1 Nggǝrki na saktǝ ǝn khulafǝrta, manchan paɗ ǝna sakainde: Fǝ tlǝnhi Fartǝs muɗ tǝ ǝna ɓakhtǝ khaa muɗ, fe ne kǝ ɗukwa ɓakhtǝ khaa, kǝtlǝm tǝmɗandǝ na khuptǝ khuri Fartǝ ɗiiɗkhaa. 2 Naki ɗǝnɗi ne kǝɗ khawurtǝ sisingngǝn 'yeme wumchǝ khaa tǝ wata. Kit kǝlar khawurta'an fe ɓakhǝnchǝ tlukhǝnggaɗi tǝ mǝrsingndiyan paɗ tǝ ɗar tertǝ fe tlǝ 'yafe tǝ tlǝman. Kǝlangchǝ khar yanda fe fǝranda Farta. 3 Tandǝ in 'yemsi Musa, mafati Farta, 'yemsi Wanchokhreta'an: "Tarchǝ yo paktachan tǝ Paɗ yi sakainde, chǝnmǝn Farta tla ne manchan. Mbanchǝ yo kit, nde ta'an paɗ, kutǝri khakhichǝ nat. 4 Wun nawakchǝ lekute, Farta, paɗ kǝ manantǝ tlǝmwa? Kǝtlǝm chǝ ndak ne chǝɗchǝɗ. Khakhichǝ nat nandǝ ɓat fǝr mandǝ pangngǝn wa, kǝtlǝm kit'tǝ ndǝna chǝch yo ɓi kes. ̂ 5 Kǝrsǝ ndǝchǝ ini ndǝpaki khaa, kǝtǝn sitiɗi ne kǝ mǝt ndikti Fartǝ yu cha khaa ǝ khulafǝrta. 6 Chek fǝ tlǝnchǝɗi kes muɗ yu khur chǝɗchǝɗ tǝ mǝta ǝ kǝtǝn sita'an tǝ ndǝna ɓakhchǝɗi muɗ yu khar yanda. Kapach fǝyandǝ tla nawaktǝ patsǝ fiyanda tǝ kheɗ'ɗitǝ. Kapach kǝnandǝ kǝfach yandesi. 7 Artǝ khur ndǝchǝɗi foda tǝ Sisingdǝf yu fǝran kandǝ fǝ tlǝnchǝɗi tasochǝ tipe tǝ khuptǝ khuri Farta tla ne tǝ sisingndǝf kǝ fere. 8 Kǝtǝn sita'an ɗiiɗ tǝ in'nee tla ɓach khur mandi Farta tǝ alkǝt yan. Nefsǝ ne ɓakhǝn ndǝt kǝ khuran wa se ma tǝɓi bakhchǝɗi muɗ i fǝ tlǝnchǝɗi muɗ yu.