¹ Mhẹmhẹ Ipọlu, ni ọ kyili ọgamhe Ijesu Ikiristi ali Itimoti li eyẹ gaa te abhi o ghọli Ishinẹgba gba kẹkẹ oni ebe ona ghyi uka ni o la Ikọrhiti, ali eni e myiesuọ kwu ni e la aloekẹ Achaya, ² Ọpfọmhẹ ali ivhẹlemhi ni o te obọ Ishinẹgba bhẹ ni Ita Ọnọmhuẹyẹ Ijesu Ikiristi o kaa nu vhẹ la. ³ Ichichi o kyili uwi Ishinẹgba ali ọni Ita Ọnọmhuẹyẹ Ijesu Ikiristi, Lẹ khi Ita ivhẹlemhi ali ọpfọmhẹgbe, ⁴ Ishinẹgba ọ zeze eyẹ idu vhi elemhi ọtomhẹ eyẹ kwu, ishọyọ khi eyẹ kẹ dobẹ zeze eni e la ọtomhẹ idu, eyẹ rhi Izezeidu ni Ishinẹgba o rhọ ni eyẹ zeze eni e kpọẹ idu. ⁵ Abhi Ikiristi ọ le li mẹ ẹchọ rharhi eyẹ, iyọ li eyẹ li gwe li te ikpa Ikiristi mhọli izezidu. ⁶ Ama eyẹ khaa mẹ osue, ọpfọmhẹgbe ali imyiepfuese li o pfi a na vhẹ. O kha pfọmhẹ eyẹ vhi egbe, o li pfọmhẹ vhẹ vhi egbe. Ọpfọmhẹgbe vhẹ o laa gbe akanya onaghyie ni vha sheda nu eyẹ mẹ ẹchọ ni eyẹ a mẹ ena. ⁷ Eye rhi egbe nya vhẹ onaghyie, onaghyie. Eyẹ yẹsẹ khi abhi vha le li nu eyẹ a mẹ oni osue oyọ, oni ọpfọmhẹgbe o lia kyili uwẹ vhẹ abagwhoyọ. ⁸ Rharhi khi eyẹ vha nono khi vha kyili egbhodula, inyọgwho eyẹ, obodẹ ọnwunu ni eyẹ mhuẹ vhi Esha. Rhẹmhi a mii ẹchọ shi eyẹ vhi ẹloe nofu dala eyẹ, Ni eyẹ vha yẹsẹ khi eyẹ dobẹ gwe nyele gwhe. ⁹ Ingmaghyie, egwhuli li o kee kyia eyẹ vhi ukhomhi. Ama oni ẹrhẹghẹ ni aa ngme na eyẹ vha gwe rhi egbe nya egbe eyẹ sẹkẹnẹ Ishinẹgba lọgwho kpee, Ni ọ nwu eni egwhu a vule. ¹⁰ Ọọ tsumhi eyẹ vhi oni ududumhi okhẹna le, ọọ gwe laa tsumhi eyẹ. Eyẹ she rhi egbe nya ọli khi ọọ gwe laa tsumhi eyẹ. ¹¹ ikpa olema vhẹ ọ la laa khyiẹlẹ ọli ni eyẹ. Ebubu e la laa kee kphẹmhi Ishinẹgba ni eyẹ shi eyẹ ali ẹwela ni ọ rhọ ni eyẹ te ikpa olema ebubu. ¹² Nenaa ona li eyẹ rha gha: ni o myie ọtsẹ a ni idu eyẹ. Khi idu ni e chẹma li eyẹ rhọ nyele ifuabọ iọgbọ ni e la oni agbona. Eyẹ she li nyele oni inyele rhọ khẹ vhẹ, a khi ẹgbhẹli agbọ, ama izemhi Ishinẹgba lọ. ¹³ Eyẹ vha kẹkẹ emeni vhavha yẹsẹ ghyi vhẹ. Udu o zeze mhẹ. ¹⁴ Khi vha she kpọ mhuẹ emeni vha yẹsẹ obodẹ eyẹ. Mhi rhi egbe nya khi ogbẹlẹ Ọnọmhuẹyẹ Ijesu Ikiristi vha laa rhi eyẹ gha, abhi eyẹ li rhẹ vhẹ gha. ¹⁵ Rharhi khi mhi mhọli oni iregbenya ona, lẹ mhi rhẹẹ nono khi mhi kpọ bhẹ nee, ishọyọ khi vha kẹ mhọli elele eni ikọafẹ iteva ena. ¹⁶ Mhi kpọ ẹẹ mhasẹ khi mhi te odẹ Imẹsidonia kọ lẹẹ fẹ vhẹ. Mhi kha ke gwe te Imesidonia lẹẹ je mhi ke gwe kọ a fẹ vhẹ, ishọyọ vha ke kphase mhẹ je Ijudea. ¹⁷ Abhi mhi rhẹ mhasẹ oni omhasẹ ona, rhẹmhi ke mẹẹ nyanya dọsẹ ena? Rhẹmhi ke mẹẹ rhi ẹgbhẹli ọgbọ mhasẹ oni omhasẹ ena? Rhẹmhi ke mẹẹ rhi ẹrhẹghẹ ogwho ẹẹ li “Ee,” mhi ke gwe ẹẹ li “Obho.?” ¹⁸ Rharhi abhi Ishinẹgba ọ lee li mugha nya ingme ọli eyọ, li o zẹ khi eyẹ vha laa li ẹẹ li “Ee ọa liyọ “Obho’ ¹⁹ Rharhi khi Omyi Ishinẹgba, ni Ijesu Ikiristi, ni mhẹmhẹ ali Isivanọsi ali Itimoti ni eyẹ gwu khasẹ vhẹ eyọ, o vha kyili “Ee ali “Obho.” Ama “Ee li o le kyia ẹrhẹghẹ kwu.” ²⁰ Rharhi ishobọ ni Ishinẹgba ọ shi kwu “Ee” li e lee kyia vhi elemhi ọli. Iyọ te ikpa ọli, eyẹ li “Itsẹ” ikiki o kyili uwi Ishinẹgba. ²¹ Ama Ishinẹgba ọ she rhi eyẹ ali vhẹvhẹ mugha gbaa elemhi Ikiristi, ọ she ghyie eyẹ. ²² Ọ she rhi ishẹfẹ ọli shi eyẹ vhi egbe, ọ rhi oni Ayẹmhẹ ọli shi eyẹ vhi idu ni o rhọ khasẹ eyẹ emeni a laa mẹ ikposhimhi abhi irhudu shi emeni ọ la rhọ ni eyẹ ikposhomhi. ²³ Onochi, mhi nyalu Ishinẹgba khi ọ myie ọtsẹ na mhẹ emeni e zẹ ni imha rhọ je Ikọrhiti rhẹmhi ẹẹ khi mhi pfa vhẹ shi ekẹ. ²⁴ A khi rhẹmhi eyẹ khi eyẹ kẹ kee mhasẹ na vhẹ abhi irhọshiọ vhẹ o la li. Ama rhẹmhi eyẹ nu vhẹ a gbe akanya khi oghẹlẹ vhẹ o kẹ vọ, abhi vha li gbe awẹ sọ ekẹ vhi irhọshọ vhẹ ena.