¹ Mẹmhẹ Ipọlu mhẹmhi kẹkẹ oni ebe ona ghyi vhẹ, ni ọ kyili ọgamhẹ ali ghyiusomhi Ijesu Ikirisiti. Rhẹmhi a ghyie mhẹ khi mhi kaa kpaghyiẹ irhọshiọ iọgbọ Ishinẹgba ni ọ zẹ khi e rhọ mhọli iyẹsẹ oni ingmaghyie ni o de kwu odẹ Ishinẹgba. ² Ni o kyia khi o mugha nya irhegbenya ni ẹlẹnagbọagbọ. Ishinẹgba, ni ọ vhaa pfiolẹmhi, li ọ te ituekẹle shi obọ oni inyele ona. ³ Abhi oni ẹrhẹghẹ ọ ke rhọ rhamhi ọ te ingmemhi ọ li rhọ khasẹ. A rhi ọli mhọli mẹ obọ, mhi liyọ tsẹ ọli vhi abọ abhi Ishinẹgba ni otsumhi eyẹ ọ li ghyie mhẹ oni usomhi. ⁴ Mhi kẹkẹ oni ebe ona ghyi Itatọsi, egbegbe omyi eyẹ vhi imyisuọ ni eyẹ gaa myiesuọ. Ishinẹgba ni ọ kyili Ita Ijesu Ikirisiti ni otsumhi eyẹ ọ rhi ọpfọmhẹ ali ivhẹlemhi nu ẹ la. ⁵ Li o zẹ na mhi rhọ dobẹ ẹ shi ikireti, khi u masha dobẹ gbe eni ikanya ni e kpọle pfuse, ali khi u rhọ zẹ eni e kpeda shi oni ẹvhue khi ẹvhue kwu. Sato emena mhi ngme ẹ. ⁶ Egbe e nwemaa gba ni ọni ọ kpeda; ọ nwemaa mhọli ọkpotso ọgwho, imyi ọli e kyili eni e myiesuọ e vha kyili ivhiẹ umhasuọesọ. ⁷ Rharhi khi ọgbakanya ni ọ rhi ẹlọe a kwhu akanya Ishinẹgba, egbe e nwemaa gba nali. Ọ vha chichiegbe, ofu o vha kẹlẹ a fu ọli, ọ vha da onyọ, ọ vha kyia shi ingme wẹ khi rhẹmhi ọ dodẹ ukpaghọlọ a to ọ vhi egbe. ⁸ Ọ nwemaa rhi eloli a shi iọgbọ egbẹ ọ dobẹ ẹtsẹkẹ aghyie a ghọli ọ. Ọ nwemaa de ẹgbhẹ le, ọ gwabha gbe, ọ pfuasẹ, ọ gwhọghọ egbe ọli abọ. ⁹ Ọ nwemaa nwu eni ingmemhi ni a dobẹ rhi egbe a nya ze ni e kyila khi wẹwẹ ali eni ingmemhi e de kwu ogwho. Li ọ rhọ laa dobẹ rhi eni ingmemhi wẹna eni e kpọẹ ọ gwe rhọ khasẹ wẹ odẹ ni eni e zẹ okwhẹ kpẹsẹ wẹ e vha te gwabha gbe. ¹⁰ Rharhi khi ebubu iọgbọ e la orhọgbe eni e lama shi Ijudehizi vhọ, ni e vhaa suọ esọ ni e rhi ikakpulu ewẹna wẹ a ghagha iọgbọ evhese. ¹¹ E kyili emeni a kha nwu mugha rharhi khi ea wẹna ewẹna omama rharhi elele ukpaghọ. e gwe a vala idogbapfẹa. ¹² Ukwhumhọgwho elemhi wẹ, ni ọ kyili ọtsegbhẹ, ọọ li, ''Iọgbọ Ikireti eneta li e kyia, e vhiemhosue e gwe kyili elamhi ni a khẹna, ali ikhemhẹ.'' ¹³ Oni ingme ona ingmaghyie li o kyia, sheshe wẹ onaghyie khi e kẹ mhọli egbegbe irhoshiọ. ¹⁴ Imhe vha pfi esọ shi ẹgbhẹli Ijusi ali ishi agbọ ni e chi wẹ odẹ ingmaghyie le. ¹⁵ Eni e pfuase, ẹtsẹkẹ kwu li e pfuasẹ. Ama enẹ ijomhi ali eni e vha myiesuọ, a vha mẹ emeni e pfuasẹ obodẹ wẹ. Rharhi khi idu wẹ ali ikpakomhi wẹ e shẹ nwu ijomhi. ¹⁶ Irhẹmhi ẹẹ khi wẹwẹ e maa yẹsẹ Ishinẹgba, ama rhẹmhi e rhi inyele wẹ a khyie Ishinẹgba. Elingmobe ali eni e vhaa suọ esọ li e kyia. A vha rhẹ wẹ a khasẹ shi ikanya aghyiẹ.