¹ Eryo Eriphazi umwina Tema ayasukire kabiri asosere ati, ² "Bushe umuntu wa mano kuti ayasuka ifyabura bwishibiro no kwisusha umwine no mwera wa kukapinda ka kukuryo? ³ Bushe kuti aranda insosero shabura ubuyo nangu ifyakuranda ifyo ashingakita bwino. ⁴ Ikinefye, wakyefya umukinshi kuri Resa; wafurunganya amapepo kuri ye, ⁵ pantu amampuru yobe yafunda akanwa kobe; usara ukukwata ururimi rwa muntu wa sarapuka. ⁶ Akanwa kobe karakuseka, te kandi; ikine, imiromo yobe yarakushinina. ⁷ Bushe ni webo wabarirepo ukufyarwa? Bushe wabikirwepo iryo takuraba imirundu? ⁸ Waryumfwa inkama ya bwishibiro bwa kwa Resa? Bushe urekyefya amano kuri we mwine? ⁹ Finshi waishiba ifyo tatwaishiba? Finshi waumfwa ifishiri na muri fwebo? ¹⁰ Kuri fwebo kwaba amandare na bakuru sana ukukira na bawiso. ¹¹ Bushe ukukosorwera kwa kwa Resa kwakyepa kuri webo, amashiwi ya mutembo kuri webo? ¹² Ninshi umutima obe ukusendera? Ninshi amenso yobe yakapira, ¹³ ukweba ati upiribure umupashi obe kuri Resa no kufumya ayo mashiwi mu kanwa kobe? ¹⁴ Wanshi umuntu ukuti e ngabutishiwa? Wanshi uyo uwafyerwe ku mwanakashi ukweba ati engaba umuroroke? ¹⁵ Bona, Resa tabika isubiro nangura ni muri barya abamushiro; ikinefye, imyuru tayabutishiwa mu kubona kwakwe; ¹⁶ kanshi aramba shani umo uyo uwamuseru no bubi, umuntu uunwa amampuru nga amenshi! ¹⁷ Nkakuranga, kutika kuri nebo; Nkabirisha kuri webo ifintu nabona, ¹⁸ ifintu ifyo abantu ba mano baposere ukufuma kuri bashibo, ifintu ifyo ifikorwe fyabo tafyafishire. ¹⁹ Ifi efikorwe fyabo, kufyo kweka impanga yaperwe, kabiri muri bo umo umweni tapitire. ²⁰ Umuntu umubembu mukukaripwa emo apwishishwa inshiku shakwe, inshiku sha myaka shaperwa ku ukyusha ku kukyura. ²¹ Ikiunda kya mwenso kiri mu matwi yakwe; neryo ari mubunonshi, konaura akesa pari ye. ²² Tatontonkanya ati akabwera ukufuma mu mfimfi; urupanga ruremurora. ²³ Aya ku nkyende ishapusana ku mukate, aresosa ati, 'Uri kwi?' Arishiba ukuti ubushiku bwa mfimfi muri mupepi. ²⁴ Ukurosha no kukaripwa firemutinya; fimushinguruka, nge mfumu ireya ku burwi. ²⁵ Pantu namina Resa no kukita amatutuko ku Wa maka yonse, ²⁶ uyu muntu mubembu abutukira pari Resa no mukoshi uwaumarara, ne kya kukingirira ikyatikama. ²⁷ Iki kishinka, nangura aifimba ikinso na mafuta yakwe kabiri akorongaka amafuta pa musana wakwe, ²⁸ kabiri aikara na mumisumba yataruka; mu mayanda umo nangu umo tekaramo rero kabiri ishaipekanya ukusanguka ifitantara. ²⁹ Takabe umukankara; ubunonshi bwakwe takatwaririre ne fikwatwa fyakwe tafyakaye mpanga yonse. ³⁰ Takafume ku mfimfi; umuriro ukomika amashinte yakwe; pa kupema kwa kanwa kakwa Resa akaya. ³¹ Mwimureka ukukyetekera mufintu fyafye, ukuitumpika umwine; pantu ifyafye e kirambu kyakwe. ³² Kikakitika iryo inshita yakwe tairapwa; imisambo yakwe tayakabe katapa katapa. ³³ Akasaba ifisabo fyakwe ifibishi nge bara rya ma grape; akaputaura amaruba ngo muti wa mu orife. ³⁴ Pantu abantu abashipepa bakaba kiswebebe; umuriro ukokya amatenti yabo aya mafisa kanwa. ³⁵ Bemita urubembu no kufyara amampuru; inda shabo shimita ubufi."