¹ Yaweh asosa ifi: Boneni, Ndeimya umwera wakonaura pari Babironi na pari abo bonse abekara mu Reb Kamai. ² Nkatuma abarebeshi ku Babironi. Bakapasa no konaura impanga yakwe, pantu bakawimina ukufuma konse pa bushiku bwa makyusho. ³ Mwireka uwa mata akane mu buta bwakwe; efwara fyakukinga umubiri wakwe. Mwireka abarumendo bakwe; onaureni abashirika bakwe bonse. ⁴ Pantu abantu abakyenwa bakawa mu mpanga ya bena Karideya; abo abaraswa bakawa mu musumba. ⁵ Pantu Israeri na Yuda tabarekereshiwa kuri Resa wabo, Yaweh wa mabumba, nangura impaga yabo yaisura ne mrandu yakitire kuri Umo uwa Mushiro wakwa Israeri. ⁶ Furumukeni pakati ka Babironi; rekeni kira umo aipusushe umwine. Mwifwira mu ma mpuru yakwe. Pantu ninshita ya kwa Yaweh iyakurandura. Akaripira fyonse kuri ye. ⁷ Babironi ari rukombo rwa goride mu minwe ya kwa Yaweh iyarengere isonde ryonse ukunwa; inko shanwine umwangashi wakwe kabiri shasangukire amashiru. ⁸ Babironi aawa mukukapakapa no konaurwa. Muweresheni! Mupereni umuti mukukaripwa kwa kwe; epari apora. ⁹ 'Twarefwaya ukundapa Babironi, rero taporere. Natumushe no kuya, ku mpanga yesu. Pantu ukupingurwa kwa kwe nakufika ku muru; kwasumburwa na mu makumbi. ¹⁰ Yaweh nasokorora insambu shesu. Iseni, naturondorore mu Sioni ukubomba kwa kwa Yaweh Resa wesu.' ¹¹ Songoreni imifwi no kusenda inkwera. Yaweh arekumbaura umupashi wa mfumu ya bena Media mukwanshika kwa konaura Babironi. Uku kurandura kwa kwa Yaweh, ukurandura kwa ,konaura irtempere ryakwe. ¹² Sansureni amaring ya bena Babironi iramfya; koseresheni bakarinda; bikenipo bamaronda; teyanyeni aba kundiririra; pantu Shikuru akakita ikyo asosere parwa bekashi ba mu Babironi. ¹³ Mwebo mwe bantu baikara mu tumana utwingi, mwebo mwe bantu abanonshi mu kyuma, impera yenu naisa. Umweo wenu nauputurwa. ¹⁴ Yaweh wa mabumba arapire pa mweo wakwe, 'Nkamisusha na bantu kwati ni bamakanta, kabiri bakemya inkondo pari mwebo.' ¹⁵ Apanga ikyaro ku maka yakwe; apampamika isonde ku mano yakwe. Ku mukyetekanya wakwe eko ayanshikira imyuru. ¹⁶ Nga aburukuta, kuri ukurira kwa menshi mu myuru, pantu atuma umutonshi ukufuma ku moera ya kyaro. Apanga ikuba ukufuma ku mfura no kutuma umwera ukufuma ku mwakututira mwa iko. ¹⁷ Umuntu onse nasanguka ikipumbu, ukwabura ukwishiba. Onse uupanga ifyera narengwa insoni ku tu rubi twakwe. Pantu uturubi twa fyera fyakwe turemubepa, kabiri tamwaba mweo muri twena. ¹⁸ Twafye, imirimo ya bakapumya; bakonaurwa pa nshita ya bupingushi bwabo. ¹⁹ Rero Resa, ikyakaniko kya kwa Yakobo, takiri nga ifi, pantu ni karenga wa fintu fyonse. Israeri ekikwatwa kyakwe; Yaweh wa mabumba eshina ryakwe. ²⁰ Niwe nondo yangi, ikyakurwirako mu nkondo. Kuri webo nkonawirako amabufumu. ²¹ Kuri webo nkonawirako bakafwaro na babensha; kuri webo nkonawirako amakyereta na banamutekenya babo. ²² Kuri webo nkonawirako umwaume onse no mwanakashi; kuri webo nkonaawirako abakote na baikye. Kuri webo nkonawirako abariumendo na bakashana banakisungu. ²³ Kuri webo nkoanwirako bakakyema ne mpanga shabo; kuri webo nkonawirako abarimi na mabumba yabo. Kuri webo nkonawirako amabuteko na bakiroro. ²⁴ Pantu mu menso yenu nkapera Babironi na bonse abaikaramo abena Karideya pa bubi bonse ubo bakitire mu Sioni-uku ekuranda kwa kwa Yaweh. ²⁵ Bona, nakwarukira, we rupiri rwa bonaushi-uku ekusosa kwa kwa Yaweh-weonaura ikyaro kyonse. Nkatamburura ukuboko kwangi pari webo, no ku kwansura no ku kurenga pabura urupiri. ²⁶ Pakweba ati tabakaburepo iribwe nangu rimo ukufuma kuri webo uku kurira ikifutu kya kikurwa nangu umufura; pantu ukaba ikipomoka kya muyayaya-uku e kuranda kwa kwa Yaweh. ²⁷ Sansureni iramfya pa kyaro. Risheni inandara pa nko. Kuteni iko ukumusansa: ubufumu bwa Ararati, Minini, na Ashikenashi. Sonteni umukaramba pa kumusansa; reteni bakafwaro nga bamakanta. ²⁸ Teyanyeni inko ku kumusansa: Imfumu sha bena Media na mabuteko yakwe, bakiroro bakwe bonse ne mpanga shonse ishaba mubutungurushi bwakwe. ²⁹ Ikyaro kyatenta no kushikitika, pantu Yaweh napanga ukukonkanyapo ukwarukira Babironi, ku kupanga ikyaro kya Babironi amapopa umushaba no mwakwikara. ³⁰ Abashirika ba mu Babironi nabareka ukurwa; baikara mu makyere yabo. Amaka yabo nayapwa; basangwikefye abanakashi-amayanda yakwe yari mu muriro, imipindo ya mpongoro shakwe nashitobaika. ³¹ Keberera abutuka ku kweba keberera munankwe, no warubiro abutuka ku kwebo wa rubiro munankwe ukya eba imfumu ya Babironi ukweba ati umusumba wakwe nausendwa ukufuma ku mpera na ku mpera. ³² Ifyabu nafifumbatwa; umurwani areokya amatete, na baume ba burwi aba mu Babironi basobana. ³³ Pantu Yaweh wa mbaumba, Resa wa kwa Israeri asosa iki: Umwana mwanakashi wa kwa Babironi ari nge kya kunyantapo. Ninshita yakumunyantaura. Mukashitafye akanono inshita ya busomboshi yaraisa kuri ye. ³⁴ 'Nebukadenesari imfumu ya Babironi andya, namfurunganya no kunenga ukuba nge kipe ikyaburamo nangu kamo. Namina nga kishiweshimwe kya muri bemba, naisusha ne fya marira yangi munda yakwe, kabiri namfwisa.' ³⁵ Umo uwikara mu Sioni akasosa ati, 'Ububi ubwakitikire kuri nebo no mubiri wangi bube pari Babironi.'Yerusaremu akasosa ati, 'Umuropa wangi naube pa bekashi ba mu Karideya.' ³⁶ Eikyo Yaweh asosa iki: Ndi no kupapatira umurandu wenu no kureta ikirandushi pari mwebo. Pantu nkomika amenshi ya Babironi no kurenga utumfukumfuku twakwe ukukama. ³⁷ Babironi akasanguka imina, ubuteko bwa bamumbwe, ikyamakankamike, kabiri ikya kuitomona umushaba umwakwikara. ³⁸ Abena Babironi bakaburuma nge misepeera ya nkaramo. Bakaburuma nga bana bankaramo. ³⁹ Mukubirima kwabo, eryo nkabapekanishe fya kunwa; Nkabarenga ukunwa pakuti bakasangarare eryo bakarare uturo utwabura kupwa ukwabura ukubuka-Uku ekuranda kwa kwa Yaweh- ⁴⁰ Nkabatentemushisha ku kwipaiwa nga bana ba mpanga, nga basukusuku na ba sawe. ⁴¹ Ifyo Babironi aikatwa! Kanshi ammarumbo ya kyaro kyyonse nayekatwa. Ifyo Babironi asanguka ikyamakankamike mu nko. ⁴² Bemba naisa pari Babironi! Afimbirwe na mabimbi yareburuma. ⁴³ Imisumba yakwe isangwike amapopa, impanga yauma kabiri ikiswebebe, ikyonde ikyabura uwakwikaramo, kabiri tamuri muntu uupitamo. ⁴⁴ Nkakanda Bere mu Babironi; nkafumya mukanwa kakwe ifyo aminine, ne nko tashakarete ifyamabupe kuri ye. Ifibumba fya Babironi fikawa. ⁴⁵ Fumeni pakati kakwe mwe bantu bangi. Rekeni kira umo apusushe umweo wakwe ukufuma mukipyu kyangi. ⁴⁶ Mwireka imitima yenu itompoke nangu ukutina imbira iyumfwikire mu musumba, pantu imbira ikesa mwaka umo. Panuma ya ifyo mu mwaka wakonkapo kukaba imbira, ne kimfurunganya kikaba mu musumba. Kateka akemina kateka. ⁴⁷ Eikyo, bneni, inshiku shireisa iryo nkakanda utwabaswa twa mu Babironi. Impanga yakwe yonse ikaba ne nsoni, nabonse abakepaiwa bakawa pakati kakwe. ⁴⁸ Eryo imyuru ne kyaro, na fyonse ifyabamo bakasangarara pari Babironi. Pantu ababoni bakesa pari ye ukufuma ku kapinda ka ku kuso-uku ekuranda kwa kwa Yaweh. ⁴⁹ Nge Babironi arengere abaipaiwe mu Israeri ukuwa, efyo nabakepaiwa mu Babironi bakawa. ⁵⁰ Mwebapusuka ku rupanga, kabiyeni! Miiminina. Kuteni Yaweh ku kumibukisha mwebari ukutari; rekeni Yaweh ese amibukishe. ⁵¹ Turi ne nsoni, pantu natutukana; insoni nashifimba ifinso fyesu, pantu abarebeshi nabengira umwashira mu ng'anda ya kwa Yaweh. ⁵² Eikyo, boneni, inshiku shires-uku ekuranda kwa kwa Yaweh-iryo nkakanda uturubi twakwe, na mukyaro monse mukatande ndase. ⁵³ Pantu ngefyo Babironi afikire na mu myuru nangura apasumbuka pakwe apangapo iringa, ababonaushi nga barihire kuri ye-uku ekuranda kwa kwa Yaweh. ⁵⁴ Inkuta yafuma mu Babironi, ukonaurwa kukaramba ukufuma ku bena Karideya. ⁵⁵ Pantu Yaweh areonaura Babironi. Arerenga ishiwi rikaramba ukuroba. Abarwani bakwe baburuma nga amenshi ayengi; ikyongo kyabo kyaba ikikaramba. ⁵⁶ Pantu abakonaura nabesa mukumurwisha- ukurwisha Babironi!-ne fita fyakwe nabafikata. Imifwi shabo nashisarangana, pantu Yaweh ne Resa wa kirandushi; kine kine akarandura. ⁵⁷ Pantu nkarenga abana bakwe na bamano bakwe ukukorwa, na babuteko, bakiroro, na bashirika bakwe. kabiri bakarara uturo twaburo kubuka-uku ekuranda kwa Mfumu: Yaweh wa mabumba e shina ryakwe. ⁵⁸ Yaweh wa mabumba asosa iki: Ifibumba fyatikama ifya kwa Babironi fikawa, ne mpongoro sharepa shikapya. Eryo abantu bakaraisa ku kumwafwa bakabombera apafye; fyonse ifyo inko shikesha ukukita fikapya." ⁵⁹ Iki e kyebo kya kwa Yeremiah kasesema akonkomeshe Seraiah mwana Neriah mwana Mahseiah iryo aire na Zedekiah imfumu ya ba Yuda ku Babironi mu mwaka warenga ine mu butekeshi bwakwe. Nomba Seraiah ari ni kiroro mukaramba. ⁶⁰ Pantu Yeremiah arirembere umufungiro pakinkunka kikeshira Babironi-aya mashiwi yonse yaremberwe pari Babironi. ⁶¹ Yeremiah asosere kuri Seraiah, "Nga waya ku Babironi, eryo ukabona no kuberenga aya mashiwi mukubirikisha. ⁶² Eryo ukasosa ati, "Yaweh, mwebo mwebene mwarandire ukuti mukonaura ino mpanga, kabiri no kutira takuri muntu nangura inama ukwikara muri ino mpanga, kabiri ikaba amapopa umuyayaya.' ⁶³ Eryo nga wapwisha ukuberenga uyu mufungiro, kakako akaribwe no kuposa pakati ka Euphrate. ⁶⁴ Sosa, 'Babironi akebira ngefi.Tayakeme pa murandu wa kinkunka ndetuma, kabiri bakawa."' Amashiwi yakwa Yeremiah yapwira pano.