Ikhomhi 16 Ikọrhitiasi ni ikyiatsolo
1
Nenaa, obodẹ abhi eni e myiesuọ e lia myiono ikpaghọ, abhi mhi khọli khasẹ ika ni e la Igalitiasi, iyọ vha kee liyọ.
2
Ogbẹlẹ ikyiatsolo elemhi uka, vha kee rhue ẹtsẹkẹ shi ikpọda ni vha la kee rhẹ bhẹ vhi uka, abhi ọgbọgbọ ọ dobẹ. Vha kee li na ẹẹ myiono ikpaghọ shi ekẹ khi vha ke gwe myiono na mhi bhẹ.
3
Mhi kha ke bhẹ, ọni vha la zẹ, mhi la laa rhi ebe nali khi ọ rhọ ma eni ikpaghọ je Ijerusalẹmu,
4
O kha ke dea na mhi rhọ lia ye e rhọ khẹ mhẹ lẹẹ.
5
Ama mhi kha te Imẹsidonia dọsẹ la lẹẹ mhi laa bhẹ. Rharhi khi mhi rhọ te Imẹsidona dọsẹ la lẹẹ.
6
Ni a rha mhẹ khi mhi la laa nu vhẹ la rhamhi oni okasẹ, ishọyọ vha ke kpaghyiẹ mhẹ obodẹ okyiali mhẹ obobo na mhia lẹ kwu.
7
Rharhi khi mhia nono khi mhi mẹ vhẹ nee oni ukwukwu ẹrhẹghẹ ona. rharhi khi mhi sa khi mhi laa tẹsẹ obholọ, ni Ishinẹgba ọ sheda lama na mhẹ.
8
Ama mhi la la Ẹfẹsusi apfishi ẹrhẹghẹ uliemhi ipẹticọsti.
9
Rharhi khi odẹ na gbodo o she gweghyiea na mhẹ, ama ẹbele nebu e la.
10
Itimoti ọ kha bhẹ, vha rhi egbe nwu ọ, rharhi irhẹmhi ọa gbe akanya Ishinẹgba, abhi mhi lia gbe.
11
Imhẹli ọgbọ rhi ẹloe gbe ọ, vha kpaghyiẹ ọli odẹ ọpfọmhẹ, khi ọ kẹ dobẹ liegbe bhuli mhẹ le. rharhi khi mhi rhi ẹloli ọli shi ekẹ khi ọ rhọ khali eni inygwho eyẹ ni e kpọẹ bhale.
12
Obodẹ inyọgwho eyẹ Apolọsi, mhi nwemaa zeze ọli udu khi ọ rhọ rhi inyọgwho eyẹ ni e kpọẹ mẹ obọ kọ a fẹli vhẹ, ama ọ khẹ khi lẹ vhaa bhẹ nena. Abhabhi o ke rhẹ laa li ọ kha sheda mhọli ẹrhẹghẹ ọ laa bhẹ.
13
Vha rhi ẹloe kpẹ, vha mugha ze vhi ukhomhi irhọshiọ, vhaa khyiẹlẹ ingme abhi emọse vha zezeze.
14
Ememeni vha khyiẹ kwu vha kee rhi ighọli khyiẹlẹ wẹ.
15
Vha yẹsẹ udogbapfẹ Istẹfanasi. vha yẹsẹ khi wẹwẹ li e kyiatsolo myie suọ vhi Achaya, khi e she ji egbe wẹ abọa ni akanya ikpghyiẹ eni e myiesuọ. Nenaa mhi lema vhẹ, inyọgwho mhẹ ni ikpotso ali emọse.
16
Khi vha chiegbe kpiale ni iọgbọ eyọyọ ali iọgbọ evhese ni e li liyọ pfi ẹgboe shi akanya Ishinẹgba ali eni ea kpaghyiẹ eyẹ.
17
Egbe e maa nwu mhẹ shi ibhale Istẹfanasi, Ifọtunetusi, ali Achasusi, e she la odoshimhi vhẹ khyiẹ shi na vhẹ.
18
Rharhi khi e she rhi ayẹmhẹ mhẹ ali uwẹ vhẹ mela onogboa. Iyọ, vha rhi ekpẹ ni iọgbọ enana.
19
Ika kwu ni e la aloekẹ esha ea tsẹ vhẹ. Akwila ali Ipricilia ea tsẹ vhẹ elemhi Ọnọmhuẹyẹ, ali uka ni o la apfẹ wẹ.
20
Eni inyọgwho eyẹ ni ikpotso ali emọse ea tsẹ vhẹ. Vha rhi ipfipfiunu tsẹ wẹ ni eyẹ.
21
Ipọlu, mhẹmhẹ mhi rhi abọ mhẹ kẹkẹ oni ebe ona ghyi vhẹ.
22
A kha mẹ ọnọ vha nono ingme Ọnọmhuẹyẹ ipfiununa o kyili wi ọli.
23
Izọtena Ọnọmhuẹyẹ o kylil uwẹ vhẹ.
24
Ighọli mhẹ o nu vhẹ la elemhi eva Ijjesu Ikiristi.