¹ Cindo inshita shakupingula abantu ababi tashabikilwe no wamaka yonse? Cindo abo bonse ababa abacishinka kuli Lesa batabwena inshiku shabupingushi bwakwe ukwisa? ² Kwaliba abantu ababi abafumya ifishibilo fya mipaka; kuli abantu ababi abasenda imikuni ya mpanga ku maka no kuibika pa ficemi fyabo. ³ Basenda punda wa abo bonse ababula ba shibo; basenda ne ng'ombe iilume iyakwa mukamfwilwa nge cicingo. ⁴ Bena bapatikisha abantu abapina ukufuma munshila shabo; abantu abapina aba cino calo bena balafisama ukufuma kuli bo. ⁵ Bona, aba bantu abapina baya ku ncito shabo nga ba punda ba mpanga mu matololo, mukufwailisha ifya kulya; lelo abena Araba balapela kuli bo ifilyo fya bana babo. ⁶ Abantu abapina basepa ubucushi mu mabala ya bantu bambi; basaba ifitwalo fya myangashi mu mabala ya bantu ababi. ⁷ Bena balala ubwamba ubushiku bonse ukwabula ifyakufwala; bena tabakwata ifya kufimbana mi nshita ya mpepo. ⁸ Bena baba ababomba no mume wa ku mpili; bena balala mupepo na mabwe ayakulu pantu tabakwete umwa kuuba. ⁹ Kwaliba abantu ababi abafumya kashiwa kwi bele lyaba nyinabo, na bantu ababi anasenda abana baice ngo bucingo ukufuma ku bantu abapina. ¹⁰ Lelo abantu abapina benda ubwamba ukwabula ifya kufwala; nelyo bena baba ne nsala, basenda imyanshi ya ng'ano iya bantu bambi. ¹¹ Abantu abapina bapanga amafuta mukati kafibumba fya bantu ababi; basepa mu mabala ya myangashi ya bantu ababi, lelo bena bacula ne cilaka. ¹² Ukufuma kunse ya musumba kuli ukuteka kwa bakofwa, elo ne cikolomo ca bacenwa cikolila ukufwaya ubwafwilisho. lelo Lesa tomfwa ukuilishanya. ¹³ Bamo aba bantu ababi bapata ulubuto; tabeshiba ne nshila ya luko, nelyo ukuti bekale mu nshila yaluko. ¹⁴ Libe ulubuto lwa kasuba talulapwa iciipono cima no kuya ipya umupina no mulanda; munshita ya bushiku aba ngo mupupu. ¹⁵ Kabili, ne lisno lya mucende lilolela pali muntu ngulya; ena alanda ati, 'Takuli ilinso ilikobona nebo.' Ena alufyanya ne cinco cakwe. ¹⁶ Mu mfimfi abantu batoba mu mayanda lelo bena balaisalila mu nshita ya kasuba, tabasakamana ulubuto. ¹⁷ Kuli bo bonse, imfimfi iyafitisha yaba ngo lucelo; pantu bena baba bacibusa ne fitinya mu mfimfi iya fitisha. ¹⁸ Mukwangufyanya bena balapita, eico, nge cintu icapepuka pa mulu wa menshi; icifulo ca calo cabo calitipwa, takuli nangu umo uuya mukubomba mu mabala yabo aya myangashi. ¹⁹ Ngafintu fine icilala no kukaba fisungulula amabwe ya menshi no kuya lenga ukuba amenshi, efyo ne manda shisenda abo bonse ababifya. ²⁰ Ulufumo ulo ulwa mufyele lukamulaba ena; umutiti ukalya ena nge calowa; takebukishiwe na kabili; muli iyi nshila ububifi buli no kuputulwa nge cimuti. ²¹ Umubifi apakasa umwanakashi ing'umba uutafyalapo abana; ena tacita icisuma kuli mukamfwilwa. ²² Lelo Lesa kumaka yakwe alafumyapo abanulamba; ena alatalama elo takosha bena mukuba no mweo. ²³ Lesa alenga bena ukutontonkanya ukuti bali abacingililwa elo bena balaba abansansa pali ici, lelo amenso yakwe yaba munshila shabo. ²⁴ Aba bantu balisansabikwa; lelo, mukashitafye akanono, bena bali no kupita; mucine, bali no kutentemunwa; bali no kulonganikwa capamo nga bonsefye; bali no kufumishiwapo pamulu nga imitwe ya ng'ano. ²⁵ Nga tacili ifi, ni nani uwinga nshinina nebo ukuba uwa bufi; nani engalenga amashiwi yandi ukuba ayafye?''