¹ Owe ne yira ghomukurwange ghokatughuru, oyu ghayamwine kudyere dyanawe. Ngeshi nina kushwaghera panunda ne nina kuku ncumita nombadiko oyu shogha ninyathe. ² Mbona kupiteritha nokukureta kundhugho dhanawe, oyu ghani hongire. Mbona kupa vinyu ghomutowi nokukupa noghumweya vinyu ghokuyitondo yange yombuyo. ³ Dyoko dyendi dyorumoho ne pamutwi wange nodyoko dyendi dyorudyo ne kuni shambereritha. ⁴ Nakumurawera mwe mwambuyama ghomu Jerusalem eshi perere penu eshi mupinduthe ruhakitho, shimengwa ghana yihafera. ⁵ Yidye yu ghana kushwegherera mumamboreya, ghana yeghemena pamuhakwa wendi ghoruhakitho? Nakupindutha muthitondo thombuyo thodina Apricot; muthitondo thotho ne mogha kuwanene nyoko; modiyo ghakushamurukere. ⁶ Nitende thingangera mumutjima ghoye, yira thitareka padyoko dyoye noruhakitho ne rwatanara yira yifa. Difupa ne dikenya yira dirara dhiko; maretha ghadyo ne maretha ghomudiro nomaretha ghomudiro ghushokuru. ⁷ Meyu ghomengi ne mbadi wakudhimitha ruhakitho endi mahandjiva ghangambwere ruhakitho. Ngeshi katughuru ghatapa ghushwi ghomundhugho dhendi kuruhakitho, yitapa yendi ne mbohana yinyatha. ⁸ Twakara naminetu ghombuyama nombadi ghatumba mere. Yinu munye mbotutenda kwaminetu apa mboha mwandekera? ⁹ Ngeshi ye ne ditete dyokumba, mbotuna tendera pamushoke wendi ghosiliveri. Ngeshi ye ne thero, mbotuna muyengi noyipurangi yothitondo tho Cedar. ¹⁰ Nakarire ditete dyomaginditho, nomere ghange ne yira mushoke; nakarire mumeho ghendi yira ghumweya oyu ghareta thiraro. ¹¹ Salomon ne ghakarire nothinyamo ku Baal Hamon. Ghatapire thinyamo thi kwawa shoha thipakere thinga. Nakehe yu ghakona kareta diyovi dyomanyinga gho Shekels musiliveri kumbuyo dhendi. ¹² Thinyamo thange ne paghutho dhange thidi, Owe Salomon ne wane diyovi nawa hana kuthipakera thinga ne mathere mawadi. ¹³ Amwe mwatunga munyamo, muteghe kutwi kumaywi ghenu no nashana nigha yuve name. ¹⁴ Tambukerere muhakwa wange ghodirura, noyira fumbo endi ghomumbiru mumarundu ghothiwe mwene.