¹ Nanaa obodẹ emeni vha kẹkẹ ghyi mhẹ: O ti khi imhẹli ọmọse ọ rhọ nwu ugwhẹ. ² Ama rharhi ọnwufẹẹ ighabha, ọmọse kwu ọ mhọli ugwhẹ ọli, abagwhoyọ, ọkpotso kwu ọ mhọli ugwhẹ ọli. ³ Ọni ọmọse ọ rhi ẹgbue ugwhẹ ọli ni ọkpotso kee ni ọkpotso, abagwhoyọ ọkpotso ọ rhi ẹgbue ugwhẹ ọli ni ọmọse a ni ọni ọmọse. ⁴ Ọmọse ọ vha mhọli afu obodẹ ijegbe ọli, wẹ khi ọkpotso li ọ mhọli afu obodẹ ijegbe ọli, ọmọse li ọ mhọli ọkpotso, ọkpotso ọ mhọli ọmọse. ⁵ Imhẹ vha rhi ugwhẹ rhi ẹchọ ni egbe vhẹ, sẹkẹnẹ khi rhẹmhi vha mhuẹ alamanegbe ẹrhẹghẹ ni akẹ. Khi vha mhuẹ ẹrhẹghẹ pfi olema. Vha kha lee khyiẹlẹ pfuse, ayayayọ vha gwe a lona, khi okhyio ọ ke nwu vhẹ fẹẹ rharhi imha dobẹ rhi egbe a myie ni vha mhuẹ. ⁶ Ama irhẹmhi ngme ena khasẹ vhẹ abhi ikhọkhọ a khi irhẹmhi rhọ shi ushi na vhẹ. ⁷ Rhẹmhi a khẹ khi ọgbọ kwu ọ liabhi mhẹmhẹ. Ama ọgbọgbọ li ọ mhọli isomhopfa ọli vhi obọ Ishinẹgba. A khi Isomhopfa ọna lẹ khi uwi ọna. ⁸ Obodẹ eni a vha nwu ugwhẹ ali eni esọrhọ, oo gwhẹ mhẹ a rhẹ khi e liyọ nyele e vha ye ugwhẹ, abhi mhẹmhẹ. ⁹ Ama o kha kyia khi e vha laa dobẹ rhi egbe myie, e wẹ ye ugwhẹ. E kha ye ugwhẹ li o somhi dala ọgwhẹmhẹ ugwhẹ ọa tosẹ wẹa. ¹⁰ Vhẹvhẹ ni vha ye ugwhẹ mhi shi oni ushi ona na vhẹ, a khi mhẹmhẹ mhi shi ọli, ama Ọnọmhuẹyẹ: “Imhẹli ọkpotso ọ chi ugwhẹ le.” ¹¹ ama ọ kha sheda chi ugwhẹ le, ọ wẹẹ lee shitọ apfuẹ imhẹli ọ ye ugwhẹ ovhese, ọ vha ke a shitọ apfuẹ, ọ nu ọli rhọ sheshe. Abagwhoyọ, “Imhẹli ọmọse ọ kwhu ugwhẹ ọli.” ¹² Ama vhẹvhẹ eni e kpọẹ mhi ẹẹ vhẹ---Uwi obọ mhẹ, a khi uwi Ọnọmhuẹyẹ---a kha mẹ ọmọse ni ọ myiesuọ ni ọ mhọli ọkpotso ni ọ vha myiesuọ, ọ kha lama khi lẹ vhaa chi oni ugwhẹ le imhẹli ọni ọmọse ọ kwhu ọ. ¹³ O kha ke kyila khi ọkpotso li ọmọse ni ọ vha myiesuọ ọ mhọli, ọ lama khi ọ nu ọli a shitọ, imhẹli ọ vu oni ugwhẹ le. ¹⁴ Rharhi khi ọkpotso ni ọ myiesuọ ọọ rhi ugwhẹ ọli ni ọmọse ni ọ vha myiesuọ a pfuasẹ, abagwhoyọ ọmọse ni ọ myiesuọ ọọ rhi ugwhẹ ọli ni ọmọse ni ọ vha myiesuọ a pfuasẹ. Ina khi iyọ lọ imyi vhẹ e vha kha pfuasẹ, ama ona o she rhẹ wẹ pfuasẹ. ¹⁵ Ama ọni ọ vha myiesuọ ni ọọ khi lẹ vha laa dobẹ shitọ, dobẹ ọli vu. Ushi irhomhi ni e sọ o vha nwu ọni ọmọse wẹ khi ọni ọkpotso. Rharhi ọpfomhẹ li Ishinẹgba ọ nyalu eyẹ a nyele. ¹⁶ U mẹẹ yẹsẹ ghyiẹ ọkpotso, ni ghyiẹ li u laa tsumhi ugwhẹ ni ọmọse? Laa khi ghyiẹ ni ọmọse, u mẹẹ yẹsẹ ni ghyiẹ li u laa tsumhi ugwhẹ ẹ ni ọkpotso? ¹⁷ Vha lee dobẹ ọgbọgbọ nyele inyele ni Ishinẹgba o mhasẹ nali, abhi Ishinẹgba ọ li nyalu ọgbọgbọ. Ushi na mhi shi ni ika kwu khi ena. ¹⁸ A mẹ ọni a kpọ fẹẹ neni ọ myiesuọ? imhẹli ọ yamhi o ni ofẹlia. A mẹ ọni a vha fẹẹ neni ọ myiesuọ? Imhẹli a chigbe fẹli ọ. ¹⁹ Rharhi khi shi ofẹẹ ali umhafẹẹ a khi lẹ khi oni ingme. Oni ingme lẹ khi isuọ esọ ni Ishinẹgba. ²⁰ Abhi ọgbọgbọ ọ li neni Ishinẹgba ọ nyalu ọli, ọ kyhie liyọ. ²¹ Ogwhumha lu mẹẹ kyila neni u myiesuọ? imhẹ rhue ọli kyili ingme, ama u kha mẹ abhi u lia mhọli igbadegbea liyọ. ²² Ama ogwhumha ọ kha myiesuọ igbadegbea li o ke kyila. Abagwhoyọ, ọni ọ rhẹ kpọ gbadegbea oghumha Ikiristi li ọ ke kyila ni ọ myiesuọ. ²³ A she dẹẹ vhẹ fọta, rharhi iyọ imhẹ gwe kyili ogwhumha agbọ. ²⁴ Inyọgwho mhẹ ni ikpotso ali emọse, abhi vha kpọ le li neni vha myiesuọ eyọ vha kyhie le liyọ. ²⁵ Nenaa, obodẹ eni e vha ye ugwhẹ nee, a khi Ọnọmhuẹyẹ li ọ rhi oni ushi ona na vhẹ. Ama abhi mhi khọkhọ khi ona, abhi ọgbọ ni a rhi egbe nya te ikpa ivhẹlemhi Ọnomhuẹyẹ. ²⁶ Elemhiyọ, mhi khọkhọ khi rharhi ọnwunu agbọ ni a ke mẹ amo, o ti khi ọgbọ ọ liabhi ọ li. ²⁷ Ghyiẹ ali ọkpotso vha she mẹ rhomhi irhomhi ugwhẹ ni egbe? imhẹ chi egbe vhọ le. Irhẹmhi u mẹẹ shitọ u waa nwu ugwhẹ? imhẹ wẹ nwu ugwhẹ. ²⁸ Ama u kha ye ugwhẹ u waa li ingmobe. Ọkpotso ni ọ vha ye ugwhẹ nee ọ ke yẹ ugwhẹ ọ vha li ingmobe. Ama khi eni e ye ugwhẹ e maa mẹ ikphakhamhẹ egbe, li o rhẹ mhẹ a nono khi mhi pfa vhẹ vhọ le. ²⁹ Ama emena mhi ngme vhọ khi ona, inyọgwho mhẹ ni ikpotso ali emọse: Ẹrhẹghẹ o vha gwe la. Te inena vu ọni ọ mhọli ọkpotso ọ rhue egbe ọli abhi ọni ọ vha mhọli ọkpotso. ³⁰ Eni ea vyiẹ e rhue egbe wẹ abhizẹzẹ khi wẹwẹ e vha vyiẹ, eni ea ghẹlẹ e liabhizẹzẹ khi wẹwẹ e vha ghẹlẹ, eni ea dẹẹ ẹtsẹkẹ abhizẹzẹ khi a khi wẹwẹ li e mhuẹ eni ẹtsẹkẹ. ³¹ Vhẹvhẹ ni vha pfi ẹgbue shi ẹtsẹkẹ oni agbona imhẹ vha khẹ ọli ma aye, rharhi khi oni inyele oni agbona o dọsẹ la lẹẹ. ³² Irhẹmhi nono khi vha chi ọkpokpomhẹ le. Ọni ọ vha ye ugwhẹ ẹtsẹkẹ Ọnomhuẹyẹ e maa nwu ọli egbe, khi lẹ kẹ rhi egbe nwu ọli. ³³ Ama khi ọmọse ni ọ mhọli ọkpotso, ẹtsẹkẹ agbọ e maa nwu ọli egbe, abhi ọ li rhi egbe aa nwu ugwhẹ ọli li ọa sa. ³⁴ Udu ọli o vha la ikpogwho. Ọkpotso ali ọmọmoshi ni e vha nwu ugwhẹ e maa mẹ obọ ingmemhi Ọnọmhuẹyẹ, abhi e li rhi egbe wẹ ali Ayẹmhẹ wẹ shi ikpọda ni Ọnomhuẹyẹ lia dua. Ama ọkpotso ni ọ ye ugwhẹ ẹtsẹkẹ agbọ li ọa sa, abhi ọọ li rhi egbe nwu ugwhẹ ọli. ³⁵ Irhẹmhi ngme ena khi o kẹ kpaghyiẹ vhẹ, khi mhi ke rhi agbọ nwu vhẹ unu. Abhi o kha li mhi li ngme ọli eyọ, khi vha kẹ mhọli ọnwegbe rhọ khali Ọnọmhuẹyẹ khi a ke mẹ emeni e myie vhẹ alo. ³⁶ A kha mẹ ọmọse ni ọ mẹ khi lia gwabha rhi ekpẹ rha khali ọni ọmọshi ni ọ zẹ shi ekẹ rharhi khi o maa nwu ọli gbe, o kha ghọli ọli ọ mhọli ọ, o vha kyili ingmobe. ³⁷ Ama o kha kyia khi ọ she mhasẹ khi lẹ vha mhọli ọkpotso, ọ kha sheda dobẹ laa rhọ nwu egbe, ọ gwabha kyia ni ọ vha mhọli ọli ³⁸ Ama ọni ọ mhọli ọmọmoshi ni ọ zẹ shi ekẹ ọ gwẹ kyia, ama ọni ọ ke ẹẹ khi lẹ vha mhuẹ li o somhi nẹẹ. ³⁹ Ọkpotso ọ kha sheda ye ugwhẹ irhẹmhi ọ nyele a ni ọ ni ọmọse ọyọ apfishi ẹlẹ egwhuli ọ. Ama ugwhẹ ọli ọ kha gwhua ọ ke dobẹ a ye ugwhẹ ni o ghọli ọ, ama o kyili elemhi imyiesuọ. ⁴⁰ Ama abhi mhi sọ shiọ lẹ khi ọ vha gwe ye ugwhẹ li egbe kha rhọ nwu ọli nẹẹ. Mhẹmhẹ na mhi lina sali mhi mhọli ayẹmhẹ Ishinẹgba.