¹ Lumom, bhele bhele emene ugbolo una owayi li uo emene umeyeshi zhibhe lujakeshi dhi. ² Emenem Palisii li emene ubha abha zhibhe lu tagutadhiho, luka, "Unukem natu emene umeyeshi, udhikeshidhihum bhe bhidhi. ³ Mu Jizos luo, eleu lukanibhe. ⁴ Nnina limeyo, enwe ugu akpalama ise mu nnine wulunatua mugwe usabhete ugwino lidhi li nazzma lime ukaya, ludho wudhiga nnine ya tut uweja la? ⁵ Eke ubhawejile ma, obushiyabuli eweka luto ekpema. ⁶ Eke ubha dhumale udho, ohubu emene nwuje li emene egbekudho, lukanibhe "Bhatokeshimeni ekpema iyedo onome wulu owulu, mewejilema. ⁷ Makani yoni kpom umashibhu bu kpeye, ekpematoezhibu loligwe leke o-nyumeyeshi yosale, ka ugumadu ino lidhi linazamadhi owudhigabhe uyosali oyosali. ⁸ MMMobu ele unyoma enwe dhi owayi usa mu nnine wulunatua, mugwe umushi echi, luzama udho, mu wudhigake tutu uwuwejima la? ⁹ Ekubha wuwejilema, yabukpu ohuule ogbo nwuje, li egbekudjho, luka, "Jani, mowuwejilem owayimu uwulo owuluya. ¹⁰ Umashibhubu kpeye, makani yoni, "Upadhi zhi luunu emene uzhi Ebilikpabi leke onye umeyeshi uyosalile." ¹¹ Mu Jizos bhako, "Unuke mubu umeledhe ibo, ¹² Mu amu umeledhe bhakanio ida, "Nedhem uke owayyo udhunime mu Ukemo madu ibobhe ekpeya. ¹³ Ulashie eye tuogbo kpu amu umeledhem megbede kpole bhele bhele iye udhunia mu uzo ize ligbu ukaniuto, li igbuya, yabukpu uchiwo kpole bhele bhele iye unwe, libudu udhi lunwu. ¹⁴ Lumom, kpom utashiko bhele bhele iye, yabukpu okenye bueke udale ligbuya, yabukpu ubidole udhiodhi. ¹⁵ Yabukpu uzele adhi ubekeshi o-nwunye ligbuya, amushishila lugbolo une ezhi bhidhi. ¹⁶ Utoho bu ekpema ludhi iye ezhi dhigete iyedo unwedhe nye na bhidhi. ¹⁷ Buhuto ekem unwo eliya, muko, idame unwebu unwoboyi elala uzhibhe ludhite uwo, mu mezhio lunwulu linwe ladhim la? ¹⁸ Mobuzeli bu ladhim a-mzekeshi, a-nkania, "Idame, memeyeshini lemu eligwe liyo. ¹⁹ Mezhiedhem adhi uhu unwo yo, mewe hom nine li ogbo nwudhoyo. ²⁰ Mu unwo gbuwe bhibo ya buzelio luzekeshi ida lemu uzhio luto, yabu kpu ida wejilema muyuluko lishigili, mugbazo lumoshiya leli li umiokata unu. ²¹ Yabukpu unwa kanilema, idame, me meyeshinilemu eligwe li yo, mezhiedhem adhi uhu unwoyo. ²² Ida akanile ogbo nwudhoya, yaweni enwenwa kapa kpokpo mu zokalikpobhe, mu iyeshiani, aiyeshiani eechi-ugbeneka, li okolo. ²³ Aize galani eyimu ubukalikpobhe, gbuani madhini ogu ekpemeto. ²⁴ Iyedo unwome onwulukpole, lumom, ewejigbalebhema mubidobhe uto ekpema. ²⁵ Lumom unwo unukanim ezemale ika iyem dadhiom. Ekemu ubhayo, ludhumaho udho yabukpu unujile iye ugbali eli utebhe ete. ²⁶ Muhuo o-nwuye li ogbo nwoboyim lutekwa iyeda. ²⁷ Yabukpu usalame, "Nwanayo ayele udho, idayo eyigbole ono mubukalikpobhe iyedoni unatuka joka. ²⁸ Unwo unukaniya wudhu uma, uhwe ukpudhu limudho,yabukpu idaa kpushile mubha dhiyashiola. ²⁹ Yabukpu unwo unukaiya bhakanile idaa, weji li alatugbo kpumemenile yo ugbolo, maka loman uli ekpo yo, buhuto ekanedheme ono nweji mumotokeshi ogbo nwujeme ekpema. ³⁰ Buhuto ekemu unwoyo yo, nyemu tashinikpoyo iye lukpeyega, yegbunileme eye bueke. ³¹ Mu idaa kaniela, "Unwo izhikeshime zukpulu ekele, bhele bhele ekpema bu ayo. ³² Buto udadhu bhato ekpema li upadhi, iyedo nwanayom onwulukpole, lumom ezhigbale budu, uwulu owulu, buhuto lumom, awejilema.