Ikanya eni ighyiusomhi ikhomhi 9
1
Imha mẹẹ kyili ọni ọ gbhagbha? Imha mẹẹ kyili aghyiusomhi? Imha mẹẹ li rhi ẹloe mẹẹ mẹ Ijesu Ọnọmhuẹyẹ nee? A khi ikpa vhẹ mhi te gbe akanya a ni Ọnọmhuẹyẹ?
2
Imha rhẹ kyili agyhiusomhi ni iọgbọ evhese, mhi kyhie kyila na vhẹ. Rharhi ikpa vhẹ mhi te rhi aghyiusomhi mẹ a khasẹ.
3
Ona mhi rhọ gwu ẹzọ a kpẹ egbe mhẹ khasẹ eni ea bino mhẹ.
4
Eyẹ vha mẹẹ dobẹ a le a da emeni e ghọli eyẹ?
5
Eyẹ vha mẹẹ dobẹ lia rhuẹ igwhẹ eyẹ ni ikpotso ni e myiesuọ mhọ obọ, abhi ighyiusomhi ali inyọgwho eyẹ ni e myiesuọ ni e kpọẹ ea li, ọnabhi inyọgwho Ọnọmhuẹyẹ ali Ikẹfasi?
6
Laa khi eyẹ ali Ibanabasi lọgwho eyẹ a gbe oni akanya?
7
A mẹ mẹẹ achioja ni ọ te egbe ọli dẹẹ itsua lali okwhẹ gwhe? Ọgwho ọ mẹẹ gwa ishemhi gwhe ni ọ vha te vhọ a le ikpamhi erhẹ ni ọ gwa shi vhọ? Laa ọgwho ọ rhi ẹloe a kwhu ena ni ọ vhaa da aminye ni a te wẹ egbe a mise?
8
Afu mhẹ mhi rhọ nu vhẹ a ngme ena? Ushi o vha mẹẹ li ngme yọọ?
9
Rharhi o la akẹkẹshekẹ vhi ushi Imozisi khi, ”Imhẹ nwu uli zu akachi unu ni ọa lumhi ido.” Rhẹmhi vhẹ khi akachi li Ishinẹgba ọ ngme?
10
A khi eyẹ li ọ rhọ nu ngme? Rharhi eyẹ la te kẹkẹ ọli, rharhi ọgwekẹ iregbenya li ọ rha gwa ekẹ. Ọlumhido ọ rhi irhegbenya a lumhi khi a laa zẹ na lẹ.
11
Eyẹ kha kọ ẹtsẹkẹ ayẹmhẹ shi vhẹ agbọ, onobe li o ke kyila khi eyẹ rhọ khyiẹsẹ ẹtsẹkẹ ni a mẹ ẹloe vhi obọ vhẹ?
12
Agbọ evhese e khaa khyiẹsẹ enana vhi obọ vhẹ, eyẹ vha kyili emeni e khaa khyiẹsẹ da wẹ? Ama a khi irhẹmhi eyẹ rhi itsua khọsẹ vhẹ. Onochi irhẹmhi eyẹ rhi egbe myie ingme kwu khi eyẹ kee kyili ọzuodẹ shi ingmemhi Ikiristi.
13
Laa khi vhaa li yẹsẹ ọni ọ la apfẹ Ishinẹgba a gbe akanya khi apfẹ Ishinẹgba li ọ laa le?
14
Iyọ li Ọnomhuẹyẹ ọ li ngme khi ọni ọa ngme ingmemhi Ishinẹgba ingmemhi Ishinẹgba li ọ te a le.
15
Ama imha khẹ ena a ma aye abhi emeni e gọ lu mhẹ. Wẹ khi rhẹmhi kẹkẹ oni ebe ona ghyi vhẹ khi vha kẹ khyiẹlẹ ẹtsẹkẹ na mhẹ. Mhi kha gwhua li o somhi mhẹ dala ni ọgbọ ọ vha dobẹ mhẹ rhi ona gha.
16
Rharhi mhi kha rhẹ lia ngme ingmemhi Ishinẹgba, imha mhọli emena mhi chichiegbe a shi, rharhi mhi nwemaa ngme ọ. Imha ngme oni ingmemhi Ishinẹgba epfua khi uwẹ mhẹ.
17
Rharhi mhi kha rhi udu mhẹ kwu gbe oni akanya ona, mhi laa mhọli elele. Imha ke rhi udu mhẹ kwu gbe ọli, mhi kyhie le mhuẹ akanya ni a rhọ shi mhẹ vhi obọ.
18
Mhi ke gyhi elele na mhi ke mhuẹ vhọ? mhi dobẹ a gbe oni akanya apfuẹ imha myie ẹtsẹkẹ shi oni ingmemhi Ishinẹgba.
19
Imha mhọli emena mhi li ọgbọkhọgbọ, ama mhi ke bhale a mela ọgamhẹa ni ọgbọ kwu, khi mhi kẹ gwe nwuno evhẹse maa.
20
Mhi kha mẹ Ijusi mhi ke liabhi Ijusi khi mhi kẹ nwuno eni Ijusi. mhi kha mẹ eni e rha khali ushi mhi ke liabhi ọni ọ rha khali ushi khi mhi kẹ nwuno eni e rha khali ushi. Rhẹmhia khyiẹlẹ ena abhizẹzẹ khi mhẹmhẹ obọ mhẹ khi imha rha khali ushi.
21
A kha mẹ eni e vha rha khali ushi, mhi ke liabhi ọni ọ vha rha khali ushi, a khi rhẹmhi o kyia khi imha rha khali ushi Ishinẹgba mhẹmhẹ obọ mhẹ, ama mhi rha khali ushi Ikiristi. Khi mhi kẹ nwuno eni e vha rha khali ushi.
22
Mhi kha mẹ eni o lọsẹ, mhi ke mela wẹa khi mhi khẹ nwuno wẹ. Mhi she kyili ẹtsẹkẹ kwu ni agbọ kwu khi mhi kẹ te odẹ kwu tsumhi ebubu.
23
Rharhi oni ingmemhi Ishinẹgba lẹ mhi te ga khyiẹli ena kwu, khi mhi kẹ mhọli ivọsẹna.
24
Vha li yẹsẹ khi a kha gaa na unamhi ama ukwhumhọgwho li a rhi isomhopfa a naa? rharhi iyọ, vha nyakwa khi vha kẹ dobẹ myie oni isomhopfa.
25
Ọni ọa na irhẹmhi ọ kwegbea ọ gwhọghọ egbe ọli abọ ọa wẹna owẹna. Isomhopfa ni ea li opfua li e khyiẹlẹ enana a shi ena, ama eyẹ na isomhopfa ni e vha li opfua li eyẹ na shi ena.
26
Elemhiyọ imha na umumhi umumumẹ wẹ khi irhẹmhia na kwhu akpekpe.
27
Lẹ mhi rhọ gwhọghọ egbe mẹ abọ nwu egbe mhẹ mela ogwhumhaa, khi mhi ke ngme oni ingmemhi khasẹ iọgbọ evhese, mhẹmhẹ obọ mhẹ a ke ẹẹ khi egbe e vha gba na mẹ.