¹ Davidi aimbire Yahweh amashiwi ya uru rwimbo pa bushiku ubo Yahweh amupokorwere ukufuma mu maboko ya barwani bakwe, no kufuma mu maboko yakwa Shauri. ² Apepere ati, ''Yahweh e kiribwe kyandi, e kyubo kyandi, ena e umpokororako. ³ Resa e kiribwe kyandi. Nebo e mo ntushisha muri ye. E nkwera yandi, e rusengo rwe pusukiro ryandi, e nkosho yandi, kabiri e kyubo kyandi, e umpususha ku baruburi. ⁴ Nebo nkakuta pari Yahweh, e waringa ukurumbanishiwa na nebo nkapusushiwa ku barwani bandi. ⁵ Pantu amabimbi yamfwa ya rishingurwike, umukuku wa menshi uwabonaushi warentinya. ⁶ Imyando ya nshinshi nayimpomba; ifiteyo fya mfwa na finjikata. ⁷ Mukukyura kwandi nakutire kuri Yahweh; nakutire pari Resa wandi; na ye aumfwire ishiwi ryandi ukufuma mwi tempere ryakwe, no kukuta kwandi ukwabwafwirisho kwaire mu matwi yakwe. ⁸ Eryo ikyaro kya sunkene no kutenta. Imifura ya myuru yaritenkene na ye yari sunkene, pantu Resa arikaripe. ⁹ Ikyushi kyafumine mu myona yakwe, no muriro uwabirimuka wafumine mu kanwa kakwe, wasankanishiwe na marasha ayareaka. ¹⁰ Aiswire imyuru, no kwika, ne mfimfi iyatikama yari panshi ya makasa yakwe. ¹¹ Aninine pari kerubi no kupupuka. Aribwenwe pa mapindo ya mwera. ¹² Arengere imfimfi ukuba itenti ryakumufimba, aronganike amakumbi ya mfura ayafinisha mu rwerere. ¹³ Ukufuma ku nkuba kuri ye amarasha ya muriro yarepona. ¹⁴ Yahweh aburukwite ukufuma mu muru. Uwapurishamo atampire ukupaata. ¹⁵ Aposere imifwi no kusaranganya abarwani- ne nkuba no kubasaranganya. ¹⁶ Eryo na panshi ya bemba pa boneke; imifura ya kyaro ya shere parwarara pa murandu wa ku karipa kwa kwa Yahweh, pa maka ya mupu uwa mu myona yakwe ¹⁷ Afikire panshi ukufuma mu muru; angikatirire! Amfumishe mu menshi ayengi. ¹⁸ Ampushishe ku murwani wandi uwakosesa, na kuri bonse abo abampatire barikosere ukunkira. ¹⁹ Bangishire pa bushiku bwa ma kyushi yandi, rero Yahweh arentungirira. Andetere pa nkyende iyaisukisha. ²⁰ Arimpusushe pantu arintemenwe. ²¹ Yahweh arindambwire ne kipimo kya burungami bwandi; ambwekeshapo nebo ukuringana ne kipimo kyakusanguruka kwa maboko yandi. ²² Pantu narisunga inshira shakwa Yahweh kabiri nshatara nkita ububi ubwakufuma kuri Resa wandi. ²³ Pantu amarango yonse ayaburungami fyaba pa ntanshi yandi ne fipope fyakwe, nebo nshatara mfumako. ²⁴ Nebo naba uwakaere pa kinso kyakwe, kabiri nariyisunga ku rubembu. ²⁵ Eikyo nomba Yahweh na wambura nebo kukipmo kya burungami no muringo wa kusanguruka kwandi ukwaba pa kinso kyakwe. ²⁶ Ku wakishinka, mwebo muyiranga ukuba abakishinka; ku muntu uwakaere, mwebo mukayiranga ukuba abakaere. ²⁷ Ku wasanguruka mukayirange mwebene abasanguruka, rero mwebo mukakyengeshe inkyengeshi. ²⁸ Mwebo mupususha abantu abarekyura, rero amenso yenu yaba pa ba matutumuko, eikyo murabawisha. ²⁹ Pantu mwebo muri rampi ryandi, Yahweh. Yahweh e rubuto rwandi mu mfimfi. ³⁰ Pantu muri mwebo kuti na butuka ukukiringanya ubureingo; muri Resa wandi kuti na toroka ikibumba. ³¹ Rero Resa ena, imibere yakwe yena yaripwiririka. Amashiwi yakwa Yahweh kyariropororwa. Ena ni nkwera kuri bonse aboba muri ye. ³² Pantu ni Resa nshi ukukira pari Yahweh, kabiri ni nani iribwe ukukira pari Resa wesu? ³³ Resa e kyubo kyandi, kabiri, atungurura umuntu umororoke mu nshira yakwe. ³⁴ Arenga amakasa yandi ukuba nga yansebura no ku mbika pa muru wa tupiri utwarepesha. ³⁵ Eikyo e usambirisha iminwe yandi ukurwa inkondo, na maboko yandi ukupeta ubuta bwa mukuba. ³⁶ Webo warimpera inkwera yobe iye pusukiro, no kubapo kobe ukwaibera kwarinsansabika. ³⁷ Webo warimpangira inkyende iyikuru panshi ya makasa yandi na pari iki amakasa yandi tayaipununa. ³⁸ Nebo naributusha abarwani bandi no kubonaura. Nebo nshapiribukire ku numa mpakafye iryo bena bonse baonawirwe. ³⁹ Naribonauwire no kubashonaura; bena tekuti beme. Nabawa panshi ya makasa yandi. ⁴⁰ Upera amaka pari nebo ngo mushipi wa burwi; ukontamika mwisamba ryandi bonse abangimina. ⁴¹ Upera inuma ya mikoshi ya barwani bandi; ndofya bonse abampata. ⁴² Baririre no kufwaya ubwafwirisho, rero takwari nangu umo uwa bapuswishe. Baririre kuri Yahweh, rero ena tabaswike. ⁴³ Nebo nariboma mutupimfya ngo twarukungu rwa kwi roba, naribanyantaura nge ta iya mu musebo. ⁴⁴ Kabiri warimpuswishe ukufuma ku fyongo fya bantu bandi. Warinsunga ngo mutwe wa nko. Abantu abo nebo nshaishiba barambombera. ⁴⁶ Abeni baripatikishiwe ukunkontamina, iryo rinefye baumfwa pari nebo, barengufwira. ⁴⁵ Abeni bareisa baretutuma ukufuma mu maringa yabo. ⁴⁷ Yahweh wa mweo! Narirumbanishiwe iribwe ryandi. Abe uwasumburwa Resa, iribwe rye pusukiro ryandi. ⁴⁸ Uyu e Resa uunandwirako, uyu wine e ukontamika panshi yandi abantu. ⁴⁹ Anengere ukuba uwakaere ku barwani bandi. Mukine, webo waringimya pa muru ukukira bonse abo abanjimine. Webo urapususha nebo ku baume bafikansa. ⁵⁰ Eikyo nkapera amatotero kuri webo, Yahweh, pakati ka nko; nkemba ishamarumbo kwi shina ryobe. ⁵¹ Resa arapera ukukimfya ukukaramba ku sha mfumu shakwe, kabiri ararenga amarango yakwe ukuba ayakine kubasubwa bakwe, kuri David na kubakamukonkapo umuyayaya.