Ikhomhi 5 Ikọrhitasi ni ikyiatsolo ¹ she suọ khi idetsia ikpotso ali emọse o la vhẹ iteteva, uvhali idetsia ni a vha mẹ vhi iteteva eni e vha myiesuọ gwhe. Oni idetsia lẹ khi ẹẹ khi emọse e nu igwhẹ ita wẹ a gbhẹ. ² Abhagwhoyọ, vha maa chichegbe! ochi ni vha kha rhọ la ọrhọ shi emeni vhaa khyiẹ. Ọni ọ gbe akanya onana vhaa nwemaa rhue ọli vhi iteteva vhẹ le ³ Ama imha la ayọ ghe mhẹ ghyiẹ, ama mhi nu vhẹ la elemhi ayẹmhẹ, mhi she kpọ lele sọ ọni ọgbọ unu ẹzọ, abhizẹzẹ khi mhi la ayọ ghe mhẹ ghyiẹ, ⁴ Ẹrhẹghẹ ni vha rhọ legba kwu elemhi eva Ọnọmhuẹyẹ Ijesu, ayẹmhẹ mhẹ o nu vhẹ la ayọ ali izemhi Ọnọmhuẹyẹ Ijesu, mhi she kpọ le sọ ọni ọgbọ unu ẹzọ nee. ⁵ Irhẹmhi khyiẹlẹ ona khi mhi rhọ ji ọli abọa ni okhyio khi ọ rhọ rhi ẹchọ ni ijegbe ọli, ayẹmhe ọli o kẹ pfue vhọ le ogbẹlẹ Ọnọmhueyẹ. ⁶ Idọmhi ni vha dọmhi o vha ti. Vhaa li yẹsẹ khi ukwukwu uduekẹ li o rhi osọmhi a fuma? ⁷ Vha shishi egbe vhẹ uduekẹ oni ojọ egbea, khi vha kẹ kyili ukphakpha onogbọ, ni a vha rhi ẹtsẹkẹ gboghyiẹ. Rharhi khi Ikiristi, ni ọ kyili ukphakpha idọsẹalẹ eyẹ, a she rhi ọli lasẹ obo ni eyẹ. ⁸ Iyọ eyẹ ghọdọ shi oni uliemhi, a khi uduekẹ nẹlẹ li a rha khyiẹlẹ ọli, ni o kyili uduekẹ irhingme ọgbọ shi elemhi ali ọkhọlọ, Onochi, eyẹ rhi ukphakpha ni a vha rhi ẹtsẹkẹ gboghyiẹ khyiẹlẹ, oni uliemhi ni o kyili irhi udu aghyie ali ingmaghyie gbe. ⁹ Mhi kẹkẹ shi ebe ghyi vhẹ khi imhẹ vha nu eni ea gbe idetsia le kwugbe. ¹⁰ a khi eni ea gbe idetsia ni e la elase uka, wẹ khi eni ẹtsẹkẹ ọgbọ ọa tuegbe, wẹ khi eni e rhi ighagha myiono iọgbọ ẹtsẹkẹ, wẹ khi eni ea lasẹ obo. ¹¹ Ama irhẹmhi kẹkẹ ghyi vhẹ khi imhẹ vha nu eni e lu egbe wẹ eni e myiesuọ ni e kyhie lia gbe idetsia, ali eni ẹtsẹkẹ ọgbọ ọa tuegbe, ali eni ea wola, ali edenyọ, ali eni e rhi ikpamhika myiono iọgbọ ẹtsẹkẹ. Shi emenale imhẹ vha nu wẹ le kwugbe pẹẹ, pẹẹ. ¹² Oni ogwho o de mhẹ khi mhi rhọ kee sọ eni e la elase unu ẹzọ? Ina khi eni e la elemhi uka vhaa sọ unu ẹzọ? ¹³ Ama Ishinẹgba li ọa gwu eni e la elase ẹzọ. “Vha rhue ọgbọ ọyọyọ iteteva vhẹ le.”