¹ Umwangashi urafurunganya ne kya kunwa ikikora kimya imburi; uyo onse ukikonkerera takwata mano. ² Akatina ka mfumu kaba kwati katina ka musepera wa nkaramo ireburuma; uyo uirenga ukufurwa aireterera umwine mu mweo wa kwe. ³ Kyariba mu kinshi kuri uyo utaruka ku fyongo, nomba imburwa mano yonse itorokera mu fikansa. ⁴ Umuntu umunang'ani tarima mu mibundo; ena akafwaya ikisabo panshita ya kusombora nomba takakikwate. ⁵ Amapange ya mu mutima wa muntu yaba kwati ni pa menshi yashika, nomba uyo uwa mano e ukatapamo. ⁶ Umuntu araitakisha mufingi ati wa ruse, nomba ni nani uwingamusanga uyo uwa kishinka? ⁷ Umuntu umurungami endera muri bukaere bwa kwe, na bana bakwe abaume abakamukonkapo bari no kuparwa. ⁸ Imfumu iyaikara pa kipuna uku bomba umurimo wa bupingushi irafuta ububi bonse pa kinso kyaiko. ⁹ Ni nani uwingasosa ati, ''Nebo umutima wandi wariwama; na risangururwa ku masambi yandi''? ¹⁰ Ifipimo ifitari fya kishinka ne miringo tairingene- Yahweh arifipata fyonse. ¹¹ Nangu mwaice e shibukirwa ku mikitire ya kwe, nga kyakuti imikitire ya kwe yariwama no kororoka. ¹² Amatwi ayomfwa na menso ayabona fyonse ni- Yahweh wa fipangire. ¹³ Wiratemwa turo e pari waba mu bupina; ureshibura amenso yobe na webo ukakwata ifya kurya ifingi. ¹⁴ ''Tafiweme! Tafiweme!'' e fi sosa uushita, rero iryo afuma aya areitakisha. ¹⁵ Kwariba goride na mabwe ayengi ayakuruma umutengo rero imiromo ya mano ya ryafya ukusanga. ¹⁶ Upoke iraya rya kwe uyo uwabika ubukingo pa mweni no kurikata nge kikatira murandu iryo ena arekingirira pa mwanakashi wa misango ya bubi. ¹⁷ Ikirayo kipokerwa mu bukyenjeshi tepa kurwa, nomba pa numa akanwa ka kwe ka kesuramo insakarabwe. ¹⁸ Amapange ya tantikwa mukupandwa amano eryo ni ku kutungururwa na mano webo wingarwira inkondo. ¹⁹ Uwamuromo aturisha inkama kanshi webo wiraenda na bantu baranda sana. ²⁰ Umuntu uwatipwira wishi nangu nyina, umusaniko wakwe ukashima mukati kamfinshi ya kufita fititi. ²¹ Ifyuma ifinonkwa bwangu pakubara tafikita bune ku mpera. ²² Wi sosa ati, ''Nkarandura pa bubi ubu!'' Urerorera pari Yahweh na ena e ukapususha. ²³ Yahweh aripata ukupima kwa bukyenjeshi ne fipimo fitari fya kishinka ta fyawama iyo. ²⁴ Intampuro sha muntu shi tungururwa na Yahweh; nga nomba ena kuti aishiba shani inshila yakwe.? ²⁵ Kyariba kiteyo ku muntu ukubirima pa ku sosa, ''Iki kintu kyarishira,'' kabiri tampa ukutontonkanya ifyo kipiribura pa numa ya kupanga ikirayo. ²⁶ Imfumu ya mano irorururamo ababi no kupishapo no mupeto wa kuwirako ing'ano ²⁷ Umupashi wa muntu e musaniko wa kwa Yahweh, uurengura fyonse ifya mukati na nkati kwa kwe. ²⁸ Ikitemwiko kitapwa ne kishinka firinda imfumu; ikipuna kyaiko kyarikingirirwa ne kitemwiko. ²⁹ Ururumbi rwa barumendo maka yabo no bukindami bwa bakote nimfwi shabo. ³⁰ Ukumaurwa ukukita ifironda kufumyapo ububi ne mpumi shiwaminisha ifya munda.