¹ Artǝ khur fǝ tlǝnchǝɗi Fartǝ muɗ tǝ tosochǝ khar yu, ɓakan nditǝwa, "Ɓo, ni punu khǝmndǝ khaa i kapa ɓuɓi manɗi ne ɗas ɗar 'yamchǝ kaan yu. ² Tǝ mǝtlan tlǝ chǝt kutǝrchi khesǝ fǝlaukǝta. Tǝ innabi yan yi fǝlaukǝta tlǝ tǝrandǝn nafchi khesi." ³ Tǝrkǝ tlǝ tlǝnan nechǝ khur semet kǝ khur usine, naki nunef ɗa ɗar ngatǝ tlukhǝngga ɗiiɗ kaɗ tǝ tlǝmcha yi 'yara fata. Tlukhǝnggiyan inchǝ yan muɗ, paɗ mboamǝnchiyan kum. ⁴ Nunafan tǝ kapat fǝ khǝlfǝr'ra tǝ ngata'an, kwesfǝ tǝ ndǝch yilyilir. Mǝtlan chǝp tǝ ndǝna sa 'yǝm khar tipe tǝ ndǝna tǝkǝmǝnchǝ khuran yi fǝlaukǝt yan. ⁵ Ɗar pandǝyan yari fe tlǝmsi tla na sakta'an ǝ wuɓta: Ɓabila tla ne machan, man ɓuɓi machan tǝ ndǝna tǝkǝmǝnchi khesi. ⁶ Nachi nunafan tǝran feri fǝ fǝr kitcha tǝ fe ɓǝɓatlandǝ fe kǝtlǝm Yesu. Naki ndi sakichǝ indǝ ka'an. ⁷ Ndikǝ tlǝ tlǝnan wa, "Kǝtlǝm mǝ sakutǝ inde?" NI mba'u saktǝ tlǝm nunafan tǝ tlukhǝnggata'an tla natǝn ɗaran, tlukhǝngge ini tǝ inchǝ muɗ tǝ mboǝmǝnchǝ kum yu. ⁸ Tlukhǝnggǝini natu chokh yu, nakan ya pawa sǝwa, chǝk kǝɗu mǝtlan ndukhaa kǝ chǝkes khur kwiɗi nawaktǝ sǝrta'an sǝyu. Kǝ nan ndǝt kǝ pang tǝ tǝk nafcha. Fe ne khur khesi, fe yarawak tǝfe tlǝmchǝ nandǝ khur ɗelewer tǝ sisingndǝ kǝ chǝk fe khesi --- na indǝ sakandata ma nindǝ tlukhǝnggaɗi nesǝ chokh, tla nawakchǝs nakanya, chǝk kǝɗu mǝtlan nduk ɓata. ⁹ Tlaya yakhtǝ indǝ yi sǝnǝna. Inchǝɗi muɗ yu, tingringǝnchǝ muɗ tla choktǝ nuɗi kǝ ɗaran. ¹⁰ Fen paɗ kutǝrchǝ muɗ. Kutǝrchǝ ndǝrman khǝmndǝ khaa, artǝ nesi, tla paɗ ɓawawa, ma ɓi, na chan choktǝ kǝ wan mǝnchǝ tapkǝdɗa. ¹¹ Tlukhǝnggeini nesǝ yu, tla nawak chǝs nakanya, mǝtlan ta'an foɗfoɗa tǝ kutǝre; chǝk kǝɗu nachan khur kutǝrchǝɗi muɗ yu, tǝ paɗ nǝn kǝ ɓǝl fata. ¹² Ɓoǝmǝnchǝɗi natu kum yu, kutǝrchǝ kum fe tlǝwakchǝ kutraktǝ kwandǝn, chǝk kǝɗu nandǝ tlǝt mandǝ kǝɗ kutǝrcha yi awa arta tǝ tlukhǝnggaɗi. ¹³ Kaɗat yandǝ arta, paɗ nandǝ fǝr kutraktǝ yanda tǝ mandǝ yanda kǝmɗi tlukhǝngga ta'an. ¹⁴ Nanɗǝ yan Wanchokhreta'an. Chǝk kǝɗu Wanchokhreta'an nan sǝmandata kǝtlǝm Farti farchǝ nakan, paɗ kutǝri kutǝrcha --- paɗ tǝ mǝtlan, fe yafee, tacha'an tǝ fǝ fǝr kitcha'an." ¹⁵ Ɗikǝ tlǝ tlǝnan wa, "Yamchǝɗi natu yu, mǝɗi choktǝ ɓuɓimanɗi, nafcha, tǝ nggomndǝ kaan, khakhicha tǝ micha. ¹⁶ Mboǝmnchǝɗi kum natu yu, fen tǝ tlukhǝnggaɗi nandǝ kar ɓuɓimaɗi fa. Nandǝ ɓǝtandǝ khaa, kǝ kangandǝ tluyan, paɗ kǝ yandǝ kǝɗ nat tǝ wata. ¹⁷ Kǝtlǝm Farta ndif kǝ khur wan'ndǝkaɗach yanda kǝ ɗiiɗan tǝ kaɗat yan khaa tǝmɗi yakhtiyan kǝ fǝranda alkǝt kutraktǝ kǝmɗi tlukhǝnggata'an, kǝ fartǝɗi na ndikti Fartǝ ɗiiɗ khaa. ¹⁸ Nuɗi natu yu, nda'an ne kǝ kapa mirɓe tla chǝch kutraktǝ kǝ ɗar kutǝrchǝ khesi."