¹ Eryo Yobom ayasukire kabiri asosere ati, ² "Ukwabura ukutwishika muri bantu; amano yakabepa na mwebo. ³ Rero nakwata ukufwa nga mwebo; Nshikyeperepo pari mwebo. Mu maka, nani ushaishiba ifi fintu nge fi? ⁴ Ndi kyakusekapo ku bena muparamano- Nebo, umo uwakutire pari Resa kabiri uwayasukirwe na ye! Nebo, umuntu umurungami kabiri uwabura akarema- Nebo ndi kimo ikyakusekapo. ⁵ Mu matontonkanyo ya umo uuri mukutusha, kuri ukususha kwe shamo; atontonkanya mu nshira iireta amashamo ayengi kuri bo abo amakasa yabo yareipununa. ⁶ Ama teti ya bakapomwe yarasangarara, nabo abakarifya Resa bayumfwa ukukingirirwa; amaboko yabo e tu resa twabo. ⁷ Rero nomba ipusha inama, nasho shikakufunda; ipusha ifyuni fya murwerere, fikakufunda. ⁸ Nangu randa ku kyaro, na kyo kikakufunda; isabi rya muri bemba rikaranda kuri we. ⁹ Ninama nshi pari ishaishiba ukuti ukuboko kwakwa Yahweh kwarikita iki? ¹⁰ Mukuboko kwakwe mwaba umweo wa kipema kyonse no mupu wa muntu onse. ¹¹ Bushe ukutwi takwesha amashiwi ngefyo ikiponshi kyesha ifyakurya? ¹² Mu bakote mwaba amano; mukufura kwa nshiku mwaba ukumfwikisha. ¹³ Muri Resa mwaba amano no rupaka; akwata ukufunda no kumfwikisha' ¹⁴ Boneni, aratobaura, kabiri takingakurwa nakabiri; nga akaka umo, takwingaba uwingamukakura. ¹⁵ Boneni, nga aikatirira amenshi, yaroma; nga ayatuma, yarabomfya impanga. ¹⁶ Muri mwaba amaka na mano; abantu ababepekwa na kabepa bonse baba muri ye. ¹⁷ Atungurura abakafundisha ukya na amakasa mu buranda; apiribura abapigushi mu fipumbu. ¹⁸ Apokorora iminyororo ya maka ukufuma ku sha mfumu; abakaka ikisaru mu misana shabo. ¹⁹ Atungurura ba shimapepo ukuya na amakasa mu buranda no kupasa abantu barupaka. ²⁰ Afumyapo ukuranda kwa abo abakindikwe no kupoka ukufmwikisha kwa bakiroro. ²¹ Apongorora ukusurwa ku bana banakashi ba bufumu no kukakurura imishipi ya bantu abakosa. ²² Asokorora ifyafisama ifya mumfimfi no kureta ikimfute kyashika pa rwarara. ²³ Arenga inko amaka, kabiri no kushonaura; Arakusha inko, no kubatungurura muri bu nkore. ²⁴ Apokorora ukumfwikisha ku ntungurushi sha bantu ba kyaro; abarenga ukurubanta mu matororo umushiri inshira. ²⁵ Bapampata mu mfimfi ukwabura urubuto; abarega abarebeshi ngo muntu ukorerwe.