¹ "Iseni, natubwekere kuri Yaweh, pantu ye narepura, rero akatuposha; natukyena, rero akatukaka pakironda. ² Eryo papita inshiku shibiri akatubukurura; akatubusha pa bushiku bwa butatu, tukekara pamo na ye. ³ Natwishibe Yaweh; natupose amano pari Yaweh. Ukwishiba kwakwe kuri nge mibengerere ya ku rukyero; kabiri akesa kuri fwebo nge mfura yakubarirapo, nge mfura ya numa iitapirisha umushiri." ⁴ Efremu, kinshi ndekukitira? Yuda, kinshi ndekukitira? Ikitemwiko kyobe nge kumbi rya rukyero, ngo mume uuya bwangu. ⁵ Eikyo ndibaputawire kuri bakasesema; ni mbepaya kwishiwi ryandi mukanwa kandi. Ubupingushi bobe buri ngo rubuto urureaka. ⁶ Mbekerwa mukipangano kya bukishinka te marambo awe, na mano yakwa Resa ukukira amarambo ayakokya. ⁷ Nga Adamu baonawire ikipangano; bari ababura ikishinka kuri nebo. ⁸ Giridi musumba wabakiya ububi, uwaikantaika no muropa. ⁹ Nga bakaborara abarerorera umuntu, bashimapepo bakito bubi munshira ya ku Shekemu; bakita imirandu ya musebanya. ¹⁰ Mu ng'anda yakwa Israeri ni mbona ifyatapa; ubukyende bwakwa Israeri ari uwakowera. ¹¹ Pamo nawebo, Yuda, ubusomboshi nabusontwa, eryo nkabwekesha bunkore bwa bantu bangi.