karniliyush in liginon ya, "Boi bi shaklo peereu ka yege te, ne ti ku furafokno ka neke darang ti ta minano; nang manni niyoi sheri ta kuuno kan lannan pe wak. ³¹ Shii ya, 'Karniliyush, furafokko Yamma yaaraa, kan kuungu ye ke ti ya ti me an kenni yuwoju we nyimmoko ti piree kan Yamma. ³² Shuru ti Joppa, in wa yeeru manni niyoi shommoi Shimon mo ti ye ka Biiturush. Shii deeni ti minano Shimon an lakat ti po shiiruk.' ³³ Nang nen kuman shurani ti kuko. Yuwaa kpang ye ko wanna. Pene wende min ding galii ti toomno Yamma minin yaaro wee shii tekako ya ko teumu." ³⁴ Nang Biiturush in au fokni ya, "Kulli, wende ne penaa Yammai ti shuk kaalim. ³⁵ Pene ti leu memme kubuk ding me ti shiini in ya ween kpang ye shii po kumani. ³⁶ Ma penaa shuran ye Yamma yuuna ti me ti Isheereila, ye sheennan shinnyi kuttan shaari ti taano Yeesho Kiriti shii Fo-mina ding- ³⁷ ma po kuuma ma penaa wee ye yuwaaro, ye yuwaa ti ta buk Yawuudiya ding, wee ye yikka ti Galili, ka bi yulma ye Yuwaana sheeraa; ³⁸ wee ye yuwaaro ti kuuno Yeesho niyo Najeret, teman po shiddon shiknii ye yuwaa ka shoom yen Shaana kan bang. In ti kpomlo ta piri in ti ya ween kpang in ti tassho koonong ye sheebuk ti taajui, longku Yamma ti biinii. ³⁹ Mini an jimro we ding ye Yeesho yuwaa, ti gokmina Yawuudawa kan Urshalima. In tuk shii ta shinui ka loo shii ti ku gbong biro, ⁴⁰ pene Yamman shokro shii ti ku shaklo tat in li memmen we shikni, ⁴¹ a niyo dingum, pene ti me an jimro ye Yamma shakka shinui yau- kan minu me min shuwaa minin she kan shii ka bi ye illann ta duwoi. ⁴² Shii liyamu mo min kpaalo piri ti memme ya tenei shii mo Yamma shaka in yooni an shiire me kan doi kan me muroju. ⁴³ Wo ti kuuni ye an-pigro ding ti jimirrai, longku mo kunnga kan shii ding in yiu fuddo shasshalauni ti ta shommonii." ⁴⁴ Kaa ye Biiturush ti ku ya paaro te, nang shoomno Yamma in sharu ti ding me ti ku yaaro paaroni. ⁴⁵ Me kara kuwo poshaariju ti ta me kuunga- me wanna kan Biiturush ding- in ya maam, longku kuungu shoomno Yamma shaana ti ku mei Yawuudawam. ⁴⁶ Longku shinui yaaraa ti ku ya paaro ka dak peeni-peeni in ti wau Yamma. Nang Biiturush in liginno ya, ⁴⁷ "Ka mo ta beelo doo we ya yulma ti ma niyome ya, shinui me yikka shoom yen shaana kaa ye kama yikkai ya?" ⁴⁸ Nang shii in min kumen ya mo yuun yulma ti ta shommono Yeesho Kiriti. Nang in beng shii mo la shaklo ti jeleju.