¹ Vashakiwa, kamwa sha zumini kuruho ronshe. Kavulyaho, mutereke oruho muvone kapa kwa Nyambe ruzwa, kakuli vungi bwa ma porofita vembuzi shiva nakiyenderi mufasi. ² Kezi mbomuzyive Ruho rwa Nyambe-ronshe ruho ruaamba ye Jeso Kereste na kezya kenyama kwa Nyambe ruzwa, ³ mi oruho ronshe ruaamba Jeso kazwi kwa Nyambe. Oru ndoruho rwa vazokeri va Kereste, avo ni mwashuwa ye vakezite, mi shivena kare mufasi. ⁴ Kwa Nyambe muzwa, yela vance, mi ni mwa vakoma kakuli ozyo ena kwanu munene kutanta ozyo ena mufasi. ⁵ Mufasi vazwa; kavulyaho ezo vaamba mufasi zizwa, mi efasi liva teeza. ⁶ Eswe kwa Nyambe tuzwa. Enshe ozyo azyi Nyambe atu teeza. Yenshe ozyo kazwi kwa Nyambe katu teezi. Kezi shetuzyi ruho rwe niti mi no ruho ruteenzi. ⁷ Vashakiwa, tukishake zyumwi kuzyumwi, a lato kwa Nyambe lizwa, mi yenshe ozyo shaka napepwa kwa Nyambe mi azyi Nyambe. ⁸ Omuntu ozyo kashaki kazyi Nyambe, Nyambe nji lato. ⁹ Kakuli keli lato Nyambe naavonahara mukati ketu, Nyambe naatuma Mwane enke mufasa ye tuhare kevaka lyakwe. ¹⁰ Mweli lato, kali kutiye tushaka Nyambe, kono eye ndeye atushaka, mi naatuma Mwane okutiye ake alife zivi zetu. ¹¹ Vashakiwa, heva Nyambe naatushaka, neswe tukishake zyumwi kuzyumwi. ¹² Kwaazya ozyo navona Nyambe. Heva tukishaka, Nyambe mbwa kare neswe, mi elato lyakwe lipetehete kwetu. ¹³ Keci tuzyi ye tukere kwakwe neye akere neswe, kakuli naatuha ku Ruho rwakwe. ¹⁴ Hape, nitwavona mi tuli mpaki ye Tata naatuma Mwane okuta ye ave muhazi we fasi ¹⁵ Enshe ozyo aamba ye Jeso Mwana Nyambe, Nyambe akere kwakwe neye akere kwa Nyambe. ¹⁶ Hape, nitwazyiva mi no kuzumina elato ena nelyo Nyambe kwetu. Nyambe ndi lato, mi ozyo akere mweli lato akere kwa Nyambe, mi Nyambe neye akere kwakwe. ¹⁷ Kelyi vaka, eli lato liva nokupeteha mukati ketu, okutaye tuwane okugora muzyuva lye nkaturo, kakuli vulyaho ena, shina vuti twina mufasi. ¹⁸ Kwaazya entiya mulato. Kavulyaho, elato lipetehete litanda entiya, Kakuli ensavo isupa enkoto. kono ozyo atiya apangwa koku peteha mulato. ¹⁹ Tushaka kakuli Nyambe naatushaka kaatanzi. ²⁰ Heva zyumi ataye, ''Ndishaka Nyambe'' kono natoyete mukwakwe, ndi si mbuzi. Kozyo kashaki mukwakwe, ozyo abwene, kaoli kushaka Nyambe, ozyo azya kubweene. ²¹ Hape, owu ngo murawo tukwesi uzwa kwakwe: Kozyo yenshe ashaka Nyambe aswanezi kushaka omukwakwe.