¹ Li echi oyukwe, mu emene nye-ishi osoeja li emene unukani, li emene ubhabhe ukpalawhu, lijine emene nyishikpe uzugbanibhe uwadhi. Mu ukeshobhela edhi mu udulabhela eka Paileti. ² Mu Paileti ujola, "Ibu EZE emene Juu la? Mu Jizos usala bhu "Yo ika mobom". ³ Emene ishi-osoeja zhibhe lu umashidhebhe uli li ishi kpom' uli ubushi uka. ⁴ Mu Pailketi ubhajugbajela, "Abhu inwedhe iyeye usasela? nyetu kpuzhilebhe lu ukashibhe ewayo". ⁵ Buhuto bu Jizos usadhebhe iye-iye mu om-neteni ubha uwodda Paileti enye. ⁶ Li bhelebhele ekele udhi ogbu ugakpeli, Paileti uchigamani onwunye ikoli lu umashi emene Juu. ⁷ Uzhi onye-ikoli ewayabhu Balabas, ya li emene bhiyo ugbubhe madegede uzhibhe luzhi li'me ikoli. ⁸ Mu igwe-maduya ujakeshobhe Paileti, mu ukanobhela bu umenime kpu umeni bhadhilebhe li ekele ugama-agama. ⁹ Mu Paileti usabhe, "Uwudhigani bhu moloweni yoni Nye-Eze emene Juu la"? ¹⁰ Iyedoni yawe umajikpom' bhu ubu li ishili osozu mu emene nyeishi osoeja umotobhe Jizos. ¹¹ Ubudhihu bu emene nyeishi osoeja umedhi hubhe igwe madegedeya mu uchiobhe ukabhe li uli ubueke kpombu loweniye Balabas. ¹² Mu Paileti ujukwakedhibhe, "Nde iye yo ibagani bu me me Nye Ezeemene Juu la"? ¹³ Mu bhe uchiobhe ikpu li uasa Paileti, "Kpogoani". ¹⁴ Mu Paileti ujobhe, "Nde iyebhiyo umela"? Mu ogbo madegedeya uchiobhe ikpu, "Kpogboani". ¹⁵ Lu ume iye umashi ogbomaduya, Mu Paileti ulowenobhe Balabas. Mu ulo Jizos igbanigbani mu udoshinobhe bu ukpogboabhe ¹⁶ Mu emenem' uludhine bhe Gometi ulu udotobhela udolabhela igbu udho mu ukpebhe ikpe mu uwhubhede bhe bhelebhele emene uludhinebhe Gometi ulu. ¹⁷ Mu uyoshobhe Jizos kapa ugbu-aya mu ukpushebhela okpulishi ugwu. ¹⁸ Mu ubudobhe ute-abidhi, "Padhiweni Nye-eze emene Juu". ¹⁹ Mu ugdhubhe akpasu mu okodhobhele li ishi, ubudhabhe uta. Ujinabhe ukpunuko mu ukpowenibhela ishi li ele. ²⁰ Ubha kpadhiwekpole umu, mu uyonatobhela kapa ugbu-aya, mu uyoshebhela amu ayawewe, mu udolabhela adhi ukpogbo okpogbo. ²¹ uzhi uduke, ubu Samoni nye Salen, li uya-ya udhoya (yawe ubhu ida Alezenda li Lufosu), mu uwejobhela mu umojikebhela vu ubutu ushi obe Kalasi. ²² Mu emene kapa uchim' udolalebhe Jizos igbu ele okpokolo ishi madu. ²³ Mu unedhebhela mene udhu-uka ubuhuto bhu, unwola. ²⁴ Mu ukpogbobhela mu udokapobhe kapaya ntiko-ntiko gonutuli umashi enyi l'umaji ela ib'ukani ozu onye kapa uchi la. ²⁵ Li ekelem' ọgu'bhė uko ubhe-ịto yạ bu kpụ ọkpogbȯlẹbhe Jịzos. ²⁶ Mụ ubhagidebhẹ lạ lị ibhe-ushi mụ ụshishebhela lị olu-obhe kpọmbu,"Nyeze Emene Juu". ²⁷ mu ukpogi̇̇dekatạbhe emene ugbu ịbo, n̄nẹ li ẹka ikegaya ụdojine li ẹka ibidaya. ²⁸ Om'bu umezu emezu ụkpalahu egwelem, ạmu'ko bụ "ụgubhedebhe yạ lị emene eyishẹbhe oloko ẹso". ²⁹ Emene uzhhibhe klu ugalaga ukpadhebhe umu, au uwebhe ishibhe, "Yo nyemu ikakpom bu yabha tasho bu udho ukpenimu Ebilikpabi li iye unuzu lijine li eye ito bu ya nubuzekpodhihoa". ³⁰ Dokpewela eliyoho li olu obhe mu ikpeda elewo!" ³¹ Li eke neteniya, emene ishi osoeja li emene ubhabhe ukpalawhu ukpadhiwe umu kpom bu, "udokpewedhi madegede mubuhuto kpom bu udokpewedho eliya. ³² Ubulebhu ibu Kalasi, nye ezem' Isleli, kakpoda li olu ubhe muye aweji yo". Emenem' uzhibhe li olu ubhe umudhe bhe umu. ³³ Ekele ụbha koho bhisu, mụ igeleni ụyulukamo ạdhiya, tụtu ụbhakȯhọ nazamadhi ekele. ³⁴ li echi nazamadhi ekele, mụ Jịzos ụkwa ịkwa, "ịdame, ịdame, ịyala ụdho mụ ịsabetemela"?. ³⁵ Emene uzhibhe lu ugalaga li ichakpa unujibhe uli Jizos kpu-shile lu ukwa, mu ukobhe bu uwhudhiya bu Ilaja". ³⁶ Onwunye ugbala mu ushisho mene dhu'ka li egege mu udhedhola bhu unwu-onwu. Mu udukeya uko, "Akawejini li abhulebhue Ilaija ejaya adhi'udokpewa." ³⁷ Mu Jizos ukwaikwa mu unwulo. ³⁸ Ukanimu uzho li ime udho ukpeniya domali odomali gonutuli oliya dhuma eleya. ³⁹ Ekelemu nye-ishi emene kapa-uchi neto kpu unwulule mu uko, "Li egede udukemu bhu Akpana Ebilikpabi." ⁴⁰ Uzhidhihu odhoma uledhibhe iyeda li akputo. Meli Magadalini, Meli Ina Jemishi, li Meli Ina Jizos, li Salomi uzhibhe li emeneya. ⁴¹ Ekelemu uzholi Galilii udhoma uchizedhibhe Jizos lu umekeshidha ugbolo. Utu udhoma chizeabhe dhuma Jeluselem. ⁴² Ubadhuma ila, kpomu udhumamaho eye ujikeleni Sabate, ⁴³ mu Josepu Alamatiya uja adhiya. Yawe bu nye uyibhe eso lime emene ekpe uzhi lijine li usejike ele-eze obioma amu Ebilikpabi. Mu uzekesho Paileti li udhotu ukpelimu Jizos. ⁴⁴ Paileti uwodhajihone enye kpombu Jizos unwulumahole, mu uwho nye ishi-kapa-uchi mu ujukwale lebu Jizos unwulumale. ⁴⁵ Paileti bha nujo ishukaya li eka nye-ishi-kapa-uchiya mu udhedho Josepu uzu ukpeli Jizos. ⁴⁶ Josepu ogotumajilene ukani olo. Mu ubugamala li olu oshi-uye-l'uka, mu utagashola ukani oloya, mu ubugashela li'me ili umekekpobhekpani li ime igwu. Mu ogonu ibe-igwu mu ugbadheshola li unu-obudho iliya. ⁴⁷ Meli Magadalini li Meli Ina Jizos nyetubhe adhi ulibhe Jizos.