¹ Ikebo kya kwa Yaweh kyaishire kuri Yeremiah kasesema urwa pa nko. ² Urwa Egypto: "Iki kya pa muraro wa kwa Farao Neko, imfumu ya Egypto uwari pa murandu wa Yufrata mu kakemishi. Uyu e murapo uyo Nebukadenesari imfumu ya Babere yakimfishe mu mwaka warenga ine uwa kwa Yehoyakimu mwana Yosiah, imfumu ya kwa Yuda: ³ Sendeni inkwera shinono ne shikaramba, no kutentemukira ku kurwa. ⁴ Kakeni na bakafwaro amaramba; kabiri ninenipo bikeni ne fimpompo pa mitwe yenu; wamyeni amafumo kabiri fwareni inkwera. ⁵ Bushe kinshi ndebona kuno? Batentuka kabiri babwerera inuma, ikyo abashirika babo nababapwisha. Barefurumuka nge mbutushi takauri no ureroresha ku numa. Ukutinya kuri konse konse. ⁶ Abarubiro tekuti bafurumuke, na bashirika tekuti bapusuke. Bataransukira ku kapinda ka kukuso no kuwira pa mbari ya Yufrata. ⁷ Bushe nani uyu waima ngo mu mana wa Naere, uyo amenshi ya yako yasunkana ngo mu mana? ⁸ Egypto aima nga Naere, nge mi mana ya menshi iima no kupona. Egypto atira, 'Ndeima no kufimbe kyaro nkonaura imisumba na bekashi baiko. ⁹ Kabiyeni, mwe bakafwaro. Karipeni, mwe ma kyereta. Rekeni abashirika bafume, abena Kushi na Puti, abantu abakanshiwa ne nkwera, na bena Rdudi, abakengera ukupose mifwi.' ¹⁰ Na buno bushiku e bushiku bwa kwa Yaweh wa miraro ubwakirandushi, kabiri akairandura umwine kufibamba fyakwe. Urupanga rwakwe ru reipaya no kwikuta. Rurenwa no muropa wabo. Pantu ku kaba ne rambo kuri Yaweh wa mabumba munkyende ya ku kapinda ka ku kuso pa mbari ya mu mana wa Yufrata. ¹¹ Nina kabiye ku Giridi we nakisungu Egypto, no kuse4nda umuti kurya uwa kukundapira. Wariikyusha we mwine pakufushanya imiti. Umo umushiri bundapishi. ¹² Ne nko nashumfwa ukusebana kobe. Ikyaro kyonse kyaisura inkuta yobe, pantu abashirika bareponena pa bashirika; na bonse bene barewiara pamo." ¹³ Iki e kyebo ikyo Yaweh asosere kuri Yeremiah kasesema iryo ebukadenesari imfumu ya Babironi yasanshire Egypto: ¹⁴ "Birisheni mu Egypto, kabiri birisheni mu Migdore, na mu Nofu, na mu Tapanesi, mutire, 'Aramukeni muyeipekanya, pantu urupanga rureonaura bonse abakunguruka monse monse.' ¹⁵ Nga kanshi kinshi ikyo imparume yobe bafurumukira? Tabakeminine nakarya, pantu Yaweh natandura bonse bene. ¹⁶ Arefusha ne mpendwa ya bataransuka. Kira mushirika awira ku mi=ubiye. Baresosa ati, 'Aramuka. Natureya ku mwesu. Natubwerere ku bantu ba ku mwesu, ku kyaro uko twafyarirwe, no kufuma mu rupanga rwabakukyurrusha. ¹⁷ Eryo babirikishe kurya, ati, 'Farao imfumu ya ku Egypto kyongofye, uwasha ne nshira yakwe. ¹⁸ Apo ndi no mweo-efyasosa imfumu, uwo ishina ryakwe ni Yaweh wa mabumba-na umo areisa ngo rupiri rwa Tabore no rwa Kamere kuri bemba. ¹⁹ Eikyo ipekanishisheni kipe ku kuya muri bunkore, we wikara mu Egypto. Pantu Nofu akonaurwa, akokyerwa kabiri tamwakabe mwikashi. ²⁰ Egypto kaombe akakota akawama, rero ikisuma kyaisa ukufuma ku kapinda ka ku kuso kareisa. ²¹ Na bashirika ba kuripia pakati kakwe bari nge fipinti fya ng'ombe ifyaina, fikaruka kabiri no ku butukira pamo. Nabo bene nafirwa ukushanshako, pantu na bubafikira ubushiku bwa finkunka, naibafikira inshita ya kukandirwapo. ²² Abena Egypto pa kufurumuka baresakunya nge nsoka, pantu na babeshira abarwani babo. Barebeshira kwati bantu abasansa inkuni na masembe. ²³ Bakatemaura ne mpanga iyatikama-nangura yaba iyatitikana-efyasosa Yaweh. Pantu abarwani bafura ukukira makanta, uushingapendwa. ²⁴ No mwana mwanakashi wa ku Egypto akarengwe nsoni. Akaperwa na mu minwe ya bant ba ku kapinda ka ku kuso." ²⁵ Yaweh wa mabumba, Resa wa kwa Israeri, efyo asosa, "Bona, ndi pakukanda Amoni wa mu Tebeshi, na Farao, Egypto na tu resa twakwe, ne mfumu shakwe ba Farao, na bonse abasumina muri bo. ²⁶ Eikyo ndebapera mu kuboko kwa bafwaya imyeo yabo, na mukuboko kwa kwa Nebukadenesari imfumu ya Babironi na babomfi baiko. Panuma yaifi kabiri Egypto akekarwamo nga ku nshiku sha kunuma-efyasosa Yaweh. ²⁷ Rero webo, we mubomfi wangi Yakobo, witina. Witerententa, we Israeri, pantu bona, ndi pa ku kupususha ukukufumya ukutari, no bufyashi bobe ukufuma mu kyaro kya bunkore. Yakobo akabwera no kuba umutererwe; kabiri umutende, ukwabura uwakututumya. ²⁸ Webo, we mubomfi wangi Yakobo, witina-pantu ndi nobe, efyasosa Yaweh, pantu nkakita ukupwisha mu nko shonse umo nakusaranganishe. Nomba webo nshakakupwishe, Rero nkakurimuna ukurimuna ukuyene no kukana kureka uyefye ukwabura ku kandapo."