¹ Kwati ni mfula ya buta mu rusuba nangu imfula mu kusombora, efyo umupuka taringira ubukata. ² Kwati kaseba ku kurumba na utumimbi iryo turepupuka, efyo ikitipu takisa ku kwika. ³ Ubwembya bwa kwa kabarwe, umukobero wa mpunda na inkonto ya kuminako inuma sha bapuka. ⁴ Wiraasuka umupuka ukuringana na ubupuka bwa kwe, e pari nobe waparana na ye. ⁵ Asuka umupuka umwebera ubupuka bwake, pakuti eba uwa mano mu menso yakwe umwine. ⁶ Onse uutuma ifyebo mu minwe ya mupuka ateta amakasa yakwe umwine no kunwa ikimfundawira. ⁷ Kwati moru ya waremana ayarerebera panshi kipowe mukunwa ka fipuka. ⁸ Kwati kukaka iribwe mukafunda e kupera ubukata ku mupuka. ⁹ Kwati munga uwingira mukuboko kwa kwa kyakorwa ripinda mutunwa twa fipuka. ¹⁰ Nga uuremba umupupu uukyena bonse abamushinguruka ni uyo umupuka uubwekashpo ubupuka bwakwe. ¹¹ Nga firya imbwa ibwekera ku marushi yaiko, e fyo aba umupuka uubwekeshapo ubupuka bwa kwe. ¹² Bushe naubona uuri na amano mu menso yakwe umwine? Kuri isubiro irikaramba ku mupuka ukukira kuri ye. ¹³ Umuntu umunang'ani asosa ati, ''Muri inkaramo munshira! pari inkaramo pakati kankyende shaparwarara!'' ¹⁴ Nga firya ikibi kisuka pa twakwisukirako, e fyo no muntu umunang'ani aba pa busanshi bwa kwe. ¹⁵ Umuntu umunang'ani abika ukuboko kwa kwe mu mpakwiro eryo ninshi takwete na maka ya kwimisha pa kanwa kakwe. ¹⁶ Umuntu umunang'ani arikwata amano mu menso yakwe umwine ukukira abaume kine rubari abasuka no bupingushi ubwa bune. ¹⁷ Nga urya uwikatisha amatwi yambwa, umupita nshira uufurwa pa kukansana ukushiri te kwa kwe umwine. ¹⁸ Nga ishiru iriposaika imifi shirepya, ¹⁹ e fyaba umuntu uufutika uwmina muparamano wakwe no kusosa ati, ''Bushe nshakirasekeshafye?'' ²⁰ Pantu ukuburirwa kwa nkuni, umuriro urashima; no kushiri uwabufi takuba bufi. ²¹ Ngefyo amarasha pa mifito ne nkuni ku muriro, e fyaba umuntu uwaburaki pakusongerekanya uruburi. ²² Ifyebo fya mukantepe ntepe fyaba kwati misasuro sha bune; yaya panshi mukati ka firundwa fya mubiri. ²³ Nga firya silifa ashingwirwa mu kyera kye bumba e fyaba ne mirimo ireranga itasha rero umutima mukati wa bubifi. ²⁴ Uyo uupata abanankwe arufyanya ifyo omfwa ne miromo yakwe eryo abika ububi mukati kwakwe umwine. ²⁵ Aranda ifyebo fya kongora, rero mwi mutetekera, pantu kwaba ifya museru kine rubari mu mutima wakwe. ²⁶ Nangu urupato rwa kwe rwarifimbwapo no bukyenjeshi, ububi bwa kwe bukafimburwapo mu kintu bwingi. ²⁷ Onse uwimba ikirindi akawiramo ne ribwe rikakunkurukira pari iryo uwari sunkire. ²⁸ Ururimi rwa bubifi rwapata abantu rufwanta na kanwa kakutasha muri bu bumbi munda kareta ubonaushi.