¹ ولی تو طبق تعالیم درست ،سخن بُگُ. ² پیایلی که پیر اُویدنه بشون بُگُ متین و ملایم وباتقوا بووِن وُمِنِ ایمانشون وُ مهربونی وُصبوریشون وِ شایستگی رفتار بُکُنِن. ³ وُهمیطور زَنگَلی که پیر اُووین باید روش زندییشون محترمانه بووه. نوا غیبت کُنِن یا بنده ی شراب بووِن،بلکم وا او چی که خووِه یاد بِدِن ، ⁴ تا بتِرِن زینگل جوونتره یاد بدِن که میره دوست و بچه دوست بووِن ⁵ وُبا تقوا وُعفیف و کدبانو وُمهربونُ وُگوش گِرِ میرگلشون بووِن، تا کلومِ خدا بد گوده نَوُوِه. ⁶ وُ پیایلِ جوونِ نصیحت بکُن تا عفیف بووِن . ⁷ خوت مین همه چی الگوه اعمالِ خو بو .مین ِیاد دادن وا صادق و جدی بوویی، ⁸ وُمین سلامتِ گفتارت طوری بویی که کسی نترسته بووه تون ِسرزنش کنه ،تا مخالفون ایر موقعیت بد گفتن زِ ایما پیدا نکُنن ،خجالت زیه ایبون. ⁹ وِغلامون یاد بده که گوش بگرِن هر چی که ارباباشون ایگون وُ سی راضی کِردنِ ارباباشون تلاش بُکُنِن؛ وُیکی به دو نَکُنِن ¹⁰ وُ زِاونو دزدی نَکُنِن ،بلاکُم امانتدار بووِن تا من ِهر چی یاد دادنی که ارتباط داره وِِنجات دهنده ی ایما خدانه زینت ایبخشه. ¹¹ چون فیض خدا ظاهر اووی ،فیضی که هَمَنه نجات ایده ¹² وُ وِ ایما یاد ایده که بی دینی و هوسهای دنیوینه ترک کُنِن،وا با عفتی وُپارساییو دینداری منِ ای زمونه زندیی کنیم، ¹³ منِ او زمونی که انتظارِ او امیدِ موارِک، یَنی ظاهر اویدنه پر جلاله خدای بزرگُ نجات دهنده ی خومون عیسی مسیح هِدیم، ¹⁴ که خوشه فدای ایما کِرد تا ایما زِ هر چی کاره لیشه دیر اُویم وُ یه قومی پاک راست کنه که سی خوش بووه و با غیرت سی کار خو. ¹⁵ اینونه بُگُ، وُ وا هر چه قدرت داری تشویقُ تنبیهشون بُکُن، وُنهل هیچکی تونه کوچیر کُنه.