¹ Mu tuniebhe elulu kpubhe ekpedhibhe ukpeni mu obubhe gwe uda ada. ² Mu uko, "Li u-ula o-onye ikpe otunie Ebilikpabi otogwu uyidhhone onwunye onwunyeeso. ³ Li umom li ula ununwe ukudho, ununwem uzekeshidhia otutu ube li ukania, "Shikeshim-eka mu ikpem dabani me." ⁴ Ugoni ube udhu ubie uwudhiga ushikeshia eka, buto ubha meo mu ukanio eliya, "Amashie bumo tuniem Ebilikpabi otogwu ubuone uyi madegede eso ⁵ iyedo ununwem enelegamale me umekpaeli, me shikeshia bu eka mu ikpe dabenia, kpaga mu ugweme usunwa eli kpom ujiadho zukpulu ekele. ⁶ Mu Idanweudho bhe ko, "Kpeni ete liiye nyem ekpe ikpe chini echi uko." ⁷ Ndeke Ebilikpabi otushio emenem ulotuo ikpe, emene ukwashiabhe ikwa eye li abali la? Ekem utashi ube li unyeshia enye la? ⁸ Ma kaniyo ekpi bhe bu ikpe chini echini enwe nwa. Amashie kpom uzhhie ya, ube Unwo Madegede ejio, li egede ekem uwu weji uwhetu li uwam la? ⁹ Mu tunie emene tukwashibhe elibhe obu bu ameite emeite elulu mu nyepebhe udo emene. ¹⁰ Ukoma ibo zebhe Palisii, nyem inenem bu nye una takisi. ¹¹ Mu nye Palisii nuzo mu ukpo otu iyem kpani eliya, "Ebilikpabi, me teyo meka iyedo me zhiem kpom udo emene - emene ugbu-u, emene emeitebhe emeite, emene uga - ubuone kpom nyem una takisim. ¹² Mobu unu ekele-ibo li zukpulu ugbakuni-ozo. Mu hu-u-uke li dhiadhi li bhele bhele iye me nwe? ¹³ Buwhuto nyem Una Takisim, unuzo li okpe uto, uchieyane upi li oli igwe, buwhuto mu ukoya eka li unukuma, mu uko, "Ebilikpabi, nwe otuizhi li adhi me zhi, nye umeye." ¹⁴ Ma kaniyo, unukem ukadhe li umeite ka nyem inenem iyedo nyenye ububuzeole eliya olu ayawabhe bu olu." ¹⁵ Madegede zhili uhuyanidhi huabhe umeledhe kpaga mu ukpotubhe eka, kpom emene uzhiya unyetuobhe, mu ugbo chiebhe-bhe. ¹⁶ Mu Jizos uhuobhe, mu ukaniebhe, "Sabheteni umeledhe me, egbobisheie bheni. Ele eze Ebilikpabi bu a emene zhibhe kpom. ¹⁷ Li egede ma kaniyo nye nye anatuo ele eze Ebilikpabi kpom umeledhe ndeke okpudhuo bhe lime ya. ¹⁸ Mu onye uchi echi ujukwala, "Nye uzhi ezhi uma, nde iye me me mu nnweta budu enwe ugwulu ogwulu la? ¹⁹ Mu Jizos kania, "Iyedo mu hume nye Uma la? Onwunye onwunye ubu nye uma uzhie gama Ebilikpabineten. ²⁰ Imaji oloko "Egadhie uga, egbuo madu, ezuo ugbuu, edhuo ekaibo oyika, yi ida yo li ina yo eso." ²¹ Mu nye uchi echi uko. "Otu iyem me bhetekpolem otu iyem gotu li ubhem mobuo ugboji." ²² Kpom Jizos nujio mu ukanie, "Uzhi iye gwali. Dhegbokpo bhele bhele iye inwe mu izuke emene nwo ogboyi, mu inwe owayi ukpuketu li Obioma, mu ija, mu ichiya me. ²³ Kpom nye uchi echim unujie otu iyem mu agbezhi yulukala eli, iyedo ezeya kadhe akadhe. ²⁴ Mu Jizos nyetuo kpu uwudhule uma, mu uko, "Nyetu unwe akinye li emene eze li ukpudhu li eleze Ebilikpabi." ²⁵ Iyedo ugba uwe li ishi eyii l'uga enye odugaa, kama nye eze okpudhuo li ele-eze Ebiliokpabi." ²⁶ Mu emene uujibhe ukabhe, "Kpom uzhim nde nye enwe ugawe la? ²⁷ Mu jizos usabhe, "Otu iye ewhe ume liadhi madegede zhi, Ebilikpabi ugbania uwe." ²⁸ Mu Pita uko, "Ye asabhedhe kpola zukpulu iye anwe mu achiya yo." ²⁹ Mu Jizos kaniebhe, "Makani yo li egede uzhie nye sabhedhekpo udhoya, mubuone nwenia, mubuone emene nwanaa, mubuone ida-a li ina-a, mubuone umeledhea lishili ele eze Ebilikpabi, ³⁰ mu ugwe unweta auka adhiya li umom, ma li uko zhili uja, budu enwe ugwulu ogwulu." ³¹ Uba meo mu uhugbedeto emene uzhiya, mu ukaniobhe "Nyetun akadho bu Jeluse, bhele bhele iyem emene amuma ugbobhe iye kpani Unwo Madegede emezo kpobukpai. ³² Ushiabhe bu li eka emene Jkentali, akpadhiweabhe bu umu, emeshiabhe bu iwene aubuabhe uta. ³³ Ulokpolebhema igbani gbani augbua bhe, li eyemu ugbuwe bhitom auteli li enwu." ³⁴ Otu iyem uwotabhe nnine nnine, ubhekenibhe bhe otu unu ekpom, uwotabhe otu iyem ukaya. ³⁵ Mu uba buo kpom Jizos udhuma ula Jeliko, u-unuke enyekpo zhili unazhi li ugbono ichakpa li udhiodhi edhio. ³⁶ Kpom unujiio ogbo madu kpulu ugadhilebhe, mu tekwake iye-da. ³⁷ Mu kaniebhela bu Jizos nye nazelet bu uzhi li ugalaga. ³⁸ Kpomu ubuopke, mu nye enyekpom uchioikpu, Jizos Unwo Dabid, nwenim otuizhi li adhim mezhiom." ³⁹ Emenem uzhiebhe li ununum ogbobishilebhema nye enyekpom, ukaniebhe bu ubheya unu. Buwhuto kpu adhiya "Unwo Debid, nwenim otuizhi." ⁴⁰ Mu Jizos nuzo uwadhi mu ukop doyani unukeya adhim. Kpom unuke enyekpom ujala uzedhu, mu Jizos utela, ⁴¹ "Nde iye iwudhiga bu me meniyala?" Mu usa, "Idanwudho mo wudhiga unyetu adhi." ⁴² Mu Jizos kaniela, "Nyetu adhi. Uwhetu yo ogwo le yo." ⁴³ L'ezhiya mu unyetuo adhi mu uchize la, li utubuzo Ebilikpabi olu bhele bhele madu kpom uwejiebhe om, upadhiwe.