¹ Ụmavọ, ijọva ineekụ vee vene, ezi anyẹnẹẹ ẹwụ ana ra zi yiyẹ ọnọrụ ana si irakọpa anini, de netụ ọmụsha ana shẹshẹ aa nyi ọnẹẹ. ² Ẹnẹshi vi ọnụra, dẹ ẹnẹshi vị ọnụvira. ³ Ẹnẹna vi ọnụra mẹ si irakọpa anini, ẹ zi za angwẹ chaụvọ. ⁴ Ama ẹnẹna vira mẹ si irakọpa anini, ẹẹ za angwẹ tụni chaụvọ. ⁵ Ẹfi ọni ọza ạna va nyi ọnẹẹ razi vi vẹ, di ẹnbo aa sụara. ⁶ "Ama inajirafụ, da wowụ ka, ọza ana vaa si ọnẹẹ ọ jinẹ vẹ, vee netụo nini." ⁷ Inaani, di ezi anyẹnẹẹ ẹnẹ, ana ra zi yi yẹ ọnọrụ kwẹte, de teni owụ rakọpa anini. ⁸ Di ẹnẹ na vọnụra dipẹ yi ẹnẹna vira ka, "Daka si angwẹ yi yi, fụvọki ọpa yi e mii na." ⁹ Ama di ẹnẹna vira tụoshi ka, "Ọmẹ vi ka ọ za fụ ẹyi rẹwụ nini, na we netụ ẹnẹna nangwẹ, doti wa shi yẹngwụ awụ nini."̇ ¹⁰ Ẹ mẹ jinẹ na shi angwẹ, di ọmụsha ana nyi ọnẹẹ vẹ, di ẹnẹ ne teni ẹngwu anini tẹtẹ, vatụraa nangwụ̣ izẹnẹ ya rụpe, de gụoze. ¹¹ Ini rama aani, ẹnẹna vọ mẹ varama vẹ, dẹ ka, "Ọga yi, ọga yi, noze yi yi." ¹² Ama, dọ tụoshi ka, "Irẹiza ma ka yụ wụ nin, ma zi yẹ wụ nini." ¹³ Fụvavọ, seyi pẹtẹ nini, fụvọki wa zi yẹ ọkụshi navẹki wakati ¹⁴ Ọsi vene umọni ọnọrụ ọnyi ọ va ni irẹkụravabẹ ọsa, dọ shi ezida aani, dọ gi ogụ yụ wa. ¹⁵ Dọ si ampo ẹshi yi ọza ipaapa, dọ si ampo ẹẹva yi ọzọfụva, dọ va si ampo ọnya yi ọzọfụta. Di ọzọza dọ ọpa ekẹshi ọna mọrọ ọyiyẹmẹ anini, dọ ọnọrụ ọnọ zi nasha. ¹⁶ Ọna di ampo ẹshi, dọ si ayani sofụ, dọ riọgụ ampo ẹshi tụra a. ¹⁷ Avọ ana dọ ampo ẹẹva mẹ zẹ si ayani sofụ, dọ riọgụ ampo ẹẹva tụraa. ¹⁸ Ama di ozida ana dọ ampo ọnya ̣na chi ụsi, dọ si ẹkẹshi ọga aani tụọ. ¹⁹ Ọ me si ku kokoro ọ̣ni ọga anini nasha, dọ varama vẹ ka, ezida ẹnẹ ẹ va mi ishuro ẹkẹshi ọnọ si yụ wa kẹ si sofụ. ²⁰ Ozida ana si ampo ẹshi yi, ọ si ampo ẹshi ọsa tụra vẹ, dọ ka, "Ọga mi, wa si ampo ẹshi yi mi, ree ma riọgụ ampo ẹshi tụraa." ²¹ Di ọga aani kọ nyarụkọrọ, ozida ọiza ana dọrenụ! Wa siọ zụ ka ava zụ dọ u renụ ini isa che. Mva si isa ọrụrụ chire ụvọ. Ngwụ ireshi ve pe mi jụjẹ." ²² Di ozida ana dọ ampo ẹẹva vẹ, dọ ka, "Ọga mi wa si ampo ẹẹva yi mi, ree ki ma riọgu ampo ẹeva ọsa tụraa." ²³ Di ọga aani kọ ka, "nyarụkọrọ, ozida ọiza ana dọrenụ!" Wa si ọ zụ ka ava zụ dọ ụ renụ ini isa chẹ. "Mva si isa ọrụrụ chire ụvọ. Ngwụ ireshi ve pe mi jụjẹ." ²⁴ Inaani di ozida ana di ampo ọnya vẹ, dọ ka, "Ọga, ma yẹ wụ ki ọza ana teyi ẹtẹ ọnụ vi, izụ re zi chire tụ, ọnụ ya fa, we pere izẹnụ re zi ye che ẹtụtụ gara." ²⁵ Angwa ene shimi, ọnọ mẹ ki ma na chi ụsi, dim si ẹkẹshi awụ tẹ tụọ. Dọ mi isa ana va ya wu yi. ²⁶ Ama ọga aani tụoshi, dọ ka, "ozida ọkụmi ọshimi, wa yẹ ki izim ̣ra zi chire tụ ọnim ya fa ọnri ki izim ra zi che garạ tu, ọnim ye pere." ²⁷ Fụvavọ, ụ yaan si ẹkẹshi ami na tu ineeshi ẹkẹshi, mmẹ vẹ aani, dim yaan dẹ ẹkẹshi ami varama ọnri ọtụụrẹsụ. ²⁸ Fụvavọ, di ampo ọnya ọnọ fini ụvọ aani, dụ wa siọ yi ozida ana nyi ampo ẹẹwụ. ²⁹ Fụvọki ẹzẹna nyi vana va nyi tụọ, dọ nyi tụọ kokoro. Ama ẹzẹna razi nyi isọnsọnyi, isa che ọnọ nyi vana va dọ fụrẹ ụvọ. ³⁰ "Ne ozida ana ra zi za rẹsu ọnọ ngwụ inozi ẹshẹshẹ, izọni oreere ọnri anyi ọriri vaa ya." ³¹ Ụmọni Ozi Ọza ọnri angẹni aani vaa vẹ ini ụga, ụmọnọ dọ yatụ ini ogede ụga aani. ³² Anẹshẹ bo keekere ve peregụ tụ inọvidi aani, dọ vẹrẹ, dọ tụ aza fini aza venebiri ọkwatẹmẹ ri, mẹ tụ atẹmẹ nin fini akaakana ẹvụ. ³³ Ọ vaa kụ atẹmẹ tụni akụvọri, ama dọ kụ ẹvụ tụni akụvọfa. ³⁴ Ụmavọ di oshinọyi ka yi ẹnẹna yini akụvọri aani ka, "Waa vẹ nin, ẹwụ ana Ada mi si ẹdabẹrẹ yi, ngwụ ini ana vaa ya wụ, ini ijọva ene teni tẹtẹ yụ wụ nin fini ẹfi ana fụrẹ si ẹshẹ kẹtẹ. ³⁵ Fụvọki ụngwẹ ma kụ mi, wa si isari yi mi, onyi ma kụ mi, wa yi mi enyi fụ; ẹfi ọni mi vi ọzọga, wa dọ mi tụ neshi. ³⁶ Mmẹ tụafụafụ, dụ vi ita kụmi ẹngwu; ẹngwụ ma zi mi, dụ sim kụ, mmẹ yini ijaarụ, dụ si mi vẹ." ³⁷ Ụmavọ ẹnẹna mẹ anasẹrẹ dẹ tụoshi, dẹ ka, "Ananyiyi yere ụmọni si re ki ụngwẹ a kụ wụ, di si isari yụ wụ kẹ? Navẹki ọnyi ma kụ wụ di kenyi yụ wụ fụ kẹ? ³⁸ Yere ẹfi ọni si re kụ wa vị ọzọga, di dọọ wụ ngwụ reshi kẹ? Navẹki wa tụafụafụ di vi ita kụ wụ kẹ? ³⁹ Yerẹ ẹfi ọnim si re kẹ ẹngwu a zụ wụ, navẹki ụ yini ijaarụ, di sụ wụ vẹ kẹ? ⁴⁰ Ụmavọ di oshinọyi tụoshi, dọ kaa yụ wa ka, "Ini irẹiza ma ka yụ wụ nin, isẹnụ ra mẹ yi ọza ẹnẹ weyi fụ, ini ẹnyara mi, ẹmi ọnụ mẹ yi. ⁴¹ Ụmavọ dọ kaa yi ẹnẹna yi na akuvọfa aani ka, "Tụ fụrẹmeyi nin, ẹwụ nin ene chekụ, nangwụ ineekụ ira poro-pooro, ene teni tẹtẹ yi eshụ ọnri angẹni aani. ⁴² Fụvọki ụngwẹ ma kụ mi, wa zi si isari yi mi, onyi ma kụ mi, wa si enyi yini fụ. ⁴³ Mmẹ vị ọzọga, wa zi dọ mi ngwụ ireshi; ma tụafuafụ, wa zi vi ita kụ mi, ẹngwu ma zi mi ọnri ki mẹ yi ini ijaaru, wa zi zama mị." ⁴⁴ Ụmavọ, ẹnbo vaa ṿoshi, dẹ vaa ka, "Ạnanyiyi, yere ẹfi ọni si re ki ụngwẹ navẹki onyi aa kụ wụ, navẹki wa vi ọzọga, navẹki wa tụafụafụ, navẹki ẹngwụ ma zi wụ, navẹki ụ yini ijaarụ, di razi fẹkẹ wụ kẹ"? ⁴⁵ Ụmavọ, do voshi ka, "Irẹiza, ma ka yụ wụ, isa ọnụ razi mẹ yi ezene weyi fụ ini azẹnẹni, ẹmi ọnụ razi mẹ yi. ⁴⁶ Ẹnẹni vana va ngwu ini ụyọọri poro-pooro, ama ẹnẹna mẹ isa anasẹrẹ, vana vaa yi nẹshẹ poro-pooro.