¹ Ijesu me re aza ọkọni ẹnẹ, dọ shi rẹ nini irẹsufa. Ọmẹ yatu da, di eziafu aani vetụo. ² Dọ sha irenụ aani, dọ zụ wa isa, ka: ³ Ẹdabẹrẹ ọnọ vi yi aza na vi onriwa ini ifẹ, fụvọki ijọva ineekụ-ọiza vi ayi anini. ⁴ Ẹdabẹrẹ ọnọ vi yi ẹnẹnaa jorere, fụvọki Oshomoshi ve fụfụ wa. ⁵ Ẹdabẹrẹ ọnọ vi yi ẹnẹna nyi ivefu shẹshẹ, fụvọki ẹni ẹnẹ vaa ri ọgụ ẹshẹ. ⁶ Ẹdabẹrẹ ọnọ vi yi ẹnẹni ungwẹ aa kụ ọnri ẹnẹni onyi aa kụ fụvọ irẹiza ọmimẹ, fụvọki inẹ vaa sha wa. ⁷ Ẹdabẹrẹ ọnọ vi yi ẹnẹna nyi ayụva, fụvọki e vee re ayụva dọ. ⁸ Ẹdabẹrẹ ọnọ vi yi ẹnẹnọ vi ki ẹ nyi ọtụtụrụma ọnini, fụvọki e vee re Oshomoshi. ⁹ Ẹdabẹrẹ ọnọ vi yi aza enee ji irazi, fụvọki ezi Oshomoshi ana vaa shụ wa. ¹⁰ Ẹdabẹrẹ ọnọ vi yi aza anaa mụya ri fụvi isẹnẹsẹrẹ, fuvọki ijọva ineekụ-ọiza vi ayi anini. ¹¹ Ẹdabẹrẹ ọnọ vi yụ wụ, aza ra kụ ụ ụfụ, dẹ mụya rụụ fụvi ọdọwụ awụ, ọnri dẹ ka irẹyi ọshimi ana vi apinẹ shụ wụ fụvọ ami, ¹² Jụjẹ, di inẹ awụ oshine kokoro, fụvọki ọgụ ọbani yi ineekụ yụ wụ. Avọ amẹ si ụya ri ọkisẹ nin ana vidi vẹ tụ wụ nini fuvọ ọdọwụ. ¹³ Ẹwụ nini ọ vi anọ yi ẹshẹ. Ama anọ ra si ụshine aani neta, sa va kụ si mẹ kọ varama shine kẹ? Ọi kụ nyi isa va zụ siọ mẹ fụni ka va shaa, dạ kụ afụ shio. ¹⁴ Ẹwụ nin ọnọ vi ọpa yazạ. Irẹkụra ana yi ini irẹsụfa ọ ma zụ si ẹngwụ tẹ. ¹⁵ Ọza me fụ ọpa, da si uji kụo, ama da si ọ gẹ ọchi irakọ-ọpa, dọ si ẹtofei yi aza ana ineeshi. ¹⁶ Navọ di ọpa awụ nini ọ za inọvidi aza, dẹ zụ re ụkọrọ ọiza awụ nin, doti ẹ zụ sụga yi Ada awụ nini ana yi ineekụ. ¹⁷ Asụụ ro ki ma vẹ ve dụ ofi navẹki ọkisẹ nini. Maa zi vẹ ki me ve dụ wa sha, ma vẹ ki ma va sụ wa vi ini ọmimẹ. ¹⁸ Irẹiza ma kaa yụ wụ nini ka, poro di ineeku ọnri ẹshẹ ọ parafụ, ọ zi nyi irẹyi ọchi ọnya ana va ji sha ini ofi vụvụrụ, ama ọn bo vaa sẹ. ¹⁹ Fụvavọ ọzatụrọza ene re dụ, ene weyi fụ keekere ini ofi ẹnẹni, dọ zẹ zụ aza nini ki ẹvọvọ mẹ, avaa shi ọzọnọ, ezene weyi fụ keekere ini ijọva ineeku. Ama ọza ana ra mẹẹ, dọ zẹ ka yaza nin, ọni ọnọvi ọza ana bani fụ bo ineekụ. ²⁰ Fụvọki ma ka yụ wụ nin kaa, ọọ zi viki ọmimẹ ẹtẹrẹ awụ nin fụna ayi oyofi ọnri Ifarisi nini, wai zụa ngwụ ini ijọva ineekụ-ọiza. ²¹ Waa wụ nini amẹ kaa yụ wa, ini ụmọkụkụ ka, "A sụ wụ ọza, ọza ana ra wụ ọza, vana vaa veyi ki ayọtụnẹ ishọji." ²² Ama ma kaa yụ wụ nin ka, "Ọza ọna kwayi ọza ọfụva aani, vana vaa yini ivi ishọji. Ọza ana ra zẹ ka yi ọza ọfụva aani ka, ọzi zarẹsụ, "vana vaa yini ivi," ama ọza ana ra ka yọ ọza ka. 'Ẹwụ Ọnụra!' vana yini ivi ineekụ ira. ²³ Fụvavọ, waa si isi irafẹkẹ aa ni ini ọpẹtẹ, dụ tamayi kụ wa nyi irẹyi ọza ọfụva wụ tụ ininẹ. ²⁴ Navọ isi irafẹkẹ ọnọ tụni ọpẹtẹ, dụ wa varama ne teni akaakana ẹwụ ri ọza ọfụva awụ, du wa vaa tangwạ va mẹ isi irafẹkẹ awụ. ²⁵ Jantụ pe ọza ọni ẹwụ riọ ra nyi irẹyi kaa, fini noze, ụ ma ni ni ikootụ nini, ọọ zi vavọ, ọ va sụ wụ yi ọmọkarẹyi, dị mọkarẹyi sụ wụ chire ọnọpa ụvọ, da vọ kụ sụ wụ tụ ini ijaarụ. ²⁶ Irẹiza ma kaa yụ wụ, wai zụa jinẹ fizọ poro dụ we sụta awụ bo. ²⁷ Wa wụ kaa ka da, ka, 'Asụụ sẹrẹka.' ²⁸ Ama ma ka wụ nini ka ọza ne ree re ọnyẹnẹ, di eyi ani ra zi fini ẹngwụ aani, o pee sẹrẹka da ini ọtụtụrụmạ. ²⁹ Iri ụvọri awụ ra mẹ kụ wa ji gege, tụọ jesi, dụ we nee ta. Fụvọka, ọọ dashi ka, aka ọnya ini ẹchẹngwụ awụ ọ da ne ta, fụni ka e ne ẹwụ ụvọta ngwụ ineekụ ira. ³⁰ Ụvọri awụ ra mẹ kụ wa ji gege, da kụra, dụ we nee ta. Fụvọka, ọ dashi ka, aka ọnya ini ẹchẹngwu awụ ọ da kụra, fụni ka e ne ẹwụ ụvọta ngwụ ineekụ ira. ³¹ A zẹ ki kaa, ka, 'ọza e ne re yi ose aani, ọ si iwe ivenụ yọ.' ³² Ama maa ka yụ wụ nini ka, ọza e ne re yi ose aani, ọọ zi vika fụvi irẹka ọsisẹ, ọ mẹẹ ki ọọ sẹrẹka. Ọza ana ra nyi ọnẹẹ ene yi tẹtẹ da, vana zẹ sisi sẹrẹka. ³³ Zẹtụọ, wa zẹ wụ da, kaa ka yi anụmọkụkụ ka, 'Asụụ shiekụ apinẹ, ama mị isa ọnụ ra shiekụ aani yi Ananyiyi. ³⁴ Ama ma kaa yụ wụ nini ka, asụ shiekụ vụvụrụ; asụụ si ẹbẹẹba shiekụ, fụvọki izọ ono Oshomoshi yatu tụ. ³⁵ Asụụ si ẹtẹ shiekụ, fụvọki izọ ọni Oshomoshi kụa afu shị, navẹki Ijerụsanẹmụ, fụvọka irẹkụra oshinọyi ọbani ọnọ vi. ³⁶ Asụụ si irẹsụ awụ shiekụ, fụvọka wai zụa mẹ ki ẹyi awu ọnya ọ vi ọvuọvụ, navẹki ojooji. ³⁷ Ama navọ di irẹyi awụ ọ vi, 'Ee ee' navẹki 'Eiye eiye', isẹnẹ ra funi ẹneni da, vana fidi eshụ vẹ. ³⁸ Waa wụ, ka kaa ka, "Ọza ọọ tụ wụ iri ọnya, ẹwa zẹ tụọ iri ọnya; Ọza ọọ tụ wụ anyi ọnya, ẹwa zẹ tụọ anyi ̣ọnya." ³⁹ Ama ma kaa yụ wụ nini ka, ọza ọ mẹ wu ọshimi, a suu si atọ. Akikọnọ, ọza ọ nya wụ arifẹ ini okụra ụvọri, zẹ vara okụra ụvọfa yọ. ⁴⁰ Ọza ọ shi wu irẹka ini ikootu, dọ dọ wụ abada, si aụrụ ọtụnẹ aani bẹrẹ yọ. ⁴¹ Ọzatụrọza ana ra si ụkata za wụ zụsẹ imeeri ọnya; kụafụza zụsẹ imeeri ẹẹva. ⁴² Ọzatụrọza ọna ra pa wụ isa, siọ yọ, asụ vara irama ki ọza ene re si ki ọna di isa zere fini ụvọ awu. ⁴³ Waa wụ nini, ka kaa ka, 'Ụ bẹdọ sirẹyi ọza ọfụva awụ, ama dụ kwayi ọnivi awụ nini.' ⁴⁴ Ama, ẹma kaa wụ nin ka, sirẹyi ọnivi awu dụ wa tụozụrenụ yi azẹna mụya rụ wụ. ⁴⁵ Fụvọ dụ wa zụ vi ozi ada wụ ana yi ineekụ. Fụvọki ọni ọnọmẹ ki ọyi ọsha kụ ọzọshimi ọnri ọzọiza, ọni ọnọmẹ ki orishi ọzụ kụ ọzọiza ọnri ọzọshimi. ⁴⁶ Aaviki ezene sirẹyi awụ kẹnẹ ọnụ sirẹyi aani, yere ọgụ ana yi inaani.? Ọdi maana nini warama mavọ? ⁴⁷ Wa ku ẹẹnyara wụ renya, sẹnẹ ụụ mẹ ọnụsi fụni ẹzẹna vọ? Ẹnẹna zi yo Oshomoshi warama mavọ? ⁴⁸ Fụvavọ wa bẹdọ vi ọgigụ nini venebiri Adayi ẹbẹẹba mẹ gụ.