¹ Tlə tləndi Farta pənikan kufi 'yam sisingde, 'yeme tla ne chəɗchəɗ. Nachan rakat kakh ə fi ɗakwan kutrakti Farta tə paɗ wanchokhreta'an, ² tə khurɗəfi tə mban mərɓan. Tə chəkwun kəlaar kufiyan ɗəftə sisingndə si tla tlə nggətchə wetə wanchə kum nggərsə chep, tə paɗ tlə nggətchan chəkwun ndəra. Sa'chi ɗəfta'an i kənandə nafchə kaɗi. ³ Pa'u ənsə ne nggər kəs nefawa. Ɗakwan kutrakti Farta tə wanchokhreta'an nachan nat khur mərɓan, paɗ mafach'yan nandə chan mafakəta. ⁴ Nandə na chimendə 'yan, paɗ tləman nachan nat pa'ənchə yanda. ⁵ Nə wutl nggər nəswa, nandə yakh ɗa'kəti fitila ndu i fartawa, kətləm chənmən Farta nan fər ɗa'kət kə ɗar nanda. Nandə chət kutraktə nding kə fere. ⁶ Ndi kə tlə tlənanwa, "Ndikchəɗya ndeeta'an tə paɗ kit. Chənmən, Farta semeti fə ɓaas'sa, tləntə tlə tləndə'yan kə pənantə mafach'yan ɗənɗi ne səɓtə kəɗ tlə nakanya. ⁷ "Ɗəpo! Nggət ɓat nakanya! Tlə mbəs ən khar tla fərchə kit kə ndikchəɗi mba'tə fe khur ɗelewer təɗya." ⁸ Nggəta Yahaya, nggət səkcha, paɗ nggət nach ɗəchəɗya. Naki paɗ naki tanda, chamki kurumchə khaa kə pangngən sarchi tlə tlənan kətləm kə manani tlə tlənɗi pənichə ɗəchəɗya. ⁹ Ndikan wa, "Kə chin ɗinni wa! Nggət mafat kəɗ cha, tə wanmanchəwa annabi cha tə fe tlə fərchə kit kə ɗelewer təɗya. Manandən Farta!" ¹⁰ Ndikan , "Kə nggəleen ndiktəɗi mba'tə annabawach khur ɗelewer təɗya wa, kətləm ɓi farta'an nduk. ¹¹ Tla ne kə tlə kumi kafata, kə ɗə kə pang tə kumi kafat'yan. Tla ne kə tlə təkəmndə khur fata, kə ɗə kə pang tə təkəmən fatyan kaɗi. Tla ne tə kafat fa, kə ɗə kə pang tə chət kafata. Tla ne chəɗchəɗ, kə ɗə kə pang tə chəɗchəɗ kəta." ¹² Ɗəpo! Nggət ɓatakanya. mbəsta'an inchə khar məɗinchi, kə nggərani chək wunsə kaɗ kə ɗar ɗənɗi chətən. ¹³ Nggət ne kə alpha tə omega, tərkanan tə mecheta'an, tərkwatl kanan tə ndukwata'an. ¹⁴ Fə mbəs ɗəch khar fe chapanchə kapachyandə kətləm kə mbəsndə mbandə kə səmndə ən məɗi ɗəftə sisingnde, paɗ kə yimndə kə khur mərɓan tə mi kətəncha'an. ¹⁵ Khesi yiɗchəsi, tə fə kulacha, tə fəlaucha, tə fə ɓəlfacha, tə fə chət tar ɗəkhacha, nat tə fe tlə yakhchə chət əna kumi kit. ¹⁶ Nggət Yesu tlənənchə tlə tləndənchi kə mba'owunchi ɗəchəɗya kətləm Ikilisiya chinchi, Nggət ne kə nde' tə kwatl Dauda, wokumtla tati kataməta, tla ne njejjelle." ¹⁷ Semeta'an tə perr'yan ndakan wa, "ɓo!" Malan tla səkchə kə ndəwa, "ɓo!" Nat tla na kuchimndəfyan, kə ɓa, tla paɗ yakhcha, kə mbəs 'yam sisingndə pafən. ¹⁸ Nggət mba'andə chəkwun səkchə ndikchəɗi mba'tə annabawach khur delewer təɗya: Ma cheken nef kə ɗaran, na Fartə cheken ɓakhchəɗi khaa yarandfe khur ɗelewer təɗya. ¹⁹ Ma takan nef khaa khur ndikchəɗi mba'tə annabawach khur ɗelewer təɗya, na Fartə tərandə sərtə ya'an kaɗ khur ɗəftə sisingnan tə paɗ khur chəɗchəɗ tə mərɓan tla yarandə fe khur ɗelewer təɗya. ²⁰ Tla sənchə ɗəchəɗya ndakanwa, "Aa! Nggət ɓat chatchatya." Kə chok kəɗu! ɓo Yesu, Farta! ²¹ Kakəti Yesu Farta kə chok tə chəkwuni. Kə chok kəɗu.