¹ Lu'mom kpomu bha dhuma Jeleselem, uzhibhe li uzedhu ula Betipaji li Betani li olu ebhu olibi, mu Jizos dogasho emene ibo li emene uzhiya ² mu ukanebhe, "kadheni ula ya amu achishitani ununu. Kpomu ekpudhuniya, ewejini bhu inyanya akakpodhubhele li oul, kumani edhi mu iyawenimeni. ³ Bole bhu onwunye ujukwa yoni, 'iyala do mu imeni iyem, kanibheni bhu idanwudho uzhi lugwe utashi ekele audoshini yoni aidoyaweni adhi.'" ⁴ Akazelebhe mu uwejobhe nwo inyanya ukeshibhe edhi li akwu elezhi adhi ugabhe agaa mu ukemabhela edhi. ⁵ Emene uzhibhe li unuzogabhe li adhiya mu ukanebhe, "imeni ela, ikumanom bhu inyanyaya edhi la?" ⁶ Mu ukponebhe ekpo Jizos kanibhe, mu emene ya usabetebhe mu ukadhebhe ichakpabhe. ⁷ Uyawebhe inyanyaya mu udhebhe Jizos mu ugonubhe kapabhe mu ugbashabhe li oluya, mu yawe unazhola ezhi li olu. ⁸ Emene utu ogbo ugbashebhe ukanibhe li ichakpa, udo emenejine ugonubhe ele-eka ushi li ikashibhe mu ugbashinebhela li ichakpa. ⁹ Ogbo emenemu ukadhebhela li ununu li emene ujayabhe li ozu mu uchi-obhe ikpu, "Ozana! Uwokwani zhini nyemu ujoo li ewa Ida-Nwudhoye. ¹⁰ Uwokwani zhini ele-ezemu ejoo amu idaye Debidi! Ozana ukakpolibhe zhili olu!" ¹¹ Mu Jizos ukpudho li Jeluselem mu ukadho imudho ukpeni mu unwa enye li bhelebhele iye. Adhi ugbeliho egbeli mu ukadheho Betani ya li dhi madu li madu ibo. ¹² Eyemu usosheya ekelemu bhe ushobhe li ubuzeliho li Betani, mu inwe ugwola. ¹³ Uweji ushi uwho-ude li okpe uto, yawe ukaze li uwotu anwuya, ubha dhumaho eli uweje anwu gama uwhoya neteni, iyedoni ukadhuma ekele ushiya onwu-ina. ¹⁴ Mu ukanela, "Onwunye nwunye ndeke edhe anwu buzeli li yo udogba." mu emene uzhiya unujobhe iyeya. ¹⁵ Ujayabhe Jeluselem, mu yawe ukpudho li imemudho ukpeni mu ubhido uchi emene dhedhibhe iye li emene ugotubhe iye. Lijine emene gbanwomabhe owayi li emene udhedhi ilishi li udho ukpeni. ¹⁶ Yawe unedhe uwedhini bhu ubhutubhe iye udhedhi edhedhi li udho ukpeni. ¹⁷ Yawe uzhibhe iye mu ukanebhe, "uka bhamalebhema abhama kpombhu 'udho me bhu bu udho ekpele li eluwamu li ogbo ela'? buhutokpom bhu yoni imewewhani mu ubuho udho emene ugbu." ¹⁸ Emene nye-ishi-oso-eje li emene ubhabha ya nujibhe iyemu yawe ukaya, mu uwudhigabhe ewhueka bhe ogbubhe Jizos. Makabhu ogbo-maduya utunebhe otogwu gonutuli uzhi-ezhiya. ¹⁹ Ekelemu ubhe a-eye ila dhumaya, mu ubuzelebhe li ulaya. ²⁰ Kpomu ugabhishobhe li oyukweya, uwejibhe bhu ushiya li akaniya bhu ayamale uwho okpokalimadhihule. ²¹ Pita ugbeweji ekpoya mu uko, "Ida-Nwudho netu! Ushimu igo owo okpokalimale." ²² Jizos usabhe kpom, "Nweni uwhetu li ime Ebilikpabi. ²³ Li ishuka makaniyo ubhole bhu onwunye akanobhu ebhum, 'Nuzo mu idagadhu li olimini,' mu ubhulekpom bhu ukedhe ikake li unukwumaya mu uwhedawele bhu iyemu ukaya emezu bhu emezu, yabhu iye Ebilikpabi emena. ²⁴ Kpomubhokpe makani yo: Bhelebhele iye obhula idhohutoni, whetu bhuya gonumalema, ubhuhobhu a-yo. ²⁵ Ekele inuzole li edho, yo esabete bhu uwudhuma yo li adhi nwana yo uzhi, kpemele Ida yo a-mu uzho li obioma mu usabeteni yo umeyee." ^{26 27} Mu uyabhe ozu Jeluselem, kpomu Jizos uzho li ugadhiga li imudho ukpeniya, emene nye-ishi-oso-eje li emene ubhabha, li emene unukani mu ujakeshebhela. ²⁸ Ukanehe kpom, "emewe utu iyemu bhu li oluji ukpakpo, nnina udhe yo otu ukpakpo ya la?" ²⁹ Jizos kanibhe, "me moju yoni bhu aajuju, kanimeni aame makani yoni uji ukpakpo me mewe otu iyem. ³⁰ Uwushidhi minimu Joni buzeli li Obioma sam moboho li eka madu-egede la? Ka-sameni." ³¹ Mu udhodhebhe li elibhewe mu udoketabhe ikake li-ukaho bhu, "Bolakpom bhu yele asahoni bhu, 'ubuzeli li obioma,' yawe akabhu, 'Iyaladoho mu igweni uwhwdawene la?' ³² Bujilene bhu asahoni bhu, 'Ubuzeli li eka madu-egede,' ... ."Bhewe utunibhe madu-egede otugwu, iyedoni bhu bhelebhele madu uwhetubhe kpom bhu Joni bhu nye amuma. ³³ Mu usabhe Jizos, "Yele amaje." Mu Jizos ukanebhe, "Ndeke me makaneyoni oji ukpakpomu me memewe utu iyemu."