¹ Eryo Elifazi umwina Temani aayasukire kabiri asosere ati, ² ''Bushe umuntu wa mano kuti abomfiwa kuri Resa? Bushe umuntu uwakyenjera kuti ayafwafye umwine? ³ Bushe kintu nshi e nga mwenapo umwine Uwa maka yonse e ngasanga mu bororoke bobe? Bushe nangu ukunonkerapo pa mibere yobe iyakaere? ⁴ Bushe ni pa muranda wakuti wari mupetamina kuri ye ukuti engakukaripira no kukusenda ku bupingushi? ⁵ Te pa murandu wa bubifi bobe ubukuru? Bushe takwaba impera ku mampuru yobe? ⁶ Pantu urefwaya ifikakiro ukufuma kuri ndume yobe apabura umurandu, kabiri naufumyapo ifyakufwara ukufuma ku bwamba. ⁷ Taupere amenshi ku bantu abanakire ku kunwa; naufumyapo umukate ukufuma ku bantu abari ne nsara ⁸ nangura webo, umwaume wa maka, waripyana isonde, nangura webo, umuntu wakindama, warikeremo. ⁹ Nautamfya ba mukamfwirwa ukwabura akari konse; amaboko yababura bawishi nayatobaika. ¹⁰ Eikyo, ifiteyo nafikushinguruka, no mwenso urekushupa. ¹¹ Pari imfimfi, pakweba ati taurebona; amenshi ayengi nayakufimba. ¹² Bushe Resa taba mu muru umwasansama? Roresheni ubutari bwa ntanda, ifyo shaba! ¹³ Muranda ati, 'Finshi ifyo Resa aishiba? Bushe kuti apingura ukufuma mu mfimfi yatikama? ¹⁴ Amakumbi yatikama nayamufimba, pakweba ati taretubona; endera mu muru. ¹⁵ Kuti wasunga inshira shakare isho ababifi ba baume baenderemo- ¹⁶ bonse abo abasenderwe iryo inshita yabo tairafika, abo ebo imifura yabo yasendwa nge mironga, ¹⁷ abo abasosa kuri Resa ati, 'Fuma kuri fwebo'; abo abasosere ati, 'Finshi ifyo Uwa maka e ngakita kuri fwebo?' ¹⁸ Rero esusha amayanda yabo ne fintu fya bune; amapange ya bantu ababifi yaba ukutari ukufuma kuri nebo. ¹⁹ Abantu abarungami babona ubuyo bwabo no kusangarara; bantu bakaere barabaseka ku kubapumya. ²⁰ Baranda ati, 'Mukine abo abemina fwebo bariputwirwe; umuriro warofeshe ifikwatwa fyabo.' ²¹ Nomba suminishanyeni na Resa kabiri beni no mutende na ye; muri iyo nshira, ifya bune fikesa kuri mwebo. ²² Pokerereni, ndemipapata, ukwarurwa ukufuma ku kanwa kakwe; bikeni ifyebo fyakwe mu mutima wenu. ²³ Nga mwabwererera ku Wa maka yonse, mukakurwa, nga mwabubika ububifi ukutari ukufuma ku ma tenti yenu. ²⁴ Bikeni ifipao fyenu panshi mu rukungu, ikipao kya goride pa mabwe ya mironga. ²⁵ eryo Uwa maka yonse akaba ikipao kyenu, silfere wa bune kuri mwebo. ²⁶ Pantu iryo mukasanga ubune mu Wa maka yonse; mukasansamwina ifinso fyenu kuri Resa. ²⁷ Mukapepa kuri ye, kabiri akamyumfwa; mukarapa kuri ye. ²⁸ Kabiri mukapampamika ikiri kyonse, kabiri kikakitika kuri mwebo; urubuto rukabengeshima mu nshira shenu. ²⁹ Resa araponya umuntu uwaisansabika, kabiri asungirira umo uyo uwaisara amenso yakwe. ³⁰ Akapusha no muntu utari wakaere; akapusuka ukupitira ku minwe yabo iyasanguruka.''