¹ Yobo arikonkenyepo ukuranda kabiri asosere ati, ² "Kinefye ifyo Resa aba uwa mweo, uufumishepo umuringanya wandi, Uwa maka yonse, uurengere ubwikashi bwandi ukurura, ³ iryo umweo wandi uri muri nebo, no mupu ukufuma kuri Resa uri mu myona yandi, ifi efyo ndi no kukita. ⁴ Imiromo yandi tayakarande fyabupondamishi, nangu ururimi rwandi ukuranda ifyabufi; ⁵ Nshakasumine ukweba ati mwebo batata namurungika; mpaka ukufwa kwandi nshakakane bumpomfu bwandi. ⁶ Nkekatisha uburungami bwandi nshakabureke bukaye; amatontonkanyo yandi tayakansebanye inshiku shonse isha mweo wandi. ⁷ Rekeni umurwani wandi abe ngo mubifi; rekeni no yo uwanfinina abe ngo muntu wabupondamishi. ⁸ Risubiro nshi umuntu uwabura Resa akwata iryo Resa amupatururako, iryo Resa akasenda umweo wakwe? ⁹ Bushe Resa akomfwa ukurira kwakwe iryo amafya yakesa pari ye? ¹⁰ Bushe akasansamukira mu Wa maka yonse kabiri no ku kuta kuri Resa inshita shonse? ¹¹ Nkamifunda ifikumine ukuboko kwakwa Resa; nshakafise amatontonkanyo ya Wa maka yonse. ¹² Boneni, bonse namubona ifi mwebene; ninshi nomba mwarandira ifi fyonse ifyabungwa? ¹³ Iki e kyakaniko kya muntu umubifi kuri Resa, ikikwatwa kya bamutitikisho ikyo apokerera ukufuma ku Wa maka yonse: ¹⁴ Abana bakwe nge basanduruka, bafirirafye urupanga; na bana bakwe tabakakwatepo ifyakurya ifingi. ¹⁵ Abo abakasharapo bakashikwa ku kikuko na bamukamfwirwa babo tabakabaroshe. ¹⁶ Nangu umuntu umubifi aturika sirufere ngo rukungu, no kuturika ifyakufwara kwati ribumba, ¹⁷ kuti aturika ifyakufwara, rero abantu abarungami bakafifwara na bantu abakaere e bakakana sirufere umo baberere abene, ¹⁸ Akura ing'anda yakwe kwati ni tandabube, kwati mutanda urya umurinshi apanga. ¹⁹ Arasendama mubusanshi umukankara, rero takatwaririre ukukita ifyo; e sura amenso yakwe, no kusanga fyonse nafiya. ²⁰ Umwenso wa mukungura kwati menshi; ikipupu kiramusenda ubushiku. ²¹ Umwera wa ku kabanga wa musendaika, na ye aya; aramupyanga ukumufumya pa nkyende yakwe. ²² Kiraiposa pari ye kabiri takireka; areshako ukuipasha ku kuboko kwa kiko. ²³ Kiratotera amaboko ya kiko pari ye no ku murishisha ikiunda ukumufumya pa nkyende yakwe.