¹ Nomba abo abari abaikye pari nebo tabakwete nangu kimo kanofye ukupumya pari nebo-aba abaikye abo bashibo ningaresha ukusuminisha ukubomba ku mbwa sha pafitekwa fyandi. ² Mukinefye uburamba bwa maboko ya bashibo, finshi fingangafwa-abaume abo uburamba bwa kukura kwa myaka yabo nayapwa? ³ Baryondere ku kipowe ne nsara; baresuma pa mushiri wauma mu matororo na mukiswebebe. ⁴ Bareputura ifimuti fya mukyere na mabura ya mpanga; imishira ya fipyango e yari fyakurya fyabo. ⁵ Babafumishe mu bantu ababapundirire ngefyo bapundirira kaborara. ⁶ Eikyo baikere mu marungu, mukyengo na mu mabwe. ⁷ Babirikisha mu mpanga nga ba punda kabiri bakorongene pamo mu mishitu. ⁸ Bari bana baume bafipumbu, mukine, abana baume ba bamunshirumburwa! Ba bafumishe mu mpanga na membya. ⁹ Rero nomba nasanguka umutwe wa rwimbo rwabo; Nasanguka ikyakurandapo kuri bo. ¹⁰ Nabansura no kwiminina apari na nebo; tabarereka no kufwisa amate pa menso yandi. ¹¹ Pantu Resa nakakura inkakisho ku fikakiro fyandi no kunkyusha, na abo abampatire nabamposa ukufuma ku kinso kyandi. ¹² Kukuboko kwandi ukwa kukuryo kwaima bukipondoka; nabangimya no kundarika pa mupiri wa fisoso fyabo. ¹³ Naboaura inshira yabo; basunka ikinkunka kuntanshi yandi, abantu tabakwete no wakbaresha. ¹⁴ Besa kuri nebo nge bumba rya bashirika ukupitira mukipunda kya kibumba kya musumba; mukati ka bonaushi bendera muri nebo. ¹⁵ Umwenso naupiribukira pari nebo; ubukindami bwandi bufumishiwepo ngo mwera; ubunonshi bupwire nge kumbi. ¹⁶ Nomba umweo wandi urefuma muri nebo; inshiku ishingi ishakukyura shiri pari nebo. ¹⁷ Mu bushiku amafupa muri nebo yarekokota; ubukari uburensuma taburetusha. ¹⁸ Ukupatikisha kwakwa Resa ukwa maka nakuputura ukufwara kwandi; kunshingurwike nge kyakufwa kyandi. ¹⁹ Namposa mu matipa; Nsangwike ngo rukungu ne mito ²⁰ Naririra kuri mwebo, Resa, rero tamungasuka; Naiminina, rero tamurendoreshapo. ²¹ Namupiribuka no kuba umbi mumbo kuri nebo; ku maka ya kuboko kwenu e ko mumpakashire. ²² Mwangimishe mu mwera no kurenga wena unsende; mwamposere uku no uku mu ki mwera. ²³ Pantu narishiba ati mukandeta ku mfwa, ku ng'anda iyo yasonterwa kuri bonse aba mweo. ²⁴ Eikyo, bushe umo arafisha ukuboko kwakwe mu kuromba ubwafirisho nga awa? Bushe takwaba uuri mu bwafya ukukuta ku bwafwirisho? ²⁵ Bushe nsharirireko uyo uwari mu bwafya? Bushe nsharungurukireko umuntu uwarekabira? ²⁶ Iryo nari ne subiro pa busuma, eryo ububi bwaishire; iryo narorere urubuto, imfimfi yaishire. ²⁷ Umutima wandi naukyushiwa kabiri tautusha; inshiku sha kukyura nashisa pari nebo. ²⁸ Ngire nga umo uwareikara mu mfimfi, rero te pa murandu wakasuba; Naiminina parwarara no kuririro bwafwirisho. ²⁹ Ni nebo ndume wa ba mumbwe ne mbuni. ³⁰ Inkanda yandi naifita kabiri irepona ukufuma kuri nebo; amafupa yandi nayapya ne kikabirira. ³¹ Eikyo ifirimba fyandi fipiribukire ku nyimbo sha kurosha, ne nsare shandi ku nyimbo shaurerira.