¹ Eryo Yobo ayasukire kabiri asosere ati, ² "Mukine naishiba ukutira iki kiri ififine. Nomba bushe umuntu kuti aba shani mubororoke na Resa? ³ Nga arefwaya ukunsana na Resa, tengamwasuka nangu muku umo mu miku amakana ayengi. ⁴ Resa arishirimuka mu mutima kabiri wa maka mu burumba; nani waikosha umwine kuri ye no kukwanisha- ⁵ uyo uusesha impiri ukwabura ukukyengyesha nangu umo nga ashipiribura mu bukari bwakwe- ⁶ uyo uusunkanya ikyaro ukufuma pa nkyende yakiko no kusunkanya inkyenshi ishaikatirira. ⁷ Ni Resa umo wine uweba akasuba ukuna barika, kabiri kabara, uufimba pa ntanda, ⁸ uwanshika imyuru umwine no kutararika amaba pari bemba, ⁹ uurenga Ikiburi, Orion, ama pleiades, no kubungana kwa ku masamba. ¹⁰ Akite fintu ifikuru kabiri ifishingafwarishiwa, ne fintu ifyakupapa ifishingapendwa. ¹¹ Bona, enda nanebo, rero Nebo nshimubona; kabiri arapita, rero Nshimubwenesha. ¹² Nga asendapo fimo, nani engamukanya? Nani engasosa kuri ye ati, 'Finshi urekita?' ¹³ Resa takafumyepo ubukari; bakafwa bakwa Rahabu bamukontamine panshi. ¹⁴ Nifinga kanshi ningamwasuka, bushe nsare amashiwi ya kuranshanya na ye? ¹⁵ Nangura nari umurungami, Nshingamwasuka, Kuti narombafye inkumbu na kapingura wangi. ¹⁶ Nangura narikutire na ye aringasukire, Nshingasumina ukuti arekutika kwi shiwi ryangi. ¹⁷ Pantu aramputura umupwirapo no kufusha ifironda fyangi ukwabura umurandu. ¹⁸ Tansumisha ukubwesha umupu wangi; rero angisushamo ubukari. ¹⁹ Nga rashi rya maka, bona, wa maka! nga ryashi rya muringanya, nani engamufinsha? ²⁰ Ngangura ndi mubororoke, akanwa kangi kakanseka; kabiri nga ndi uwabura akarema, amashiwi yangi yakantunga ukuba uwakaere. ²¹ Ndi uwabura akarema, rero Nshiisakamana ne mwine; Nsura umweo wangi. ²² Takipanga ubupusano, ekyo ndesosera ati onaura abantu ababura akarema pamo na babembu. ²³ Iryo ubwembya kuri perepere bwaipaya, aseka abakyusha abakaere. ²⁴ Ikyaro kyariperwa mu minwe ya bantu ababembu; Resa esara ifinso fya bakapingura bakiko. Nga te uyo akita iki, nomba nani uyo? ²⁵ Inshiku shangi shifurumuka ukukira katwara wa mbira uurebutuka; inshiku shangi nashibutuka; tashibona ubune ukuri konse. ²⁶ Shibutuka ngo bwato bapangia amatete ya papyrus, kabir nga kapumpe areya mukufuba ikyakurya. ²⁷ Nga nasosere ati nkarabako ku kuirishanya kwangi, ukuti nkafumyapo uburanda pa menso yangi o kusansamuka, ²⁸ Nkatina ukurosha kwangi konse pantu naishiba ukuti tawakambone uwakaere. ²⁹ Nkasekwa; kinshi, nomba, bushe ingyeshe pafye? ³⁰ Nasambire ne mwine na menshi makasa kabiri narengere amaboko yangi ukuba ayabusaka, ³¹ Resa kuti afyampura mukirindi, ne fyakufyara fyangi fikankana. ³² Pantu Resa te muntu, ngefyo ndi, ukuti kuti namwasuka, ukwebati kuti twaya bonse mukirye. ³³ Tapari kapingura pa kati kesu uwingatambarika amaboko yakwe pari fwebo babiri. ³⁴ Takuri naumbi kapingura uwingasenda inkonto yakwa Resa ukufuma kuri nebo, uwingareka ukuntinya. ³⁵ Nomba bushe kuti naranda no kukuna mutina. Rero ngefyo ifintu firi na nomba, Nshingakita iki.