¹ Nenaa mhi to vhẹ oyerhe, inyogwho mhẹ ni ikpotso ali emọse, usomhi Ishinẹgba na mhi rhọ tsabọ khasẹ vhẹ, ni vha myie suọ ali ni vha mhuga nya. ² Oni ingmemhi ona li o rhi imhiepfuese na vhẹ, vha kha sheda nwu eni e ingmemhi Ishinẹgba na mhi ngme khasẹ vhẹ ena ze, sẹkẹnẹ khi rhẹmhi vha lama shi vhọ shi apfuẹ. ³ Rharhi khi mhi she kpọ gwu khasẹ vhẹ abhi mhi li li myie oni ingmemhi suọ: khi Ikiristi ọ gwhua shi ingmobe eyẹ abhi Ibabo o ngme. ⁴ Khi a rhi ọli tọ, ogbhẹlẹ ozesẹ ọ vule abhi Ibabo o ngme. ⁵ Ikrisit ọọ rhi egbe ọli khasẹ Ikẹfasi, ali eni ogbe ali ava. ⁶ Ọ chigbe gwe rhi egbe ọli khasẹ iọgbọ ni e dọsẹ egbhọ ishie asha asha ishie ọtogwho, ni o kyia khi egwho vhọ e khyie nyele nena, egwho vhọ e she gwhuloa. ⁷ Ọ rhi egbe ọli khasẹ Ijemhisi ali eni ighyiusomhi ni e kpọẹ kwu. ⁸ Ikposhimhi vhọ Kwu, ọọ rhi egbe khase mhe, abhi ọmọfẹ ni a vha vyia shi ẹrhẹghẹ aghyie. ⁹ Mhẹmhi aghyiusomhi ni ọ kpọkẹ. Imha tẹ vhọ ni a kha lu aghyiusomhi, Rharhi khi mhi maa zẹ okwhẹ kpẹsẹ oni uka Ishnẹgba, ¹⁰ Ama te ikpa izemhi Ishinẹgba emena mhi kyia lẹ mhi kyia, rharhi khi izemhi ọli ni o nu mhẹ la o vha kyili apfuẹ. Rharhi khi mhẹmhi gaa gbe ikanya ẹẹ dala eni e kpọẹ kwu. Ama a khi mhẹmhi gbee eni ikanya, ama izemhi Ishinẹgba ni o nu mhẹ la lọ. ¹¹ Iyọ o kyili mhẹmhẹ o kyili wẹwẹ, ingme ogwho li eyẹ gaa gwu a khasẹ vhẹ ni vha she kpọ lama shi nee. ¹² Nenaa a kha rhi Ikiristi tasbọ khi ọọ te egwhi vule, see egwho vhẹ e ke lia li ẹẹ khi a vha mẹ itiegwhivule? ¹³ O kha kyia khi a vha mẹ itiegwhivule lọ, oyọ khi Ikiristi o vha vule khi oyọ. ¹⁴ O kha kyia Ikiristi ọ vha te egwhi vule, oyọ khi ingmemhi apfuẹ li eyẹ a ngme. ¹⁵ Ọtsẹ ighagha li eyẹ myie a ni Ishinẹgba eyọ, rharhi khi eyẹ khi ọ nwu Ikiristi vue, ama o kha kyia khi ingmaghyie khi ọ gwhu ọ vha vue, ọ vha nwu Ikiristi vue khi oyọ. ¹⁶ Rharhi khi eni e gwhu e vha vule, oyọ khi li shi ọni Ikiristi ọ vha vule khi oyọ. ¹⁷ Abagwhoyọ o kha kyila khi ọni Ikiristi ọ vha vule, irhoshiọ vhẹ apfuẹ li o kyia eyọ ingmobe vha kyhie nyele shi. ¹⁸ Eni e gwhuloa shi odẹ Ikiristi e she pfua. ¹⁹ O kha kyia khi oni ukhomhi ekẹ agbọ ona li irhegbenya Ikiristi eyẹ o kpẹsẹ lọ, eyẹ li o kha kwu nẹẹ elemhi iọgbọ kwu. ²⁰ Ama Nenaa Ikiristi ọ she te egwhi vule, ni ọ kyili ikphamhi ikyiatsolo elemhi eni e gwhu. ²¹ Abhi egwhi o li te obọ ukwhumhọgwho bhale, Iyọ li etiegwhivule o li te obọ ukwhumhọgwho bhale. ²² Abhi agbọ kwu e li te ikpa Adam gwhuloa, iyo li agbọ kwu e li laa te ikpa Ikiristi nyele. ²³ Ama Ọgbọgbọbgọ li ọ la Ikpa ọli, Ikiristi, ni ọ kyili oni ukpamhi orhẹ ni ikyiatsolo, abagwhoyọ eni e kyili uwi Ikiristi e la laa nyele ẹrhẹghẹ ni ọ rhọ laa bhale. ²⁴ Ayọ li o laa kpẹsẹ, ni Ikiristi ọ rhọ laa rhi oni eghyiele ni Ishinẹgba ni ọni Ita. oni ẹrhẹghẹ li ọ rhọ laa shishi omhasẹ kwu ali afu kwu ali izemhi kwua. ²⁵ Rharhi khi ọ nwemaa le eghyiele apfishi ni ọ rhọ laa pfuse ẹbele ọli kwua nali rhi awẹ nwuno. ²⁶ Ọni ẹbele ni a laa pfusea kphosimhi khi egwhi. ²⁷ Rharhi “Ọ she rhi ẹtsẹkẹ kwu kpọkẹ ni ẹkoawẹ ọli.” Ama ọ ke ẹẹ li “Ọ she rhi ẹtsẹkẹ kwu kpọkẹ ni ẹkoawẹ ọli,” o kweghyiea gboo khi ọ vha rhi Ishinẹgba ma ẹtsẹkẹ nali rhọ kpọkẹ ni ẹkoawẹ ọli. ²⁸ Ẹtsẹkẹ kwu e kha kpọkẹ ni ẹkoawẹ ọli, lẹ ni ọni Ọmọ ọ li laa kpọkẹ ni ọni ọ rhi ẹtsẹkẹ kpọkẹ ni ẹkoawẹ ọli. Rhẹmhi a liyọ laa mẹ yọ khi Ishinẹgba ni Ita ọ laa mhasẹ kee ni ẹtsẹkẹ kwu. ²⁹ A bino ọ te odẹ ovhese, see eni e batazi ni eni e gwhu e ke laa li? Ni o kyia khi eni e gwhu e vha gaa laa vule pẹẹ pẹẹ, elọ e ke batazi na wẹ shi? ³⁰ Elọ eyẹ ke la okhẹna shi utotona? ³¹ Inyọgwho mhẹ ni ikpotso ali emọse ogbẹlẹ kwu mhi rha la okhẹna egwhi!, rharhi eghọghọ na mhi te ikpa vhẹ mhuẹ vhi elemhi agbọ eyẹ vhi elemhi itoma Ikiristi vhọ, li o rhẹ mhẹ ngme ona. ³² A khẹ li uwi ọgbọ lọ, mhi gyhi elele na mhi mẹ vhọ, mhi rhọ nu ẹlamhi ọbe khọli vhi Ẹfisọsi, o kha kyia khi eni e gwhu khi e vha vule? “Eyẹ wẹ ke le eyẹ a da, akọ eyẹ gwhuloa.” ³³ Imhẹ vha dobẹ a lẹlẹ vhẹ, “Agbaa obe rhẹmhi ea pfuẹchẹ enaghyiea.” ³⁴ Vha rhi ẹloe kpẹ! Vha nyele elemhi ipfausẹ! imhẹ vha gwe li ingmobe kee je alo. Rharhi ebubu vhẹ egwho e vha mhọli iyẹsẹ Ishniẹgba. Rhẹmhi ngme ọ khi o kẹ rhi omama nwu vhẹ. ³⁵ Ama iọgbọ egwho e la laa kee ngme, “See eni e gwhulo e lia vule? Ijegbe ni ogwho e rhọ laa vule?” ³⁶ Igbhodula vha kyila! Ẹtsẹkẹ ni u rhọ kọ rhemhi ọa khenaa neni o chigbe zẹ. ³⁷ Emeni vha rhọ kọ a khi oni ijegbe ni u rhọ rhi ọli kọ li o kyhiele a kyila, ama ukpamhi ovhese. O dobẹ a kyili ado ọa liyọ ẹtsẹkẹ ovhese. ³⁸ Ama Ishinẹgba li ọ ke rhi egbe ọda ni o gholi oli a nali. ³⁹ Ijegbe e vha li abagwho. Ọgbọ ọ zẹ ijegbe ọli, ẹlamhi ọ zẹ ijegbe ọli, ipfele e zẹ ijegbe wẹ, ifẹli e zẹ ijegbe wẹ. ⁴⁰ Iyọ la gwe li mẹ ijegbe aleghyie ali uwi oni agbona. Ijegbe aleghyie o mhọli ikiki ọli ijegbe oni agbona o gwe li mhọli ikiki ọli abagwhoyọ. ⁴¹ Ọwẹ o mhọli ikiki ọli, ukyi o mhọli ikiki ọli, itata e mhọli uwẹwẹ. eni itata ikiki wẹ e gwe degbea. ⁴² Iyọ li itiegwhivule o li la vhọ. Emeni a rhọ kọ o laa kẹnaa, ama emeni a nwu vule o vha kẹnaa. ⁴³ A vha rhi eghọghọ rhi ọli kọ, ama ikiki li o ke rhọ vule. ọlọsẹmhẹ a rhọ rhọ kọ, ama izemhi li o ke rhọ vule. ⁴⁴ Ijegbe ọgbọ li a rhọ rhọ kọ, ama ijegbe ayẹmhẹ li o ke rhọ vule. Ọgbọ ọ kha sheda zẹ ijegbe, yẹsẹ khi ọ li zẹ ayẹmhẹ. ⁴⁵ A gwe liyọ kẹkẹ ọli shi ekẹ, “Ọmọse ikyiatsolo Adamu ọ kyili ayẹmhẹ ni o nyele.” Adamu ni ọ ke kposhimhi ọ kyili ọni ọ rhi ayẹmhẹ a ni ọgbọ. ⁴⁶ A khi oni ayẹmhẹ li o kpọ bhẹ ama oni ijegbe, neni oni ayẹmhẹ o chigbe bhẹ. ⁴⁷ Ọmọse ni ikyiatsolo uwi oni agbona lọ, ipfuipfui li a rhọ mali. Ọni ọzava ọ te aleghyie bhale. ⁴⁸ Abhi a li rhi ipfuipfui ma ukwhumhọgwho eyọ. Ni a gwe li mẹ ọni ọ te aleghyie bhale eyọ, iyọ li a gwe li mẹ eni e kyili uwi aleghyie. ⁴⁹ Abhi eyẹ le li tsua ijegbe ọgbọ ni o kyili ipfuipfui sọ eyọ, iyọ li eyẹ li laa sọ ijegbe ọni ọgbọ ni ọ te aleghyie bhẹ eyọ. ⁵⁰ Nenaa mhi ngme khasẹ vhẹ, inyogwho mhẹ ni ikpotso ali emọse, khi ẹlamhijegbe ali ọlia e vha dobẹ a le ukwu aleghyiele Ishinẹgba. Wẹ khi emeni ea li opfua li o dobẹ laa le ukwu emeni e vhaa li opfua. ⁵¹ ghe! mhi gwu ingmaghyie ni o gbhagbha khase vhẹ: Eyẹ kwu eyẹ vha laa gwhua, Ama eyẹ kwu eyẹ laa nwulielẹ. ⁵² Elemhi ukwukwu ẹrhẹghẹ li eyẹ rhọ nwu a leliẹ, Alo gbea, ni okphẹ ikposhimhi o kphele. Oni okphẹ o kha kphele, eni e gwhuloa e kpọ vule e vhaa kẹnaa, eyẹ kwu eyẹ nwulielie. ⁵³ Rharhi khi oni ijegbe ni oa kẹnaa ena o nwemaa rhue ijegbe ni o vha kẹnaa sọ, oni ijegbe ni oa gwhua, o rhue ijegbe ni o vha gwhua sọ. ⁵⁴ Oni ijegbe ni oa kẹnaa ena o kha rhue ijegbe ni o vha kẹnaa so, khi ijegbe ni oa gwhua khi o rhue ijegbe ni o vha sọ, ayọ li ingme ni a ke ngme shi ekẹ o ke rha tsẹ, ni a rhọ ẹẹ li, “A she nwu egwhuli le.” ⁵⁵ ”Egwhi mhi gyhi ekhale ẹẹ. ”Egwhi mhi uka ni u rhẹẹ ta? “ ⁵⁶ Uka egwhi lẹ khi ingmobe, izemhi ingmobe lẹ khi ushi. ⁵⁷ Ama ifumhi o kyili uwi Ishinẹgba, ni ọ rhi ekhale ni eyẹ te ikpa Ọnọmhuẹyẹ Ijesu Ikiristi ni ọ rhi ekhale ni eyẹ. ⁵⁸ Elemhiyọ, inyọgwho mhẹ ni ikpotso ali emọse, vha mugha ze imhẹ vha vhọghyiẹ, vha lee rhi akanya Ishinẹgba kee je odalo, Rharhi khi u yẹsẹ khi akanya Ishnẹgba ni u waa gbe ọ vha kyili apfuẹ.