Ikhomhi 13 Ikọrhitiansi ni ozeva
1
khi ona na mhi rha bhẹ bhuli vhẹ le ena. “Ọtsẹ ni ikwhumhava ali ikwhumhasẹ e myie ẹzọ o she mugha gbaa.”
2
Mhi she kpọ le gwu khasẹ eni e kpọ li ingmobe ẹrhẹghẹ ni o dọsẹ na mhi rhọ kpọ nono vhẹ bhẹ utozeva, mhi gwe khyiẹlẹ ọ ngme khasẹ vhẹ: Mhi kha gwe liegbe bhẹ, imha laa rhi obọ kyhi ọnyiẹ wẹ shi.
3
Irhẹmhi ngme ona khasẹ vhẹ rharhi khi vhaa nono ọtsẹ khi vha rhọ yẹsẹ ni Ikiristi li ọ te mhẹ vhi unu a ngme. O vha lọsẹ Ikiristi obodẹ vhẹ. Onochi, rhẹmhi izemhi ọli o nya vhọ a shi vhọ na vhẹ.
4
Ni a rhẹrhẹ gbe ọlia shi ukhomhi ọlọsẹmhẹ , ọ nyele te ikpa izemhi Isinẹgba. O li lọsẹ eyẹ ama abhi eyẹ ke li nu vhẹ le a kugbe ena vha laa nu eyẹ kemhi izemhi Ishinẹgba te ikpa agbọ ọli.
5
Vha dọ egbe vhẹ ẹloe bino fẹẹ gwhe ni vha kyhie mugha shi irhọshiọ. Vha li yẹsẹ khi Ijesu ọ nu vhẹ la? Ọọ nu vhẹ la, sẹkẹnẹ khi rhẹmhi a vha rhẹ vhẹ khasẹ.
6
Mhi mẹ ọli mẹ khi vha laa mẹ ọli mẹ khi eni a yẹsẹ li eyẹ kyia.
7
Nenaa, eyẹ pfi olema bhuli Ishinẹgba khi vhaa ke pfidọ. Imha pfi olema khi eyẹ rhue egbe eyẹ abhi eni e she nwule. Onochi, mhi pfi olema khi vha kee khyiẹlẹ emeni e te odẹ, ama o dobẹ a li ẹloe khi eyẹ she de.
8
Rharhi khi eyẹ vha mhuẹ emeni eyẹ dobẹ a li ingmaghyie, sẹkẹnẹ eyẹ nwukwu ingmaghyie vhọ.
9
Rharhi rhẹmhi eyẹ a ghẹle ni o lọsẹ eyẹ ni vha ze. Rhẹmhi eyẹ gwe lia pfi olema khi egbe gba na vhẹ.
10
Abhi mhi rhọ vu vhẹ iteteva le lẹ mhi rhọ kẹkẹ oni ebe ona ghyi vhẹ, ishọyọ mhi kha ke gwe jele imha ke gwe laa ngme ọva rhọ khẹ vhẹ. Imha nono khi mhi rhi afu ni Ishinẹgba o rhọ na mhẹ gbe ikanya ebe rhọ khẹ vhẹ, ama rhẹmhi o gwhẹ mhẹ khi mhi rhi afu ni Ishinẹgba o rhọ na mhẹ kpolo vhẹ shele a khi mhi rhi ọli tsukwu vhẹa.
11
Emeni e kposhimhi eni ngme na kwu, inyọgwho mhẹ ni kpotso ali emọse, vha kee ghẹlẹ! Vhaa gbe akanya ilieliegbe bhẹ, vha mhọdu, vha lama ni egbe, vha nyele inyele ọpfọmhẹ. iyọ Ishinẹgba ighọli ali ọpfọmhẹ ọ nu vhẹ la.
12
Vha rhi ipfipfi unu tsẹ egbe na mhẹ.
13
Eni e myiesuọ kwu ea tsẹ vhẹ.
14
Ọnọmhuẹyẹ ijesu kirisiti, ali ighọli Ishinẹgba, ali alekwugbe Ayẹmhẹ ni o Pfuasẹ o nu vhẹ la.