¹ Amapainda ya kwa Soromoni umwana mwaume wa kwa Davidi, imfumu ya bena Israeri. ² Aya mapinda ya kufunda amano no kusarapura, ku kufunda amshiwi ya nsosero sha mano, ³ pakuti mwingapokerera ukusarupurwa ku kumurenga ukwikara mukukita ikyarungama, umuringanaya, no kwabura umukishanya. ⁴ Aya mapinda na kabiri kuti yapera amano ku mburwa mano, kabiri kuti yapera ukwishiba no kwiruka kwa kukita ifintu ku bana banono. ⁵ Rekeni abantu bamano bomfwe no kurundako amasambiriro yabo, kabiri rekeni na bantu abakwata ukwiruka bakwate ukutungururwa, ⁶ ku kumfwa amapinda, insosero, na mashiwi ya bantu ba mano na mutunyongandimi twabo. ⁷ Akatina ka kuri Yahweh ekutendeka kwa kwishiba rero ifipuka fyena fisura amano no kusapurwa. ⁸ We mwana mwaume wandi, umfwa ukusarapurwa kwa kwa wiso kabiri wisura amafunde ya ba noko, ⁹ fikaba ngo murongo wa maruba ku mutwe obe kabiri nge mi nyororo iya ku wamya umukoshi obe. ¹⁰ We mwna mwaume wandi, nga kya kweba ati aba bebumba baesha ukukuntuka mu membu shabo, webo wisumina. Nga bakweba ati, ¹¹ ''Isa pamo na fwebo, natuye kuraririrepo umurapo, iseni tuberame no kasansa umuntu wa kaere apabura umurandu. ¹² Iseni tubakibure abatunturu, nga firya inindi isenda abari abatunturu, kabiri no kubakita kwati baponena ku kirindi. ¹³ Turi no kusanga ifyuma ifyakindama, tukesusha amayanda yesu kufyo tukatapa ukufuma kuri bambi. ¹⁴ Posa ikipindwiro kyobe muri fwebo; turi no ku kwata bonse tumba umo.''- ¹⁵ we mwna mwaume wandi, tekwesha ukwenda nabo munshira; wirareka amakasa yobe ukunyanta umo barepita; ¹⁶ amakasa yabo yabutukira ku kukita ububi no kwangufyanya ku kusumya umuropa. ¹⁷ Pantu kuikyusha fye ukuteya isumbu uku ne kyoni ikiri kyonse kirebonako. ¹⁸ Aba baume bararirira mu kurorera mu miropa yabo- bapekanya ne fya kuirofeshako abene beka. ¹⁹ Efyaba inshira sha kira umo uunonka ukubomfya ubukyenjeshi; ubukyenjeshi eburofya ne myeo yabo mufyo banonka. ²⁰ Amano yabirikisha mu musebo, asansura ishiwi mu rubansa kanakashi; ²¹ ku mpera ya misebo iya kina bwingi arebirikisha, na pa kwingirira ku musumba arebirikisha. ²² ''Kufika rirari, mwe bantu bakubura amano, ukutemwa ukukana burwa amano kwenu? Mwe batumfya, mukafisha rirari, ukusekera mu kutumfya, kabiri mukafisha rirari, mwebo mwe mburwa mano, ukupata abamano? ²³ Bikeni amano kufyo na ramukaripira; ndino kupongorora ifyaba mu matontonkanyo yandi kuri mwebo; nkarenga amashiwi yandi ukwishibikwa kuri mwebo. ²⁴ Nari mukuta, na mwebo mwarikana ukumfwa; narifungurwire ukuboko kwandi, rero takwari nangu umo uwasakamene. ²⁵ Rero mwasurire ifyo naremusarapura kabiri mwakene no kusakamana kufyo naremurungamika. ²⁶ Na nebo nkaseka munshita ya maya yenu, nkaramitumfya iryo umwenso ukesa pari mwebo- ²⁷ iryo umwenso ukesa pari mwebo kwati kipunta no bonaushi bwafika pari mwebo nga kankungwara, iryo amakyushi na masakamika fikaba pari mwebo. ²⁸ Kabiri bakanjita, rero nshakasuke; bankamfwaya, rero tabakansange. ²⁹ Pantu baripatire ukwishiba kabiri tabasarire ukukwatira Yahweh akatina, ³⁰ barekana ukupandwa amano kwandi, kabiri basurire na kufyo narebakaripira. ³¹ Bakarya ifisabo fyamibere yabo, kabiri bakekukishiwa kufyo bakotontonkanya. ³² Pantu ukuruba kwa baburwa amano kubaretera imfwa, no kupusauka kwa fipuba ku kabonaura. ³³ Rero onse uukutika kuri nebo ari no kwikara bwino ari no kutusha bwino ukwabura no mwenso wa kutina.''