¹ Obodẹ isomopfa ayẹmhẹ, lnyọgwho mhẹ ni ikpotso ali eni e emọse, imha nono khi vha kyili igbhodula. ² Vha yẹsẹ ẹrhẹghẹ ni vhavha rhọ yẹsẹ Ishinẹgba nee, aa lieliẹ vhẹ alo bhuli ilitsa idungme, odẹ khi odẹ kwu li e te chi vhẹẹ mama egbe. ³ Iyọ mhia nono khi vha yẹsẹ khi aa mẹ ọni Ayẹmhẹ Ishinẹgba ọ rhaa ngme, ni ọa li ẹẹ li, “Epfua khi uwi Ijesu” A vha mẹ ọni ọa li khi, “Ijesu khi Ọnọmhọli”, sẹkẹnẹ khi Ayẹmhẹ ni o Pfuasẹ li o nu ọli la. ⁴ lsompfa ọdọdọda li e la vhọ, ama ayẹmhẹ ogwho li e gaa kyia. ⁵ Iyọ la gwe li mẹ ikanya ọdọdọda, ama Ọnọmhọli ọgwho lọ. ⁶ Odẹ ọdọdọda li a te a gbe oni ukanya, ama ọni Ishinẹgba li ọ rhẹ wẹ zẹ ukhomhi a ni ọgbọgbọ. ⁷ Nenaa a she rhi isomhopfa irhi Ayẹmhẹ khasẹ ni ọgbọgbọ khi ọ rhọ kpaghyiẹ ọgbọ kwu obọ. ⁸ Rharhi egwho a she rhi isimhopfa ẹgbhẹ na wẹ, egwho a rhi uwi iyẹsẹ na wẹ; Te ikpa Ayemhẹ ogwho. ⁹ Evhese ọ te ikpa oni Ayẹmhẹ rhi uwi irhoshiọ na wẹ, evhese ọ te ikpa oni Ayẹmhẹ rhi uwi irhọze na wẹ. ¹⁰ Evhese ọ rhi uwi izemhi na wẹ, evhese uwi ingme ingme ogbhagbha lasele. Evhese ọ rhi izemhi ni a rha yẹsẹ odegbea ni o la iyẹmhẹ ọdọdọda na wẹ, evhese izẹ ẹvholi ọdọdọda, evhese ọ rhi uwi ngme emeni eni ẹvholi ọda e ngme. ¹¹ Ama oni Ayẹmhẹ ogwho li o gaa rhi ena kwu a gbe ikanya, rhẹmhi ọ rhi eni isomopfa ni ọgbọgbọ, abhi o ghọli ọli. ¹² Ijegbe ogwho li o kyia, ni o rhẹrhẹ zẹ igwabọ nebu ogwho li o kyhie kyia, iyọ li ijegbe Ikiristi ọ li li. ¹³ Rharhi khi Ayẹmhẹ ogwho li eyẹ te batazi vhi ijegbe ogwho, e kyili Ijusi e kyili Igiriki, e kyili igwhumha, e kyili epfuẹgbe, Ayẹmhẹ ogwho li e te da. ¹⁴ Rharhi khi oni ijegbe o vha kyili ugwhobọ ogwho, ama eni ikpa, ikpa ijegbe e bu. ¹⁵ Ẹkowẹ ọ khi ẹẹ li, “Abhi imha ke rhọ kyili obọ, Imha la oni ijegbe,” o vha gwe mhọli obọ shi oni ijegbe? ¹⁶ Esọ ọọ li, “Rharhi khi imha kyili ẹloe, Imha la oni ijegbe, o vha gwe mhọli obọ shi oni ijegbe khi oyọ? ¹⁷ Oni ijegbe kwu o kha ke mẹẹ kyili ukpẹloe, a shio a ke rha suọ esọ? Oni ijegbe kwu o kha ke kyili esọ, a shio a ke rha suọ isue? ¹⁸ Ishinẹgba rhẹmhi ọ ma ikpẹghẹ, ikphẹghẹ shi ijegbe abhi o li ti ọli vhi ẹloe. ¹⁹ Eni ikpa, ikpa ni e la ijegbe e kha li abagwho lọ, see oni ijegbe o kha ke li nenaa? ²⁰ Iyọ nenaa eni ikpa ni e la ijegbe e bu, ama ijiegbe ogwho li ọ gaa kyia. ²¹ Ukpẹloe o vha dobẹ a li ẹẹ li obọ, “Imha mhọli emena mhi rhẹ a li,” O ke mẹẹ kyia khi ukhomhi li o ke ẹẹ li ẹkowẹ, “Imha mhọli emena mhi rhẹ a li.” ²² A kha ngme ọli te odẹ ovhese, eyẹ vha mhọli emeni eyẹ laa dobẹ khyiẹlẹ ni a rhi obọ gbe ikpa ni e la ijegbe ni o lọsẹ shi. ²³ Abagwhoyọ eni ikpa ni e la ijegbe ni eyẹ khọkhọ khi e maa nwu ẹloe, wẹwẹ li eyẹ rhi ekpẹ na nẹẹ, ikpa elemhi ijegbe eyẹ ni a khẹrhẹkhẹrhẹ wẹwẹ li e vọ ẹloe nẹẹ. ²⁴ Iyọ ikpa ijegbe eyẹ ni e nwu ẹloe a vha rhẹ gwe rhi eghọghọ na wẹ, rharhi khi e she kpọ le mhọli eghọghọ nee. ama lshinẹgba ọ she toni oni ijegbe manọ ogwho, ọ rhi eghọghọ ni eni eghọghọ o to. ²⁵ Rhẹmhi ọ liyọ khyiẹlẹ ọ khi aa ke mẹ ovhala vhi oni ijegbe, ama ikpa ni e la oni ijegbe e rhi oni isomhelemhi pfi ẹgboe shi egbe wẹ vhi egbe. ²⁶ Ikpa ona o khaa mẹ ẹchọ, ikpa ni e kpọẹ e degboghyiẹ ọli a mẹ oni ẹchọ. ọa liyọ o kha kyia khi rhẹmhi a mẹ ikpa ni a rhi eghọghọ na, eni ikpa ni e kpọẹ vhi oni ijegbe e nu ọli ghẹlẹ. ²⁷ Nenaa ijegbe Ikiristi lẹ vha kyia ọgbọgbọ ọ kyili ikpa ni e la vhi egbe. ²⁸ Ishinẹgba ọ she kyiatsolo zẹ shi oni uka, ighyiusomhi, ezeva ebolẹ, ezesẹ ọwẹnagbọ, ali egbe ikanya inyaloa, ali isomhopha irhọze, ali ekpaghyiẹobọ, ali igwabamhasẹ, ali eni e dobẹ a zẹ urhuli ọdọdọda. ²⁹ Eyẹ kwu eyẹ ke mẹẹ kyili ighyiusomhi lọ? laa khi eyẹ kwu eyẹ ke kyili ebolẹ? Laa khi ewanagbọ li eyẹ kwu eyẹ ke a kyila? Laa khi eyẹ kwu eyẹ ke a gbe ikanya inyaloa? ³⁰ Eyẹ kwu li eyẹ mhọli isomhopha irhọze? Laa eyẹ kwu li eyẹ a zẹ ẹvholi ọdọdọda? Laa khi eyẹ kwu eyẹ a myie ẹvholi ọda ngme? ³¹ Vha nyakwa nono isomhopfa nefu. Mhi la laa rhi odẹ ni o gba pfuse khasẹ vhẹ.